LABLangile Abertzaleen Batzordeak

Osakidetzak berriro erakutsi du gaur ez daukala negoziatzeko borondaterik, eta ez duela inolako asmorik gure osasun-sistema publikoaren arazo larriei heltzeko eta konpontzeko; izan ere, arazo horiek langileek jasaten dituzte egunerokoan, baina horrek zuzeneko eragina du ere herritarrei eskaintzen zaien zerbitzuan.

Hala, LAB, SATSE, ELA, CCOO eta UGT sindikatuok birritan deia egin arren, Osakidetza ez da gaurko Lan Harremanen Kontseiluaren egoitzan deitutako bilerara joan, eta sindikatuok bakarrik hartu dugu parte bileran. Gainera, ez digu erantzunik eman atzo bertan etortzeko egindako errekerimenduari. Izan ere, Osakidetzako zuzendaritzara bidalitako komunikazio bateratu batean jakinarazi genion gaurko bilera mantentzen genuela eta joateko eskaera egin genion.

Osakidetzako egiturazko arazo larriak konpontzera bideratutako aldarrikapen batzuen inguruan deitutako mobilizazioen ondoren, jarraipen masiboa izan zuten mobilizazio batzuk, Osasun Sailak uko egin dio mobilizazio horiek deitu dituzten sindikatuekin biltzeari, eta negoziazioa edukirik gabeko eremu batera bideratu nahi du. Esparru horretan, gainera, bi eguneko greba deialdia egin ez duten beste sindikatu batzuk daude ere.

Osasun Sailaren apustua normaltasunaren irudia ematea da eta errealitatea propaganda-ekintzen bidez ezkutatzen saiatzea. Gaur, egungo egoera iraultzeko ezinbesteko urratsak ematen hasteko negoziazio-bilera batera joateari uko egin dioten bitartean, Osasun Sailburuak osasun-langileei eskainitako plaza bat inauguratu du. Osakidetzako langileek ez dute propaganda-ekintza hutsen beharrik, herritarrei kalitatezko arreta eskaini ahal izateko lan-baldintza duinak behar dituzte. Baina argi dago Osasun Sailak ez diola entzuna eman nahi langileen zein gizartearen aldarriari, azken asteetako mobilizazioetan agerian geratu den aldarria.

Hamaika aldiz azpimarratu dugu egoera oso larria dela eta irtenbideak premiazkoak eta beharrezkoak direla, eta horietako askok berehalakoak izan behar dutela. Hala ere, ikusten dugu Osakidetzak negoziazioa luzatu nahi duela, eta, beraz, baita konponbideak ere. Osasun Sailak itxaron dezake, langileek eta herritarrek ezin dute gehiago itxaron.

Ematen diguten erantzun bakarra da dena ondo dagoela eta Mahai Sektorialak behar bezala funtzionatzen duela. Osakidetzarentzat egungo Mahai Sektoriala da egokiena: informazioa emateko esparru bat, non gai zerrenda inposatzen zaigun gure aldarrikapenak barneratu gabe, formatu telematikoan naiz eta pandemiak momentuan hori ez justifikatu, non ez zaigun dokumentazioa aldez aurretik bidaltzen aztertu ahal izateko eta negoziatu ahal izateko. Hori da Mahai ideala Osakidetzarentzat.

Salatu nahi dugu, gainera, Osakidetzako zuzendaritza berriarekin urteetan zehar salatu ditugun arazoak areagotu egin direla. Esan dezakegu edukiei eta formei eusteaz gain, egoerak okerrera egin duela azken hilabeteetan, eta sindikatuekiko mespretxua gero eta handiagoa dela. Mespretxu hori herritarrei ere zabaltzen zaie.

LAB, SATSE, ELA, CCOO eta UGT sindikatuok negoziazio kolektiboarekiko konpromisoa erakutsi dugu, eta “zero mahai” bat egiteko eta egoera bideratzeko saiakera bat egin dugu. Saiakera horren aurrean, beste aldeak ez du erantzun eta ez da bilerara joan.

Berriro ere, negoziaziorako deia egiten diogu Osakidetzari konponbideak bilatzeko eta egoera bideratzeko. Baina ohartarazi nahi diogu ere ez dugula ez xantaiarik ez propaganda-ekintzarik onartuko. Benetako negoziazioa eskatzen dugu, irtenbide eta hobekuntza zehatzetan islatuko dena. Ildo horretan urratsik ematen ez bada, ez dugu berriro Mahai Sektorialean parte hartuko eta mobilizazioekin jarraituko dugu.

LAB, SATSE, ELA, CCOO eta UGT sindikatuok Osakidetzarekin hitz egiteko daukagun borondatea berretsi nahi dugu, baina benetako negoziazio serio eta zintzo batera eramango gaituen elkarrizketa eskatzen dugu, langileentzako konponbide eta hobekuntza zehatzetan islatuko dena. Urteak daramatzagu Osasuneko Mahai Sektorialean pairatzen ari garen egoera salatzen, eta egoera horrek okerrera egin du azken hilabeteetan: eduki, negoziazio eta gardentasun erabateko falta, alde bakarreko inposaketak eta bertan lortutako akordioak ez betetzea. Edukirik gabeko bilerak, propaganda-kutsu argia dutenak. Gainera, Osakidetzaren inposaketak gero eta gehiago dira.

Egoera desblokeatzeko eta edukien negoziazioan, zein hori gidatu behar duten joko-arauetan aurrera egiteko, pasa den ostiralean, Lan Harremanen Kontseiluan bilera bat egiteko deia egin genion Osakidetzari, bihar, goizeko 11etan. Sailburuak atzo publikoki jakinarazi zuen ez zirela bilera horretara joango, eta gehitu zuen, gainera, Mahai Sektoriala baliagarria izan dela gaur arte, eta berriro azpimarratu zuen sindikatuok bilera bakoitzeko gai-zerrendako bi puntu ezartzen ditugula. Baina adierazpen horiek ez datoz bat Mahai Sektorialean egunerokoan gertatzen denarekin.

Paraleloki, Mahai Sektoriala biltzeko deialdia egin zuen Osakidetzak, egun eta ordu berdinerako. Hala ere, adierazi behar dugu, bi greba-egunen ondoren, ezin dugula berriro onartu Mahai Sektorialean parte hartzea, Mahai horrek behin eta berriz salatu ditugun formei eta edukiei eusten dielako, eta hori izan zelako, hain zuzen ere, foro hori uztera eraman gintuena:

• Bilera telematikoa da berriz ere: Osakidetzak ez du aurpegia eman nahi eta pantaila baten atzean ezkutatzen da berriro ere. Onartezina da, lan zentroetan bizi den egoeraren larritasuna ikusita, deitutako mobilizazioen jarraipena masiboa izanik, osasun-larrialdia bertan behera geratu den momentu honetan, eta Administrazioaren beste negoziazio-mahaiak aurrez-aurrekoak direnean (Mahai Orokorra, Hezkuntzako Mahaia, Administrazio Orokorreko Mahaia, etab.), Osakidetzak, sindikatuekiko erabateko gutxiespena erakutsiz, 2020ko martxotik aurrera egin izan duen bezala, bilera telematikoa planteatzea.

• Gai-zerrendak ez ditu gure aldarrikapenak barneratzen: Sailburuak egindako adierazpenak gorabehera, eta azken bi asteotan berariaz eskatu badugu ere hainbat alditan, gure aldarrikapenak ez daude jasota iragarritako gai zerrendan. Azpimarratu nahi dugu aldarrikapen horiek premiazkoak eta ezinbestekoak direla Osakidetzak bizi duen egoera iraultzeko.

• Ez digute aldez aurreko dokumentaziorik bidali: bileratik 24 ordu eskasera, berriz ere, puntu bakarreko dokumentazioa aurreratu digute, eta beste hiruretatik ez dago inolako dokumentaziorik. Horietako bati buruz, gainera, adierazten da dokumentazioa bilera eta gero entregatuko zaigula.

Adierazitako guztia kontuan hartuta, ondorioztatzen dugu Lan Harremanen Kontseiluan deitutako bilera, inoiz baino beharrezkoagoa dela: Mahai Sektorialaren aurreko bilera bat, non, aurrez aurre, foro hori negoziazio-eremu gisa berreskuratzeko bideak bilatuko ditugun, baita langileen aldarrikapen eta behar nagusiei premiaz heltzeko tresna gisa ere. Kutsatutako girotik kanpoko elkarrizketa bat, non ados jarriko garen, Mahai Sektoriala bi aldeentzat baliagarria eta konfiantzazkoa izan dadin.

Negoziatzeko deia egiten dugu, baina Osakidetzari ohartarazi nahi diogu ez dugula xantaiarik, ez propaganda ekitaldirik onartuko. Negoziazioa benetakoa izan behar da, mamia duena; irtenbide eta hobekuntza konkretuak behar ditugu. Bide horretan aurrera egin ezean mobilizazioei eutsiko diegu.