Gaur, martxoak 28, Zumarragako Ospitalean elkarretaratzea egin du LABek EAJko Gobernuak enplegu suntsiketen inguruan daraman politika murriztatzailea salatzeko. LAB sindikatuak martxoaren 6an Donostiako Ospitalean, enplegu suntsiketaren aurka abiatutako dinamikari jarraipena eman dio gaurko ekimenak. Datozen asteetan dinamika EAEko beste ospital eta osasungintzako lan zentruetan zabalduko da.
PPren Gobernuak Madriletik aginduta, bere garaian PSEk eta orain EAJk, ezarritako neurriekin azken urte hauetan EAEko sektore publikoan lanpostu galera narbarmena ari da ematen. Bereziki salatu nahi dugu Estatuaren nagusitasun konpetentziala aitzakitzat hartuta, EAJren Gobernuak inongo oztoporik jarri ez izana Madrilen hartzen ari diren neurrien aplikazioari. Izan ere, kasu askotan, ez gara bertako arduradun instituzionalen “nahi eta ezin” batez ari; Madrilgo eta Gasteizko agintariek administrazio publikoan konpartitzen duten proiektuaz baizik.
Osakidetzari dagokionez, bertan aplikatutako neurri murriztatzaile ezberdinak hauek dira: aurrekontuetan osasun publikora bideratutako dirua gutxitzea, aldi baterako ezintasun egoeran dauden langileen ordezkapen irizpideak zorroztu izana, bajak %100 ez ordaintzea; norberaren kontuetarako baimenean eta “canosoak” deritzan baimenean murrizketak, eta noski, langileeei lanaldia dekretuz 1.614,5 orduetara luzatzea. Bestetik, orain dela gutxi Osakidetzak eta SMEk sinatu dute jubilazio adina 67 urte arte atzeratzeko aukera jasotzen duen akordioa, eta horrek ere langile ebentualen kontratazioa gutxitzea ekarriko du, batez ere mediku gazteena. Osakidetzan 2012ko urtarriletik 2013ko azarora bitartean, 2906 kontratazio gutxiago egin dira, lanaldi osok 3437 kontratu gutxiago, eta horren aurrean, kontratazio partzialak ugarituz lanpostu galera adieraziko luketen datuak mozorrotzen dituzte. Hilean 600 kontratazio gutxiago (galdu diren gehienak lanaldi osokoak) egiten dira bataz beste. Osakidetzan, azken hamarkada honetan ezagututako enplegu suntsiketarik haundiena eman da.
Osakidetzako Mahai sektorialean behin eta berriro aldarrikatu dugu: Osakidetzak eta EAJ murrizketak gauzatzeari eta lanaldia luzatzeari uzten ez badiote, LAB sindikatuak ez du negoziatzeko aukerarik ikusten. Beraz, eskenatoki honetan LAB sindikatuarentzat ezinbestekoa da Osakidetzan enplegua publikoaren defentsa eta enplegu publikoaren sorrera.
Osakidetzan enpleguaren aldeko salaketa eta borroka egitea ezinbestekoa da. Eta LABek martxoan enpleguaren aldeko bi ekimen burutuko ditugu eremu honetan:
Bata, 2013 urtean suntsitutako 2906 enpleguen salaketa irudikatzea, ospitale eta lan zentroetan egiten ari garen mobilizazien bidez. Gaurkoaren moduko protestak hor kokatzen dira. Bestea, lanaldiaren luzapena saltzeko abiatuko dugun ekimena. Osakidetzako langile bakoitzari inposatutako 1614,5 orduko lanaldi luzapenaren aurrean, aukera emango zaiei langileoi Osakidetzako Zuzendaritzaren aurrean desadostasuna azaltzeko, idatzi baten bidez, zuzendaritzari jakinaraziz langilearen desadostasuna.
«Azken hamar urtean ezagututako suntsiketarik handiena da: 2012ko urtarriletik 2013ko azarora 2900 lanpostutik gora suntsitu ziren»