Gaur, Lan Harremanen Kontseiluan, EAEko etxeko langileen lehen hitzarmen kolektiboaren negoziazio-mahaia osatzeko lehen saioa izan da. LABek maiatzaren 9an erregistratu zuen eskaera hori.
LABez gain, langileen aldetik ELA, CCOO, UGT eta ESK aurkeztu dira, eta hainbat bilera egin ditugu hilabete hauetan sindikatu hauekin. Confebask da hitzarmena negoziatu behar duena patronal gisa.
Bertaratutako sindikatu guztiok negoziazio mahaia eratzeko konpromisoa eta borondatea erakutsi dugu. Confebaskek esan digu ez duela bere burua patronaltzat jotzen negoziazio honetan eta ez dutela inolako erantzukizunik hitzarmen honen negoziazioan.
Patronalaren ordezkaria den aldetik, Confebask da negoziazio mahai hau osatzeko zilegitasuna duen subjektua. Argi dago ez duela borondate politikorik. Europako Justizia Auzitegiak sektore horren diskriminazioaren aurkako epaia eman du jada, eta 10 urtez eskatu ondoren, badirudi Espainiako estatuak LANEren 189. Hitzarmena berretsiko duela, eta horrek hobekuntza handia ekarriko lukeela etxeko langileen lan-baldintzetan. Hala ere, LABek urrats bat harago joatearen alde egiten du, EAEn etxeko langileen lan-baldintzak negoziatzeko esparru propioa sortuz.
Irmo salatzen dugu Confebasken utzikeria. Patronal jakinik ez dagoen sektoreetan Confebaskek hartu behar du bere gain erantzukizun hori. Beste behin, Confebaskek beste alde batera begiratzen du eta etxeko langileak miserian lan egitera kondenatu nahi ditu. LABek azken hiru urteetan sektoreari lege-esparru bat eskaintzearen aldeko apustua egin du, eta denbora luzez, langileekin sinatutako hitzarmenaren beharra eta edukiak landu ditugu. Confebask langileen eta negoziazio kolektiboaren aurka dagoenez, LABek honako hau adierazi du:
- Argi dugu Confebaskek, aitzakien bidez, negoziazio kolektiborako eskubidea erasotzen duela. Ateak itxi dizkio milaka langilek beren lan- eta bizi-eskubideak negoziatzeari.
- Patronalak ezarritako mugak alde batera utzita, guk ekintza sindikala bultzatuko dugu negoziazio mahaia eratu eta hitzarmena sinatzea lortu arte.
- LABek Confebask juridikoki salatuko du eta auzitegietara eramango du.
Negoziazio kolektiboa langileen eskubidea da, eta patronalak ezarritako mugei aurre egingo diegu. Bide honetan aliantzak ezinbestekoak dira eta horregatik batasun sindikalerako eta babes sozialerako deia egiten dugu.
LABek etxeko langileen atal sindikal bat sortu du, eta EAEko etxeko langileen hitzarmen kolektibo bat lortzeko eman beharreko urratsak aztertuko ditu, sektoreko langile guztientzat irekita egongo den batzar ireki batean. Hau datorren larunbatean, ekainaren 11n, LABen Bilboko egoitzan egingo du eta 2019an abian jarri zuen hileko batzarren dinamikaren barruan kokatzen da.