LAB, ELA, UGT, ESK, STEILAS, CGT/LKN, CNT, EHNE, HIRU eta Etxalde sindikatuok elkarretaratzea egin dugu Bilbon, euskal presoen eskubideen alde. Sare erakundearen Izan Bidea ekimenaren baitan egin dugu mobilizazioa, Plaza Eliptikoan, eta LABeko idazkari nagusi Garbiñe Aranburuk hartu du hitza. Presoen egoerari heltzea eta konponbide bat ematea premiazkoa dela adierazi du, eta Espainiako Gobernuari salbuespenezko espetxe politikarekin amaitzeko exijitu dio.
Garbiñe Aranbururen hitzetan, «presoen eskubideen alde bildu gara, bizirik, osasuntsu eta etxean nahi ditugulako. Etorri gara honera preso politikoei aplikatzen zaien salbuespenezko espetxe politika kritikatzera, erabat ankerra delako, erabat krudela delako. Espetxe politika horrek gaixotu eta heriotzera eramaten ditu presoak, Igor Gonzalezen kasuan ikusi dugun bezala».
LABeko idazkari nagusiak gogora ekarri du espetxe politika anker honen ondorioz 20 preso hil egin direla espetxeetan, beste 13 preso gaixorik eta erabateko askatasuna berreskuratu gabe hil egin direla eta 16 pertsona zendu direla sakabanaketa politikak eraildak: «Bada momentua konponbideak eskatzeko, eta konponbidean erantzukizun zuzena du Espainiako Gobernuak. Horregatik, Espainiako Gobernuari dei zuzen eta argi bat egiten diogu: denborarik galdu gabe, indarrean dagoen salbuespenezko espetxe politika bertan behera utz dezala».
Bada garaia urrats sendoak emateko, eta, zentzu horretan, LABek presoen eskubideen aldeko mobilizazio desberdinak babesten jarraituko duela berretsi du Garbiñe Aranburuk. Hurrengo mugarria Baiona izango dela adierazi du, Bake Artisauek biharko egindako deialdia dela eta (14:30ean, Baionako Subprefekturan).