Hizkuntza Eskubideak Bermatzeko Protokoloa sinatu du gaur LABeko idazkari nagusiak, Donostiako Miramar jauregian, euskal gehiengo sindikalaren ordezkariekin batera, Kontseiluaren ekimenez. Euskal Herrian euskaraz bizitzeko eta lan egiteko eskubidea aldarrikatu dute sindikatuek agerraldian, eta protokoloa praktikara eramateko konpromisoa erakutsi dute.
Garbiñe Aranburuk adierazi du protokoloarekin bat egiteko konpromisoak sindikatuaren Biltzar Nagusian erabakitakoaren ildoan doazela: "Lan mundua euskalduntzen jarraitzea izango da gure lan ildoetako bat eta instituzioei horretarako erabaki politikoak har ditzaten exijitzen jarraitzea, hori guztia ekintza sindikalaren bitartez”. Hizkuntza-politika ausart eta burujabeak aldarrikatu ditu, eta protokoloa sinatu aurreko hitzartzean garbi utzi du: "Euskaraz lan egiteko eskubidea dugu langileok".