LABek antolatuta jardunaldia egin da Donostian, langileon ikuspegitik Euskal Herriko esne sektorearen egoera aztertzeko eta etorkizunaz hausnartzeko. Sektorearen egoera eta lan baldintzak bere osotasunean aztertu nahi izan dira, langile ikuspegi ahalik eta zabalena jasotzeko nahiarekin. Horregatik, eremu ezberdinetako ordezkariek hartu dute parte: esnea ontziratzen duten langileak, baserritarrak eta esnea garraiatzen duten garraiolariak, besteak beste.
Esne sektorean lanean dabiltzan arlo ezberdinetako langileak elkarri bizkarra emanda ari dira, bakoitza berean. Ekimen honekin elkarren berri izatea bilatu du LABek, elkar ulertzea eta harremanetan sakontzea alegia, guztion lan baldintzak era berean hobetu eta sektorearen etorkizuna bermatzeko.
Jardunaldia aukera bikaina izan da gogoeta eta ikuspegi ezberdinak mahai beraren bueltan partekatzeko. LABetik ondorio nagusi bat atera dugu: ez da egia langile batzuren lan baldintzetan hobera egiteko beste batzuk kaltetu behar direnik. Baieztapen maltzur hori uxatzearekin batera, arduraz jokatuz, langileon elkartasunean sakontzea eta sektorearen etorkizuna bermatzea biak bateragarriak direla argi geratu da gaurkoan. Bateragarriak ez ezik, beharrezkoak ere bai.