2026-01-12
Blog Page 236

Euskal Eskola Publikoaz Harrok hasi duen fase berriari begira LABen gogoeta eta erabakia

Zubiate(e)ko Aritz
-
0
Euskal Eskola Publikoaz Harrok hasi duen fase berriari begira LABen gogoeta eta erabakia

Aurrerantzean LABek ez du erakunde gisa Euskal Eskola Publikoaz Harroren eguneroko dinamikan parte hartuko. LAB plataforman kide gehien dituen eragilea eta hezkuntza publikoan ordezkaritza handiena duen sindikatua izanik ere, Harroren sorrera-agiria ordezkatuko duen dekalogoa sortzeko prozesuan LABen ekarpenak ez dira aintzat hartu. Gauzak horrela, LABek ez du dekalogo berria izenpetu eta aurrerantzean Harrok ez du LAB erakunde gisa ordezkatuko. Harroren baitan egin bezala, LABek Hezkuntza publikoan dauden premiei erantzuna emateko lanean jarraituko du, hezkuntza sare publiko bakar, burujabe, euskaldun eta deszentralizatua eratzeko lanean sakontzen, hala ekimen propioen bidez, nola elkarlanean.

Euskal Eskola Publikoaz Harro plataforma EAEko eskola publikoa hezkuntza sistemaren ardatz bilakatu eta segregazioarekin amaitzeko neurriak sustatzeko jaio zen. LAB sindikatua plataformaren sortzaileetako bat izan zen, izan ere, hezkuntza publikoan ordezkaritza handieneko sindikatua izanda, aipatutako helburuak oso garrantzitsuak ziren eta badira LABentzat. Desberdintasunak desberdintasun, eremu publikoko eragile desberdinak batzen gaituzten aldarrikapenen inguruan elkarlanean aritzeko esparru bat izan da Harro.

Harrok izaera mistoa izan du hasieratik: batetik, norbanakoak eta norbanakoz osatutako tokiko plataformak egon dira; bestetik, ehunka eta milaka lagunez osatutako erakundeak. LAB izan da, hain zuzen ere, plataformako eragilerik handiena.

Duela urtebete LABek bi espazioak argi bereiztea proposatu zuen: batetik norbanakoez osatutako herri ekimena, mota honetako eragileen ohiko funtzionamenduaren arabera arituko litzatekeena; bestetik, eragileen arteko elkarlan esparrua, ordezkagarritasun printzipioaren eta kontsentsu bilaketaren arabera jardungo lukeena.

Proposamen hori ez zen aintzat hartua izan eta praktikan norbanakoez osatutako herri ekimen gisa jardun du Harrok. Bere sorreratik hona, zenbait erakundek parte hartzeari utzi diote edota parte hartze sinbolikora mugatu dira.

Disfuntzio organizatibo hauek agerian geratu dira Harroren dekalogoa berritzeko prozesuan. LAB plataforman kide gehien dituen eragilea eta hezkuntza publikoan ordezkaritza handiena duen sindikatua izanik ere, plataformaren sorrera-agiria ordezkatuko duen dekalogoa sortzeko prozesuan LABen ekarpenak ez dira aintzat hartu

LABek egindako ekarpenek bi erreferentzia zituzten oinarri: batetik, Harroren sorrera-agiria; eta bestetik, hezkuntza lege-aurreproiektu zirriborroaren aurrean sortutako hezkuntza publikoko intersindikaleko testua (gehiengo sindikala osatzen duten LAB, STEILAS eta ELAk adostutakoa, eta Harrok berak babestutakoa). Esan bezala, ez dira onartuak izan.

Gauzak horrela, LABek ez du Euskal Eskola Publikoaz Harroren dekalogo berria izenpetuko eta aurrerantzean plataforma horrek ez du LAB sindikatua ordezkatuko. HARROn parte hartzen duten LABkideak norbanako gisa arituko dira. Eta LABek erakunde gisa HARROren ekimen batera atxikitzea erabakiko balu, espresuki jakinaraziko du.

Grebak deitu ditugu Gipuzkoako metalgintzan, hitzarmen duina helburu

Zubiate(e)ko Aritz
-
0
Grebak deitu ditugu Gipuzkoako metalgintzan, hitzarmen duina helburu

Gaur, sindikatuko delegatuen batzarrak ezezkoa eman dio aho batez maiatzaren 2an ADEGIk Gipuzkoako metaleko mahaian egin zuen proposamenari. KPIa ez da bermatzen, lanaldi murrizketari buruzko eztabaida erdigunean dagoen honetan 2 orduko murrizketak ez dio erantzuten lan eta bizi baldintzak hobetzeko beharrei, eta malgutasunean eta lan osasunean proposamenik ez egotea atzera pausoa da, sindikatuaren ustez. Horrela, borrokarako prestutasuna berretsiz, grebak deitu ditugu maiatzaren 24, 25 eta 31 eta ekainaren 1, 14 eta 15erako.

Azken negoziaketa bileran lehenengo aldiz ADEGIk ustezko proposamen osoa aurkeztu zuen, behin eta berriro egiteko exijitu dioguna, eta gainera behin betikotzat eman zuen, negoziaketarako tarterik utzi gabe.

Onartezintzat jo genuen eginiko lehengo proposamena azkena izatea. Hala, guretzat orain hasten da benetako negoziaketa. Gipuzkoan sektoreko datuak onak direla eta proposamen hori hobetzeko aukera dagoela ikusita, erraza izango ez den arren, soilik borrokaren bidez lor daitekeela nabarmendu dugu.

Gaur gure delegatuen batzarrak ezezko borobila eman dio ADEGIk egindako proposamenari, derrigorrez hobetu beharrekoa dela iritzita. Hala, borrokarako prestutasuna berretsiz, greba deialdi hauek adostu ditugu: maiatzaren 24, 25 eta 31 eta ekainaren 1, 14 eta 15.

Beste sindikatuei ere, gaur batzarrean harturiko konpromisoakk eta grebarako deia luzatuko dizkiegu, denon borrokaz ADEGIren proposamena hobetzeko asmoz.

Langabeziak behera egin arren, enpleguaren kalitateak okerrera egiten jarraitzen du

Zubiate(e)ko Aritz
-
0
Langabeziak behera egin arren, enpleguaren kalitateak okerrera egiten jarraitzen du

Langabeziak behera egin du Hego Euskal Herrian; 138.845 langabe daude, duela urtebete baino %6,80 gutxiago. Datua bere horretan positiboa izan arren, enpleguan prekaritatea eta ezegonkortasuna nagusitzen ari direla baieztatzen duten hainbat datu ere ekarri ditugu lehen lerrora.

Langabeziaren joerari dagokionean, pasa den astean kaleratu ziren Biztanleria Aktiboaren Inkestako (BAI) datuekiko aldea nabarmena da. BAIko datuen arabera, langabeziak gora egin zuen nabarmen urteko lehen hiruhilabetekoan; gaur SEPEk emaniko datuek kontrakoa adierazten dute. Azalpena sinplea bezain kezkagarria da. Izan ere, BAIko datuak inkesta bidez lorturikoak direnez, ezkutuko ekonomian diharduten langileen egoera ere islatzen du. Beraz, Hego Euskal Herrian ezkutuko ekonomian lan egiten duten langileen kopurua adierazgarria da, bereziki Espainiako Estatutik kanpo jaiotako langileak izanik.

Apirilean kontratu guztien artean, %74,56a behin behinekoak izaten jarraitzen dute, 53.702 kontratu, hain zuzen ere, mugagabeak %25,44a diren bitartean. Pasa den urte zein hilabetearekiko, kontratu mugagabeek behera egin dute, baina badirudi kontratu mugagabe zein behin behinekoen arteko proportzio berria instalatu dela. Espainiako Estatuko lan erreforma indarrean sartu zenetik kontratu mugagabeen kopurua handitu egin den arren, hobekuntza gehiagorako margenik gabe gelditu da, behin behinekotasuna %75ean egonkortuz.

Kontratu mugagabeen igoera honen atzean, aldizkako finkoen igoera nabarmendu behar dugu. Izan ere, kontratu guztien artean %3,9a dira aldizkako finkoak Hego Euskal Herrian, urtebetean 1,5 puntu proportzional egin du gora kontratu mota honek, pasa den urtean %2,4 baitziren aldizkako finkoak. Emakumeen artean, aldizkako prekarioak gehiago dira, %5,2a baitira aldizkako finkoak, gizonezkoen artean %2,7a diren bitartean.

Jardunaldi partzialei dagokienean, 4 emakumetik bat jardunaldi partzialean dagoela nabarmendu behar dugu, emakumeen kontratuen artean %25,8a baita jardunaldi partzialekoa. Gizonen kasuan, partzialtasuna nabarmen baxuagoa da (%11).

Langabeziak behera egin duen arren, enpleguaren kalitateak okertzen jarraitzen du, emakumeak izanik prekaritatearen adierazleetan presentzia handiagoa dutenak (aldizkako finkoak, jardunaldi partzialean…).

Afiliazio datu historikoak izan ditugu apirilean, inoizko afiliazio kopuru altuena baitago (milioi batetik gora Hego Euskal Herrian). Jardueraren araberako afiliazioa aztertuz, zerbitzuen sektoreak inoizko afiliaziorik altuena izan du, azken urteetako etengabeko gorakadari jarraituz. Apirilean, afiliazioaren %73,20a zerbitzuak sektoreari zegokion. Azken hilabeteetan salatzen ari garen bezala, zerbitzuak erdigunean dituen ekonomia ereduak indarra hartzen jarraitzen du, ehun ekonomikoa ahulduz edota langileon lan zein bizi baldintza prekarioak nagusitzen diren sektorea ekonomiaren motorra bilakatzeko urratsak ematen jarraituz.

Maiatzaren 1ean aldarrikatu bezala, langileen lan eta bizi baldintza duinak bermatzeko lanean jarraituko dugu, esparru guztietan kapitalari boterea lehiatuz.

Zornotzako Forging-eko beharginek lan osasuna bermatzeko neurriak eskatu dituzte

Zubiate(e)ko Aritz
-
0
Zornotzako Forging-eko beharginek lan osasuna bermatzeko neurriak eskatu dituzte

Langilek kontzentrazioa egin dute gaur enpresaren aurrean apirilaren 28an, Laneko Segurtasun eta Osasunaren Mundu Egunean, enpresan izandako istripua salatzeko.

Ostiralean, langile bat larri zauritu zen, segurtasun-neurriek huts egin zutelako. Pieza batek jo egin zuen eta ospitalera eraman behar izan zuten urgentziaz. Hilaren 28koa ez da bakarra izan; izan ere, aste horretan bertan garabi batek zeraman eduki guztia lurrera erori zen istripu handi bat eraginez, baina zorionez ez zen zauriturik egon.

Enpresako langileek neurri zehatz eta eraginkorrak eskatu dizkiote zuzendaritzari istripuak saihesteko. Enpresako komitea, kontzentrazioaren ondoren, enpresarekin eta Osalanekin bildu da, gaia aztertzeko.

Salatu dugu Elgorriagako bainuetxeak sindikatuaren hauteskunde zerrendako lehen hautagaia kaleratu duela, askatasun sindikala urratzeko asmoz

Zubiate(e)ko Aritz
-
0
Salatu dugu Elgorriagako bainuetxeak sindikatuaren hauteskunde zerrendako lehen hautagaia kaleratu duela, askatasun sindikala urratzeko asmoz

LAB sindikatuak gogor salatu du Elgorriagako bainuetxeko hauteskunde zerrenda aurkeztu eta bi egunera hautagaitzan lehenbiziko zihoan langilea kaleratu duela enpresak, bai eta zerrendako gainontzeko langileak mehatxatu ere. LABek enpresari exijitzen dio berriz har dezala langilea, berehala, eta langile ororen antolatzeko eskubidea errespetatzearen aldeko defentsan tinko jarraituko duela berresten du.

Pasa den apirilaren 24an Elgorriagako bainuetxean hauteskunde sindikalak egiteko aurreabisua sartu zuen LAB sindikatuak. Horretaz gain, hauteskunde sindikaletan aurkeztuko zuen zerrendaren berri eman zion enpresako zuzendaritzari, hautagaitza orria aurkeztuz. Bada, aurreabisua sartu eta hautagaitza orria aurkeztu den momentutik enpresaren jarrera hagitz erasokorra izan da, eta erabaki larriak hartu ditu.

Izan ere, hautagaitza aurkeztu eta bi egunera, zerrendan zihoan lehenengo hautagaia lanetik kaleratu du enpresak. Horretaz gain, Elgorriagako bainuetxeko zuzendaritza zerrendan aurkezturiko langileak deituz joan da, sindikatuarekiko mesfidantza hedatu eta langileak mehatxatzeko asmoz. Horrek guztiak helburu argi bat du: enpresaren begiko ez den edozein hautagaitza oztopatzea, langile ororen askatasun sindikala urratuz.

Honengatik guztiagatik, LAB sindikatuak gogor salatu nahi du Elgorriagako bainuetxearen jarrera. Tamalez, ez da jarrera berria eta garbi frogatzen du bertan ekintza sindikala oso beharrezkoa dela. LABek ez du inolako kaleratze, mehatxu eta jokabide maltzurrik onartuko, eta Elgorriagako bainuetxeari exijitzen dio kaleratutako langilea berehala berriz har dezala eta hauteskunde prozesua normaltasunez eraman dezala.

Iraingarria da Osakidetzak bere langileak hain gaizki tratatzea

Zubiate(e)ko Aritz
-
0
Iraingarria da Osakidetzak bere langileak hain gaizki tratatzea

Osakidetzako zuzendaritzak 2020-2021-2022 eta egonkortze LEParen azterketen datak argitaratu ditu. Daten aukeratze hau aurreikuspen eta langileekiko errespetu faltaren ondorio da, egungo zuzendaritzak egiten dituen prozesu guztietan erakusten duena. Azterketa ugari uztailean zehar egingo dira. Horrela, milaka pertsonak bi hilabete baino ez dituzte izango hauta probak prestatzeko.

Osakidetzako zuzendaritzari ez zaio nahikoa baldarkeria iruditzen LEP bat deitzea aurrekoaren emaitzak izan gabe. Sagarduik behin-behineko emaitzak argitaratzeko aukera nahikotzat jotzea beste irain bat da langileontzat. Ziurtasunak behar dira erabaki garrantzitsuak hartzeko, hala nola LEP batera aurkeztea edo ez aurkeztea. Behin-behineko zerrendei errekurtsoa jar dakieke eta ez dute ezer konpontzen.

Langileei eta hiritarrei ezartzen zaien eta mespretxu iraunkorreko egoera larriagotzen duen iragarpen propagandistiko baten aurrean gaude berriro ere.

Oporrak apirila amaitu aurretik planifikatzeko exijitu die Osakidetzak langileei. Orain, langileei oporrak planifikatzera behartu ondoren, milaka pertsonaren oporrak (aurretik hartutako hegaldiak eta erreserbak) arriskuan jartzen ari da. Lantokietako zuzendaritzek egunero jasanarazten diguten amesgaiztoa ahazteko eta lana eta gure bizitza pertsonala uztartzeko ditugun aukera guztiak bertan behera uzten dituzte horrelako LEP bat antolatzen dutenean.

Aurreko LEPa filtrazioena izan bazen, oraingoan egon daitezkeenak baztertu gabe, kaosaren LEPa bezala nabarmentzen ari da hau.

Onartezina da Osakidetzan enplegua lortu nahi duten langileen eta gizartearen bizkarretan deskargatzea zuzendaritzaren ezgaitasun eta mespretxu guztia. Maiatzean deitutako grebak gero eta justifikatuagoak daude, eta agerian uzten du Osakidetzan lan egiten dugun pertsonon alternatiba eza, lan harremanei dagokienean, ahal duen guztietan gure aurka egiten duen zuzendaritza baten aurrean.

Arabako etxez etxeko laguntzako zerbitzuaren hitzarmenak prekarizazioan sakontzea baino ez dakar

Zubiate(e)ko Aritz
-
0
Arabako etxez etxeko laguntzako zerbitzuaren hitzarmenak prekarizazioan sakontzea baino ez dakar

Gaur ALHAOn argitaratu da Arabako etxez etxeko laguntzako zerbitzuaren eraginkortasun mugatuko hitzarmena, joan den martxoan CCOOk eta AESAD patronalak sinatua. LABek arduragabekeria leporatu die sinatzaileei.

Oso larria da eraginkortasun mugatuko akordio bat sinatzea; izan ere, CCOOk hitzarmenaren indarraldiaren KPIa ziurtatzen ez duen akordioa itxi du patronalarekin. Benetan larria da sindikatu horrek akordio hori bermatzea, baldin eta akordio horren soldata-igoerak ez badu bermatzen sektoreko langileen erosteko ahalmena. Sinadura Arabako etxez etxeko laguntzako zerbitzuko langileen aurkako erasoa da, eta Comisiones Obreras jotzen dugu sektoreko langileen pobretzearen eta prekarizazioaren erantzuletzat.

Hitzarmen honek, erosteko ahalmena ez bermatzeaz gain, ez du jasotzen urteko gehieneko lanaldi murrizketarik hitzarmenaren indarraldiko 5 urteetan, ezta sektoreko langileen lan-baldintzak eta, beraz, bizi-baldintzak hobetuko dituen beste funtsezko gizarte-alderdirik ere.

Azkenik, LABek etxez etxeko laguntzako zerbitzuko langileak langile publikoak direla defendatzen jarraituko du. Horregatik, sektoreko langile guztiei dei egin diegu aktiboki jarrai dezaten sindikatuak zaintza lanen pribatizazioaren aurka eta gizarte-zerbitzu eta zaintza-lan guztien publikotasunaren defentsan hasitako bidean.

Salatu dugu Nafarroako Gobernuko Osasun Departamentuak fundazio pribatu baten esku utzi duela osasun ikerketa publikoaren kudeaketa

Zubiate(e)ko Aritz
-
0
Salatu dugu Nafarroako Gobernuko Osasun Departamentuak fundazio pribatu baten esku utzi duela osasun ikerketa publikoaren kudeaketa

Sindikatuari bidalitako salaketa anonimo batek azken akordioen berri eman zion LABi. Akordio horren helburua litzateke, Osasun Departamentuaren mendeko Nafarroako Ospitale Unibertsitarioko (HUN) gerentziak abalatuta, entsegu klinikoak Navarrabiomed – FundaciĂłn Miguel Servet ikerketa-tresna publikoak kudeatzeari utz diezaion, eta IdiSNAren esku geratu dadin; IdiSNAk Opus Deiren parte-hartze pribatua du. Salatu dugu erabaki politiko horrek arriskuan jartzen dituela Navarrabiomed – Miguel Servet Fundazioaren bideragarritasun ekonomikoa eta ikerketa publikoaren sustapena Nafarroako sektore biomedikoan.

Beraz, Nafarroako Gobernuari eskatzen diogu atzera egin dezala pribatizazio asmoetan, eta konpromisoa har dezala soilik publikoa den ikerketa eta eredu institutu batekin.

LABek gaiari buruz osatu duen txostena hemen irakur daiteke:

20230503-LAB-NavarraBiomed-dosierra-EUSKDeskargatu

Egun, Nafarroan gizakiengan egiten diren sendagaien entsegu klinikoak eta ikerketa proiektuak erakunde publiko baten bidez egiten dira: Navarrabiomed – Miguel Servet Fundazioa. LAB sindikatuaren iritziz, ezin da bestela izan. Entsegu eta ikerketa proiektu horien helburu bakarra pazienteen osasuna da, herritar guztion onura, pertsona batzuen itxaropen bakarra tratamendu esperimentaletan eta osasungintza publikoaren ezagutzak eta gaitasunak hobetzean datzalako.

Nafarroako Gobernuko Osasun Departamentuak, ordea, eredu publiko hori hautsi nahi du. Bere helburua da entsegu klinikoak, sendagaien probak eta ikerketa proiektuetarako laguntzak ez bideratzea erakunde publikoen bitartez, baizik eta fundazio pribatu baten bidez, IdiSNAren bidez, non Opus Deiren Klinika Unibertsitarioa sartzen den.

LAB sindikatuak, Klinika Unibertsitarioaren ustezko interes filantropikoak baloratzen hasi gabe, uste du inork ezin duela zalantzan jarri erakunde horrek eredua baldintzatzen duten interes ekonomikoak dituela, eta onartezina dela salatzen ari garen gai delikatu honetan sartzea.

Carlos III.a Osasun Institutuak, estatu mailako osasun ikerketako institutuak egiaztatzen dituenak, LAB sindikatuak bezala pentsatzen du. Izan ere, Nafarroaren akreditazioa etenda dago egun, berregiaztatu gabe, hain zuzen ere arlo publikotik kanpoko erakundeen integrazioagatik.

Nafarroako Gobernuak badaki Navarrabiomed – Miguel Servet Fundazioa erabat gai dela ikerketa institutu publiko gisa akreditatzeko. Hala, salatu dugu du IdiSNAren errehabilitazioa Carlos III.a Osasun Institutuaren begien aurrean bilatzeko lege aldetik zalantzazkoa den plan bat dagoela.

Ildo horretan, Nafarroako Parlamenturako hauteskundeen atarian, alderdi politikoei konpromiso irmoa eskatzen diegu Navarrabiomed – Miguel Servet Fundazioak ikerketa publikoan bere lana egiten jarrai dezan. Ondorioz, fundazio publikoak har dezala bere gain IdiSNAren kudeaketa esklusiboa, ikerketa institutu erabat publikoa izan dadin.

Gainera, sindikatu honek badaki langileei presioa egin zaiela (gure zerbitzu juridikoak aztertzen ari dira jazarpentzat jo ote daitezkeen) Miguel Servet Fundazioko langile publikoek IdiSNAren izenean lan egin eta fakturatzeko. Ikerketa osoa arlo publikotik egiten bada, ezin da beste modu batera egiten dela itxuratu, fundazio pribatu baten bidez. Jarduteko beste modu bat ez da zuzena, ez ikuspegi etikotik, ez lan-ikuspegitik.

LAB sindikatuak badaki presa dutela, lanen lekualdaketa hori 2023ko ekaina baino lehen egitea nahi dutela. Baina maniobra hau guztiz onartezina da. LABek bere esku duen guztia eginen du osasun publikoa pribatizatzeko estrategian urrats berri hori gelditzeko eta, gizakiengan egiten diren sendagaien entseguak bezain delikatua den horrek guztion osasuna hobetzea ez den beste edozein helburu izan ez dezan bermatzeko.

Osasun Departamentuak bere asmoak burutuz gero, Navarrabiomed – Miguel Servet Fundazioa oso kaltetuta geldituko da, eta zalantzan jarriko du bere bideragarritasuna eta, beraz, Nafarroako sektore biomedikoko ikerketa publikoarena.

Aniztasun funtzionalaren sektoreko hainbat enpresatako beharginek bi greba-egun deitu dituzte, hitzarmenen blokeoa dela-eta

Zubiate(e)ko Aritz
-
0
Aniztasun funtzionalaren sektoreko hainbat enpresatako beharginek bi greba-egun deitu dituzte, hitzarmenen blokeoa dela-eta

Gaude (LAB), Madres Mercedarias (LAB-ESK), ASPACE (ELA) eta Gorabideko (LAB-ELA-ESK) enpresa batzordeek greba deitu dute eta elkarrekin kalera aterako dira maiatzaren 8an eta 9an, beren enpresa hitzarmenak eguneratzeko negoziazioen desblokeoa eskatzeko asmoz. Gutxienez KPIa eta metatutako atzerapenak aitortu diezaieten exigitzen dute.

Denek eskaintzen diete zerbitzu publikoa aniztasun funtzionala duten pertsonei. Zerbitzu horiek Euskadiko Gizarte Zerbitzuen Legean jasota daude, eta Bizkaiko Foru Aldundia da horien arduraduna. Gaur egun, zerbitzua erakunde pribatuek kudeatzen dute, Bizkaiko Aldundiarekin egindako hitzarmenak eta dirulaguntzak tarteko.

“Pandemian funtsezko langiletzat hartu gintuzten, baina gaur egun Gaude, Gorabide, ASPACE eta Madres Mercedarias erakundeek, Bizkaiko Aldundiarekin batera, gure enpresa-hitzarmenen negoziazioa blokeatu dute eta gure lanpostuak mehatxatu ere egiten dituzte, Madre Mercedariasen kasuan bezala”, azaldu dute.

Tantaz tanta, Gaude, Gorabide, ASPACE eta Madres Mercedarias enpresetako langileek marea bat sortu nahi dute, egoeraren arduradunei honako hau adierazteko:

– Bizkaiko Foru Aldundia eta haren arduradun gorena, Unai Rementeria, gure lan-baldintzen okertzearen erantzule egiten ditugu, eta zuzenean Elixabete Etxanobe ordezkoa eta Sergio Murillo, Gizarte Ekintza Saileko arduradun goren gisa, interpelatzen ditugu.

– Gaude, Gorabide, ASPACE eta Madres Mercedarias enpresei erantzukizuna beren gain hartzeko eta gure enpresa-hitzarmenak desblokeatzeko eskatzen diegu.

Egoera honen aurrean, marea osatzen dutenek beren borrokak batu dituzte eta maiatzaren 8an eta 9an greba deitu dute elkarrekin, eta batuta aterako dira kalera. Hona hemen baterako mobilizazioak:

  • Maiatzaren 8an.
    Bilboko hainbat lekutatiklau bloketan aterako dira, 12:00etan Moyua plazan elkartu eta Bizkaiko Foru Aldundira elkarrekin joateko manifestazioa egiteko.

    Lau blokeak honako hauek dira:
    – GORABIDE 10:00etan EITBren egoitzatik
    – GAUDE 11:00etan Bilboko udaletxetik
    – ASPACE 10:30ean Aspacetik (Julio Urquijo, 17)
    – MESEDEETAKO AMAK 11:00etan EDE Fundaziotik (Simon Bolivar, 8)
  • Maiatzaren 9an
    Elkarretaratzea 10: 00etan Itsas Museoaren aurrean, protesta FEVASera eramateko. Gainera, borroka bateratuko bi egun horiez gain, batzordeen mobilizazio propioak egingo dituzte: – GORABIDEk grebak egingo ditu maiatzaren 6tik 14ra
    – GAUDEk hilaren 22tik aurrera greba mugagabea deitu du.
    – MADRES MERCEDARIASek greba berriak planteatuko ditu itxieraren mehatxuak bere horretan jarraituz gero
    – ASPACEk egungo blokeoaren aurrean greba-egun gehiago egitea ere baloratu du.

    Amaitzeko, mobilizazioak babesteko deia egin nahi izan diote jendarteari, eta argi utzi nahi izan dute borrokan eta mobilizatzen jarraituko dutela hitzarmenak desblokeatu arte.
1...235236237...1,583Page 236 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLĂŤTICA DE PRIVACIDAD

www.lab.eus