Greba eguna deituta dago Frantziako Estatuan, Macronen Gobernuak pandemia egoera dela-eta hartutako neurriek dituzten ondorioak salatzeko; enpleguan, soldatetan, babes sozialean zein lan eta bizi baldintzetan eragindakoak. Sistemaren eraso berri honen aurrean, LABek argi du inoiz baino beharrezkoagoa dela Ipar Euskal Herrian bertan erabakitzea; tokiko negoziazio mahai bat sortzea, lurraldeko eragileekin benetako tokiko alternatibak eraikitzeko. Halaxe aldarrikatu dugu Baionako kaleetan, Lapurdiko hiriburuan deitutako mobilizazio bateratuan, non hainbat sektoretako langileak bildu diren: osasungintza, irakaskuntza, kultura eta funtzio publikokoak, besteren artean.
Hain zuzen ere, manifestazioan berretsi dugu egiazko arazoa ez dela koronabirusa, baizik eta Gobernu desberdinen hautuek eta erreformek egun behar ditugun zerbitzu publikoak suntsitu dituztela. Zerbitzu publiko indartsuak behar ditugu.
Eredu sozial eta ekonomiko zuzenago bat birpentsatu behar dugu, aberastasuna eta lana partekatuz, denok duintasunez eta osasun onean bizi ahal izateko. Beraien krisia ez dugulako ordainduko, LABetik lege berri bat proposatzen dugu justizia sozialean oinarritua, gure bizitza erdigunean jarriz.
Hauek dira gure aldarriak:
-Ikasle-estatutu erreala, gazteenei beren ikasketak jarraitzeko aukera emango diena, haiek diruztatzeko lanik egin gabe.
-Aberastasunaren eta lanaren banatzea, enplegu duina eta guztientzako gutxieneko diru-sarrera bermatzeko.
-Ohe irekitzeak ospitale publikoetan, eta osasunaren Segur berri bat, medikuntzako eta sozial arloko soldatapekoak integratuz.
-Hezkuntzan aurreikusitako lanpostuen ezabaketen ezeztatzea, eta soldaten eta baliabide errealen balioa handitzea hezkuntzako langile guztientzat.
-Lan baldintza duinak eta bermeak sektore pribatuko enpresetako langile guztientzat, batez ere enpresa txikietako langileentzat.