2024-02-26
HomeEkintza SindikalaNafarroako adinekoen egoitzetako lan-baldintzak eta zerbitzuaren kalitatea hobetzeko lehen hitzarmena aldarrikatu dugu

Nafarroako adinekoen egoitzetako lan-baldintzak eta zerbitzuaren kalitatea hobetzeko lehen hitzarmena aldarrikatu dugu

LAB, ELA, UGT eta CCOO sindikatuok, menpekotasunaren sektoreko lau sindikatu nagusiek, greba eta mobilizazio eguna egin dugu Nafarroan. Gure helburua da herrialdeko adinekoen zentroen sektoreko lehen hitzarmena sinatzea.

Hala, sektoreko patronalei eta Nafarroako Gobernuari eskatu diegu erantzukizuna beren gain hartu eta lan duina eta kalitatezko zerbitzuak berma ditzatela menpekotasuna duten pertsonei arreta ematen dien sektorean, diru publikoz sostengatutako arloa baita.

Sindikatuok Iruñean eta Tuteran egindako mobilizazio nagusian jakinarazi dugun bezala, hitzarmen honek 4.500 langile baino gehiagori eragingo lieke, Nafarroa osoan 70 zentro baino gehiagotan banatuta. Zaintza profesionalizatu gehienak enpresa pribatuen esku daude, eta horiek onura ekonomikoa lehenesten dute pertsonen zaintzaren gainetik. Ezinezkoa da kalitatezko asistentzia ematea, lan-baldintza prekarioak mantenduz: 7 minutu pertsona bakoitzari arreta; ia 1.800 orduko gehiegizko lanaldiak urtean; atsedenaldiak ez dira nahikoak, hilean asteburu bat bakarrik; osagarririk gabe bajetan; eta hileko 1.000era ere iristen ez diren soldatekin, besteak beste.

Beharrezkoa da zainketen eredu publiko, doako eta unibertsal baterantz jotzea, eta bide horretan ezinbestekoa da egoitzen hitzarmen bat, ematen diren zerbitzuaren eta arretaren lan-baldintzak eta kalitatea hobetuko dituena.

Sektoreko langileak funtsezkoak izan dira, eta funtsezkoak izaten jarraitzen dute gure adinekoei eta menpekotasuna duten pertsonei arreta emateko.

Langileen hitzetan, “gure lan-baldintzak hain dira eskasak, ezen gure lankide asko gaur egun ere ez baitaude hemen, ezin dute grebarako eskubidea erabili, gutxieneko zerbitzuetan daude, gure familiei arreta ematen”.

Greba-egunarekin lan-baldintzak hobetzea eta duintzea eskatu nahi izan dute. Hauek dira aldarri nagusiak:

• Nafarroako administrazio publikoko langileek jasotzen dituzten soldaten parekoak
• Urtean 1.592 orduko lanaldia
• Segurtasun- eta babes-neurri eraginkorrak
• Kalitatezko arreta bermatuko duten ratio egokiak
• Sistemaren prestakuntza eta profesionalizazioa
• Aldi baterakotasuna eta kontratu partzialak amaitzea
• Egonkortasuna eta etorkizunerako bermeak ematea gure lanei
• Ikuskapenak indartzea
• Putre funtsen partaidetza ezabatzea
• Zentro horien kudeaketa publikoa behingoz exijitzea

Lan-baldintza duinek soilik ziurtatzen dituzte zerbitzu duinak eta kalitatezkoak. Premiazkoa da zaintza lanean arreta jartzea, duten eta merezi duten balioa eta gizarte-aintzatespena ematea. Emakumeak dira gehiengo sektorean. Arlo hau ikusezina da, eta emakume langile hauen lanak aitortzarik gabe jarraitzen du.

Bada garaia sektoreko langile guztiak merezi bezala benetan aitortzeko, aitorpen hori nahitaezkoa da eta, batez ere, justizia-ekintza bat. Zaintza lanaren duintasuna eta mendekotasun-zerbitzuen kalitatea aldarrikatzen jarraituko dugu. Arreta publikoa, doakoa eta unibertsala eskatzen jarraituko dugu. Mobilizatzen jarraituko dugu lortu arte.

AZKEN ALBISTEAK | ÚLTIMAS NOTICIAS

Martxoaren 3ko ekintza bateratuak aurkeztu ditugu

Datorren igandean betetzen dira 48 urte martxoaren 3ko sarraskitik. Eta gaur, agerraldia egin dugu LAB, ELA, ESK eta STEILAS sindikatuok, Martxoak 3 elkartearekin batera, igandean egingo ditugun ekintzak aurkezteko. 12:00etan, ekitaldia egingo dugu Plazan, monolitoaren ondoran, eta 12:30ean, bertatik abiatuko da Gasteizko kaleak zeharkatuko dituen manifestazioa.

Osakidetza eta garbiketa enpresa esleipendunei eskatzen diegu uztailean sinatutako aurreakordioa bete dezatela

Joan den udan, Osakidetzak azpikontratatutako garbiketa-zerbitzuko langileek egindako borroka eredugarri eta duinaren ondoren, enpresa esleipendunak eta gehiengo sindikala aurreakordio batera iritsi ginen. Bertan, sektoreak hitzarmena berritzeko egin zituen aldarrikapen nagusiak jaso genituen: bertako langileen baldintzen homologazioa blindatzea, karrera profesionala eskuratzea, txanda-kontratua eskuratzea, bakanteen arautzea…

LABek Nafarroa Garaian inoizko emaitzarik onenak lortu zituen 2023ko hauteskunde sindikaletan: 1.223 delegatu ditu eta %18tik hurbil dago

Nafarroako Gobernuak azkenean zabaldu dituen emaitza ofizialen arabera, LAB sindikatuak maximo historikoak lortu zituen 2023ko hauteskunde sindikaletan. Azken datuen arabera, LABek 1.223 delegatu ditu Nafarroa Garaian, eta %17,96ko ordezkaritza. Lau sindikatu nagusien artean, azken urtean LAB izan da delegatu kopuru gehien lortu dituena, bai eta ehunekoan gora egitea lortu duen bakarra ere.