Agerraldia egin dugu Arcelor Mittalen inguruan hartutako azken erabakien inguruan, Lesaka, Legasa, Sestao, Bergara eta Olaberriako lantegietako ordezkariekin batera.
Hain zuzen ere, Arcelor Mittaleko zuzendaritzak eta sindikatu estatalek Euskal Herriko errealitate sindikalari entzun gor egin diote berriro. Oraingoan estatalizazio estrategian beste pausu bat eman dute eta Olaberriko eta Bergarako lantegiak akordio markoan sartzea inposatu dute, bertako komiteekin inongo kontsultarik egin gabe. Hauek beraien gehiengoaren kontrakotasuna garbi adierazi dute egindako ez ohiko komite bileretan.
Urteetan salatu dugun moduan, Estatu mailako akordio marko horretan, Euskal Herriko gehiengo sindikala guztiz desegina gelditzen da eta bertan “adosten” dena, Euskal Herriko lantegietan izugarrizko eragina baldin badu ere, ez du inondik inora bertako errealitatea kontuan hartzen.
Kezkagarria da ere Asturiasera begira funtzionatzen duen marko bat izatea etorkizunean langileen lan baldintzak adostuko dituena, horren emaitzaren adibide garbiak baititugu azken urte luze hauetan; Euskal Herrian lanpostu suntsiketa basatia eta inbertsiorik ez, hau da, desagerpenaren bidea.
Orain bizi dugun garai ezegonkor honetan, non enpresak egoera globalaren aitzakia erabiltzen ari den langileon baldintzak okertzeko (beraiek urtez urte irabazi gehiago dituzten bitartean), inoiz baino beharrezkoagoa da Euskal Herrian erabakitzeko marko bat, gure lanpostu eta baldintzak defendatu ahal izateko.
Esan bezala ez gaude egoera hau onartzeko prest eta zuzendaritzak eta sindikatu estatalen arteko tandem hori aurrera jarraitzen duen neurrian gure eskuetan dagoen guztia eginen dugu beraien erabakiak baldintzatzeko.
