2026-02-12
Blog Page 865

Batzarrera deitu dugu, Nafarroako Esku Hartze Sozialeko hitzarmen sektorial duin bat borrokatzeko

admin
-
0
Batzarrera deitu dugu, Nafarroako Esku Hartze Sozialeko hitzarmen sektorial duin bat borrokatzeko

Hitzarmen sektorial duina lortze aldera, ezinbestekoa da antolakuntza eta borroka. Lehenengo pausu bezala, asanblada bat martxan jarriko dugu sektoreko afiliatu eta delegatu barne biltzen duena. Hurrengo azaroaren 30an, osteguna, goizeko 10:00etatik 11:30tara, Errotxapean LABek duen egoitzan biltzera deia luzatu dugu.

LAB sindikatutik, bi urte daramagu Nafarroako lehen Esku Hartze Sozialeko hitzarmen sektorialaren alde lan egiten.

Esku Hartze Sozialeko sektoreak, historikoki abondono handia pairatu du. Gobernu ezberdinek aurrera eraman dituzten politika neoliberalen ondorioz eta inposaturiko diskriminazio sexistarengatik, langile gehienak emakumeak direlako, lanbidea behar bezala ez baloratuz eta gure eginkizunaren garrantzia aitortzen ez delarik.

Helburua hitzarmen honekin sektore guztiaren lan baldintzak hobetzea da. Gainera Gobernua eta eremu sozial, sanitario eta soziosanitarioko entitate ezberdinen arteko kontratu administratibo guztiak arautuko dituen Kontzertu Sozialen Lege berria baliatuz, erreferentziazko konbenioak derrigorrez betetzera behartuko du, gure kasuan, lortzen dugunean, Esku Hartzeko Sozialeko hitzarmen izango delarik.

Konbenioak eragingo dituen anbitoak
Honako eremu hauek izango dira hitzarmen honen eraginpekoak: Gizarte-ekintzaren eremuak, gizarte eta lan-arloko eremua edo gizarte eta osasun-arloko eremua, baita gizarte eta kultura-arloko eremua eta gizarte-hezkuntzako eremua ere, hala nola sortutako gaixotasun mentala ere.

Konbenioak eremu hauetan lan egiten duten langileei eragingo die: arriskuan edo babesgabetasunean dauden kolektiboak, adintxikikoak, emakumeak, pertsona adinduak eta aniztasun funtzionalekoak, helduak, baztertze egoeran edo arriskuan dagoen populazioa.

Zer eskatu behar dugu?
Mahai negoziatzailean gure aldarrikapenak hurrengo hauek izango dira:

Soldatak: Egiten dugun lanaren garrantzia aitortzen duen soldata igoera.

Lanaldia: Urteko lanaldia jeisten joatea. 1592 urteko lanaldia eta 1424 orduko lanaldia txandaka egiten dutenentzat.

Plusak: Gauekotasuna, turnizitatea, aintzinatasuna eta guardiak. Hala nola jai egun, jai egun bereziak, igandeak eta dedikazio osoak.

Oporrak: Lanaldiaren murrizketarekin bat datorren oporren igoera.

KPI: Eros ahalmenaren berreskuratzeko eskubidea, bizitza garestitu egiten denean.

Bajak: %100 ordaintzea gaisotasun arruntetan zein laboraletan.

Kotratazioa: Kontratazio finkoa bermatzeko konpromezua, enplegua egonkortzeko.

Kilometraia: Kotxea lanerako erabilera ordaintzea.

Exzedentziak eta baimenak: Lan eskubideak babestu, bizitza laborala, pertsonala eta zaintza babesten dituzten baimenak izatea. Fomakuntza profesionala eta edozein egoera delarik bermatzen dituzten baimenen aitortza.
 

 

 

Eusko Jaurlaritzaren Elikadurari buruzko plana aukera galdua da eskola-jangeletako ereduaren aldaketarantz bidea hasteko

admin
-
0
Oinarrizko txostenak, besteak beste Eusko Jaurlaritzaren inakzioagatik prezioak adosteagatik zigortu zituzten enpresekin landutakoak, zaildu egiten du euskola jangela publikoetako benetako aldaketa bisualizatzea. Egunotan Eusko Jaurlaritzak Elikadurari buruzko plana aurkeztu du. LABek oinarrizko dokumentu honen irakurketa eta azterketa egin ditu.

LAB elikaduraren inguruan ari da lanean, eskubide bezala, elikadura burujabetzatik planteatua eta jangeletan txertatzeko asmoarekin Eskubide Sozialen Kartan, bestelako eragile batzuekin, hala nola EHNE Bizkia, Etxalde, Bizilur eta bestelako sindikatuekin. Elikadura burujabetzaren printzipio honek ahalbidetu egiten dio herri bati bere elikadura ereduaren inguruan erabakitzea.

Gure Platera Gure Aukera plataformaren parte ere bagara, familia, ekoizle, Nekazal Garapeneko Agentzia, Mugarik Gabeko Albaitariak, sindikatuak eta bestelako eragileekin. Plataforma hau hausnarketa sakona egiten ari da jangelen egungo ereduak dakartzen oztopoen eta berau aldatzeko egingo beharreko aldaketen inguruan. Hobekuntza, 2000ko jangelen eredua amaitutzat emateko eskaritik abiatuta; zentruen autogestioa autonomía ezarriz, espazioari izaera hezitzailea aitortuz eta jangeletako langileei euren izaera hezitzailea aitortuz.

LABek ariketa propioa egin du, elikadura burujabetza, ereduaren berrikuntza eta lan-baldintzen eta euretatik eratorritako akordioak errebisioan oinarritzen dena.

Denok espero genuen mahai tekniko bat martxan jarri izana, 2016ko martxoaren 3an onartu zena, dauden proposamenak aztertu eta elkarrekin egindako dokumentu batean lanean hasteko.

Azterketa ezagutarazi aurretik, ezinbestekoa da testuinguruan jartzea. Jakin behar dugu zenbat eragile, aktore, elkarte, sindikatu ari den lanean, ezberdintasuna gaindituz, ideien ekarpenak eginez, proposamen zein manifestuak osatuz. Azken finena, aliantzak eraikiz.

Bilerak izan dira alderdi politikoekin. Administrazioarekin ere izan dugu harremana, mahai teknikoa behin baino gehiagotan martxan jartzea eskatuz. Baina ematen du guzti hau ez duela administrazioak kontuan hartu.
Argitaratutako txostena irakurrita zalantza sakonak sortzen zaizkigu. Hausnarketa hau testuaren lehen orrialdeen azterketan oinarritzen dugu. Bertan agertzen dira Eusko Jaurlaritzak berau osatzeko erabili dituen bazkideak, prezioak adosteagatik epaitutako katering enpresak, Eusko Jaurlaritzaren geldotasunari esker.

Txostenak lanerako ardatzak zehazteko asmoa du, garapenerako tarte txikia ere markatu arren. Adibidez,
berrikus daitezkeen pleguez hitz egiten du baina ingurumen eta sozial arloko klausulak txertatzeko aukera
barneratu gabe, hauei esker, elikagai ekologikoak, sasoikoak, bertokoa aurkitzeak erraztuko litzateke.

Zein da administrazio honen benetako asmoa? Zergatik ez da txostena osatzeko eragile sozialik deitu? LAB konbentzituta dago txosten hau Eusko Jaurlaritzaren estrategiaren baitan ulertu behar dela, jendarteak exijitzen duen benetako aldaketarantz benetako pausorik ez ematera bideratua.

Ziurrenik egun gutxiren buruan ikusiko dugu nola deitzen gaituen horrenbeste itxaron dugun mahai teknikora, berau hasi aurretik jangeletako benetako aldaketaren balizko garapena baldintzatzen duena. Gobernu honek oso argi utzi du, berriro ere, nortzuekin lan egin nahi duen, bere geldotasunari esker prezioak adosteagatik zigortu zituzten enpresekin.

Gainera, susmagarria den borondatezko ezgaitasuna erakusten du gure seme-alabentzako kalitatezko esparru bat sortzera bdieratutako benetako aldaketa integralari ekiteko. Berriz ere lepoa ematen dio jendarteari.

LABek jakinarazten du, deitua baldin bada, parte hartuko duela mahai teknikoan. Gainontzeko espazioetan egiten dugun bezala egingo dugu, konpromisoa erakutsi dugun erantzukizunarekiko, eraikuntzarena hain zuzen, hormen kolorea aukeratzeko boterea soilik utzi diguten arren

 

 

 

EAEko unibertsitatez kanpoko hezkuntza publikoko sukalde eta garbiketako langileek greba egingo dute ostegunean

admin
-
0
EAEko unibertsitatez kanpoko hezkuntza publikoko sukalde eta garbiketako langileek greba egingo dute ostegunean

EAEko unibertsitatez kanpoko hezkuntza publikoko sektore ezberdinak protestan ari dira joan den ikasturteaz geroztik, lan baldintzak hobetzeko aldarriarekin, LAB, ELA eta STEILAS sindikatuon ekimenez. Azaroan zehar sektore bat ariko da borrokan astero, eta sukalde eta garbiketako langileei egokituko zaie txanda egunotan, joan den astean Haurreskolak Partzuergoko langileei egokitu zitzaien bezala. Hala, sindikatuok agerraldi bat egin dugu gaur Bilbon, datozen egunetan egingo ditugun mobilizazioen berri emateko.

Hezkuntza publikoko sukalde eta garbiketako langileok mobilizazio eta greba dinamikan sartuta gaude iazko ikasturtetik.

Gure sektorea guztiz pribatizatzeko arrisku bizian dago. Azken urte luzeetan Eusko Jaurlaritzak Hezkuntza Sailean sukalde, jantoki eta garbiketa jarduerak etengabe pribatizatu ditu. Egun, gobernua sektorea hiltzen uzten ari da, epe motzean jarduera enpresa pribatuen eskuetara pasatzeko. Izan ere, sukalde, jantoki kolektiboetan eta garbiketan diharduten enpresek interes handia dute hezkuntza publikoan, langile publikook betetzen ditugun lanpostu eta jarduerok bere gain hartzeko.

Sektoreko azken hitzarmena 2009koa da. Ia 9 urte igaro dira orduz geroztik eta Hezkuntza Sailak sistematikoki ez du bete soldatez, ratioez, prestakuntzaz, langileez, euskalduntzeaz, lan osasunaz edota erretiro partzialaz sinatu zuen konpromisoa. Eta egun, egoera oso larrian gaude bai sukaldeko baita garbiketako langileak:

-Kontratu guztien %63 behin-behinekoak dira (400 langiletik gora).Sukaldarien artean %62 eta garbitzaileen artean %61.

-Egiturazko lanpostu ugarik ez dute %100eko jarduna eta aldiz, asteko 2.420 ordu inguru kasu gehienetan iruzurrezkoak diren “laguntza kontratu” bidez betetzen dira.

-“Laguntza kontratu” askotako jardunak erdia edo herena baino txikiagoak dira.

-Lan-kargak eta ardurak asko handitu dira eta kasu batzuetan, ratioak eta metrajeak ere ez dira betetzen, ez dira egungo errealitateari egokitzen.

-Ordezkapenak ez dira betetzen edo oso berandu betetzen dira.

-Kategoriak eta soldatak azken mailetakoak dira eta ardura handiko funtzioak bete behar izaten dira.

-%11tik gorako eros-ahalmen galera pairatu dugu. 2010 geroztik 16.000 eurotik gorako galera metatua (urteko soldata osoaren %73tik gorakoa).

-Euskalduntzeko plan eta baliabiderik ez da ezarri.

-Azpiegiturak zahartzen utzi dira eta ez da inbertsio eta berrikuntzarik egin. Eskola berrietan ez dago sukalderik.

-Erretiroa errazteko neurriak bertan bera utzi dizkigute.
Prestakuntza planik eta ekintzarik ez dago.

Hezkuntza Sailak inola ere ez dio erantzuten egoera larri honi. Izan dugun negoziazio mahai bakarrean, gure oinarrizko aldarrikapenek ez dute erantzunik jaso. Gobernuaren aldetik ez dago egungo plantillak egonkortzeko, handitzeko edo lan-kargak murrizteko inolako proposamenik. Ezta azken urte hauetan pairatu ditugun murrizketei buelta emateko planteamendurik.

Hau guztia azaleratu, salatu eta egoera larri honi irtenbidea exijituko dugu aste honetan zehar. Ekimen ezberdinak burutuko ditugu:

-Gaur gure egoeraren eta aldarrikapenen berri emateko prentsaurreko hau burutu dugu.

-Bihar, asteartea, sukaldarien aldarrikapenak eta sukaldeko tresnak zintzilikatuko ditugu ikastetxeetan.

-Asteazkenean, garbitzaileen aldarrikapenak eta garbiketa tresnak zintzilikatuko ditugu ikastetxeetan.

-Ostegunean, sektoreko greba burutuko dugu eta Hezkuntza ordezkaritzetan giza-kate, elkarretaratze, kazolada eta aldarrikapen lunch eta garbiketa burutuko ditugu.

Bilbon 11:30ean plaza Zirkularretik giza katea
Donostian 11:00ean Boulevarretik giza katea
Gasteizen 11:30ean Hezkuntzako delegazioan

Ostiralean, ohiko diren ikastetxeetako elkarretaratzeetan egingo dugu bat.

LAB eta ELAk Eusko Jaurlaritzari negoziazio mahaia deitu eta ondorengo aldarrikapenen inguruko negoziazio erreala abian jartzea eskatzen diogu:

-Onartezina den behin-behinekotasun maila murriztu.

-Sukaldetako ratioak eta garbitzeko metrajeak gutxitu eta egokitu.

-Ordezkapenak lehen egunetik bete.

-Lanpostu-Zerrandako lan postu guztiak lanaldi osokoak bihurtu eta egiturazko lanpostu guztiak Lanpostu-Zerrenda sartu.

-Langileek bete beharreko funtzioak zehaztu eta lan kategoriak aitortu

-Eroste ahalmena berreskuratu.

-Erretiroa errazteko neurri eta pizgarriak ezarri.

-Langileen prestakuntza eta euskalduntze planak gauzatu.

-Azpiegituretan inbertsioak egin, berritu edota sortu.

Sindikatuon ustez, ezinbestekoa da Eusko Jaurlaritza azken urte luzeetan inposatzen ari den murrizketak eta hezkuntza politika errotik aldatzea eta, honek guztiak eraginda, egungo hezkuntza publikoan sufritzen ari garen egoerari buelta ematea. Agerian utzi dugun Sukalde eta Garbiketako egoerari ere buelta emanez.

Eusko Jaurlaritzari Hezkuntza Saileko arduradunei eskatzen diegu, orain arteko jarrera aldatu eta egoera larri honi heldu eta irtenbidea emateko proposamen zehatzak mahai gainean jarriz, negoziatzeko borondatea ager dezala.

Honela ez bada, iazko ikasturtean egin dugun moduan, ikasturte hasiera honetan gauzatzen ari garen mobilizazioei jarraipena ematea beste biderik ez digu utziko. Ez dugu utziko sukalde eta garbiketa zerbitzuak guztiz pribatizatzen eta hitzarmen eta lan-baldintza duinen alde borrokatuko dugu.

Gurea ere hezkuntza delako!
 

 

 

Gipuzkoako Nagusien Kontseiluko parte hartzearen murrizketa salatzen dugu, kanpoan utzi baitituzte Jubilatu eta Pentsionisten Elkarteak

admin
-
0
Pasa den urriko 2017/17 dekretuak Gipuzkoako Adinekoen Kontseiluaren osaketa aldatzen du. Orain, 17 bokalia izango ditu, orain arte 23 izan dituen arren, 2013/21 dekretuaren ondoren. Kendu duten bokalietako bat Jubilatu eta Pentsionisten Elkarteei zegokien.

Salatu behar dugu Gipuzkoako elkarteen zati handi bat kanpoan uzten dela, besteak beste, jubilatu eta pentsionisten Elkarteen ordezkaritza. Ez da kasualitatea Gizarte Arretaren esparruan egungo Gipuzkoako Aldundia ezartzen ari den murrizketak salatzen eta nagusientzako bizi-baldintza duinak eskatzen ibili direnei (1.080 eurotako gutxieneko pentsioa, gero eta gehiago diren eta menpekotasun egoeran daudenentzako arreta duin eta egokia, osasun kopagoarekin amaitzea…) Kontseiluan duten ordezkaritza kendu nahi izatea, EAJ eta PSOEko ordezkari instituzionalek behin baino gehiagotan esan dietenean ezetz euren aldarrikapenei.

Kontseilutik kanpo utzi dituzte baita Gipuzkoako Alzeheimerra eta bestelako buru-gaixotasunak dituzten pertsonen familiarteko eta lagunen elkartea (AFAGI), Hurkoa Fundazioa, Aita Menni Fundazioa eta Nagusilaneko ordezkari bat.

Gipuzkoako udalerrien ordezkaritza ere txikitu egin dute. Orain arte 3 ordezkari zituzten. Donostikoa 1 eta beste bi gainontzeko udalena, 3.000 biztanletik beherako udalerrien ordezkari batekin eta zeinetan aniztasun politikoa errespetatu behar zen. Orain, EUDELeko ordezkari bakarrak ordezkatuko ditu.

LABetik ulertzen dugu partehartzeak ahalik eta zabalena izan behar duela. Ez dugu uste ona denik partehartzearen esparruan ere murrizketak egitea. Gure ustez ez da betetzen ari Zerbitzu Sozialen 96/5 Legea, zehazten duena “botere publikoek herritarren partehartze demokratikoa sustatuko dute…”. Hortaz, partehartzearen arloan emandako atzera pauso berri hau salatu beharrean gara.

Zoritxarrez legegintzaldi honetan konprobatzen ari gara nola ari diren Gipuzkoan partehartzeari eraso egiten eta mespretxatzen, eta soilik erabiltzen dute komunikabideei zuzendutako diskurtsoetarako, benetako errealitatea izkutatzen dutenak, aurrera egiteko inolako borondaterik ez dutela. Esparru guztietan ari dira ezartzen inposizio eta murrizketa politika, guztiok ordaintzen dugun propagandarekin isilarazi nahi dutena, benetan nahi dutena errealitatea izkutatzea delarik.

Errotiko norabide aldaketa exijitzen dugu, herritarren eta elkarteen benetako partehartzerako mekanismoak ezartzea eta era berean, herritarren borondatea errespetatzea. Horretarako, ezinbestekoa da kontsulta mekanismoa zehaztea Instituzioek gipuzkoarren borondatea ezagutu dezaten inposizioari eutsi beharrean. Horixe da ohikoa egun EAJ eta PSOEren esku dagoen Gipuzkoako Foru Gobernu honen jardueran.
 

 

 

LABen ordezkaritza bat Bartzelonan da Kataluniako herriari elkartasuna adierazten

admin
-
0
LABen ordezkaritza bat Bartzelonan da Kataluniako herriari elkartasuna adierazten

Gaur, Azaroak 11, LAB sindikatuko ordezkaritza bat Bartzelonan da Kataluniako herriari eta prozesu soberanistari elkartasuna adierazten, eta aldi berean herri bezala hartu duten bide honetan bakarrik ez daudela erakusten. Gaurko manifestazio hau Kataluniako gizarte zibilak askatasunaren astea deitutakoaren baitan kokatu behar da, eta preso politikoen askatasuna exijitzea eta autogobernuaren indargabetzea du helburu. Gogoratu Askatasunaren aste honen baitan asteazkenean greba orokorra egon zela eta greba honen jarraipenaren ondorioz Katalunia gelditzea lortu zela.

LAB sindikatutik garrantzitsua deritzogu Katalunian pairatzen ari diren egoera honetan haien ondoan egotea eta gure elkartasuna adieraztea, Euskal Herrian oinarrizko eskubideen urraketak egon zirenean Kataluniako herriak bere elkartasuna adierazi zuen bezala.

Baina LAB sindikatua ez dator hona soilik Kataluniako herriari bere elkartasuna adieraztera. Kataluniako herria jorratzen ari den bidetik ikasi eta erakusten ari den indarra zabalduz, Euskal Herrian ere bertze burujabetza fronte bat ireki nahi dugu; fronte bat, demokrazia, erabakitzeko eskubidea eta aldaketa soziala ekarriko dituena, hain zuzen ere.

Kataluniako herriak laguntza eta elkartasuna behar ditu, eta hori da gure rola. Euskal Herria zein Espainiako Estatuaren barnean gauden nazioek gure indar guztiekin tira egin eta ustelduta dagoen 78ko erregimen hau bertan behera gera dadin borrokatu behar dugu. Hori da, hain zuzen ere, guk Euskal Herrian egin nahi duguna.

Demokraziaren eta erabakitzeko eskubidearen alde egon gara eta egonen gara beti, eta ulertezina zaigu beste eragile batzuk inolako konplexurik eta lotsarik gabe hartutako jarrera. Hala nola funambulismo ariketa harrigarri batean gaur hemen Kataluniako preso politikoen atxiloketen aurkako manifestazioan daude, Euskal Herrian atxiloketa horiek eta 155. artikuluaren aplikazioa babesten dutenekin gobernu akordioak dituzten bitartean. Gure ustez, erabat kontraesankorra da. Edo demokraziaren, erabakitzeko eskubidearen alde zaude, edo 78. erregimenaren, demokrazia ezaren eta oinarrizko eskubideen urraketarekin bat egiten duzu. Ez dago erdibiderik eta bakoitzak non egon behar duen erabaki behar du.

Horregatik, LAB sindikatua orain arte hartu dituen konpromisoetan berresten da, eta bide honetan bere ekarpena egiten jarraitzeko asmoa adierazten du.
 

 

 

Gasteizko kaleetara eraman dugu “Jaietan denok jai” aldarria

admin
-
0
Gasteizko kaleetara eraman dugu “Jaietan denok jai” aldarria

"Lan duina, bizi duina" Ekimen Ibiltaria Gasteizen dago gaur, bigarren egunez. Atzoko jardueren ostean, gaur ere irten gara kalera. Hain zuzen ere, dendetatik ibili gara merkataritza sektoreko langileen lan baldintzak defendatzeko eta hauek pairatzen duten prekarietatea salatzeko.

Jai egunetan irekitzeak ez du enplegua sortzen, langileen lanaldia luzatu baino ez du egiten. Irekiera hauekin ezinezkoa da bizitza laborala familiarekin edo aisiarako denborarekin uztartzea.

Merkataritza gune handien onurako baino ez da. Merkataritza txikia kaltetu eta saltoki txikien itxieran eragiten du. Gehiegizko kontsumoa bultzatzen du. Ordutegi komertzialak jada nahiko zabalak dira erosketak egin ahal izateko.

Honengatik guztiagatik, erosleei ere egiten diegu dei jai egunetan ez erosteko, merkatari txikien itxieran eta egun hauetan lan egitera behartuak gauden langileen prekarietatean eragin zuzena baitu honek.

Hala, egoera honen berri eman dugu gaur Gasteizko kaleetan, "Lan duina, bizi duina" Ekimen Ibiltariaren harira. Gainontzeko sektoreek eta arazoek ere tartea izan dute gure jardueren artean, eta elkarretaratze bat egin dugu Posta plazan, lan duina eta bizi duina aldarrikatzeko.

Ekimen Ibiltariak astelehenean helduko dio berriro bideari, eta Araban jarraituko du beste egun batez. Hain justu, Oionen izango gara.
 

 

 

Gorka Berasategi: “Ezin da sektore publiko oso bat eraiki behin behinekotasuna ardatz izanda”

admin
-
0
Gorka Berasategi: “Ezin da sektore publiko oso bat eraiki behin behinekotasuna ardatz izanda”

LABek antolatutako “Lan duina, bizi duina” Ekimen Ibiltaria Gasteizera iritsi da gaur, urriaren 16tik hona prekarietatearen aurkako aldarria Euskal Herriko hainbat txokotan zabaldu eta gero. Zerbitzu publikoetan bizi den egoera salatzeko baliatu dugu gaurko eguna, Eusko Jaurlaritzaren egoitza nagusia Gasteizen dagoela kontutan hartuta. Hala, LABeko Zerbitzu Publikoetako Federazioko idazkari Gorka Berasategik ohartarazi du Eusko Jaurlaritzaren magalean dauden administrazioak prekarietatea eta behin behinekotasun gehien dutenak direla.

Berasategik azaldu du etengabe salatzen ari garen gauza bat dela prekarietatearen eta behin behinekotasunaren arazoa administrazioan, beste sindikatu batzuekin batera. “Adibide gisa, Irakaskuntzan %40koa da behin behinekotasuna eta Osakidetzako eremu batzuetan %50etik gorakoa da, egun bateko kontratuekin kasu batzuetan. Gure ustez, kalitatezko zerbitzu publiko bat bermatzeko langileek lan baldintza duinak izan behar dituzte. Ezin da sektore publiko oso bat eraiki behin behinekotasuna ardatz izanda”.

Deialdi publiko masiboak egin behar direla adierazi du LABeko ordezkariak; egonkortze deialdiak egon behar dutela, alegia. Era berean, murrizketak bertan behera geratzeko eskatu du, “Espainiako Estatutik etorri diren hainbat murrizketa Euskal Herrian inplementatu baitira azken urteetan. Borrokaren bitartez, galdutakoa berreskuratzen ari gara zenbait kasutan, baina Eusko Jaurlaritzaren eta EAJren estrategiaren menpe dauden instiutuzioetan ez dira murrizketa horiek berreskuratu”.

Esan bezala, hainbat mobilizazio eta jarduera egin ditugu goizean zehar Gasteizen, Ekimen Ibiltariaren barruan: ekintza sindikaleko tailer bat eta Arabako industrian enplegu duina aldarrikatzeko auto karabana, tartean.

Bihar ere Gasteizen izango da “Lan duina, bizi duina” dinamika. Hauxe da biharko egitaraua:

-12:00etan, Infogunea ezarriko dugu, Correos plazan.
-12:00etan, pikete informatiboak egingo ditugu dendaz denda, sektore feminizatuak eta prekarietatea ikusgarri egiteko.
-13:00etan, elkarretaratze bat egingo dugu, Correos plazan.

Ekimen Ibiltariak abenduaren 6a arte jarraituko du bere bidea, Durangoko helmugara iritsi arte, Euskal Herriko hainbat eta hainbat herri zehartu eta gero.
 

 

 

“Agur, hotz gehiegi egiten du hemen egoteko”

admin
-
0
“Agur, hotz gehiegi egiten du hemen egoteko”

LAB eta ELA sindikatuok elkarretaratze bat egin dugu gaur Urdulizko ospitalearen kanpoaldean, Osakidetzak garbitasun zerbitzuarekin izandako jarrera salatzeko. Bada, elkarretaratzea egiten genuen bitartean, ospitaleko zuzendari Maria Luz Marques Gonzalez irten da langileekin hitz egiteko, eta oso modu txarrean zuzendu zaiela kritikatu dute bertan bildutakoek. Irtenbiderik eman gabe alde egin du bertatik, "agur, hotz gehiegi egiten du hemen egoteko" esan eta gero.

Osakidetzak modu desegoki eta kontzientean hartu dituen erabakiek, 18 langile kaleratzea suposatu du. Gertatutakoa onartezina dela iritzita, Osakidetzari eta Limpiezas Villar enpresari exijitzen diegu 18 langile hauekiko arduraz jokatzea. Aldarrikapen horrekin egin dugu gaurko protesta.

Urdulizeko Ospitalean 2010eko Mahai Orokorreko konpromisoa ez betetzea (etorkizunean ireki beharreko osasun zentroetako langileak publikoak izatea, azpikontratatuak beharrean) Osakidetzak erabaki zuen. LAB eta ELA sindikatuok hasieratik exijitu genuen langile publiko bidezko zerbitzua eskaini beharko litzatekeela eta salaketa egin genuen kontrakoa egitera zihoazela jakitean. Osakidetzak hartutako erabaki horren ondotik, 18 langile aritu dira garbitasun zerbitzua azpikontratatuta eta Limpiezas Villarren bidez eskaintzen.

Azaroaren 1ean baina Limpiezas Villarrek kontratuak eten zien langile guztiei eta beraz, 18 langileak kalean dira langabe. Enpresa azpikontratatuaren justifikazioa izan da Osakidetzarekin zuen harremana eten dela Urdulizen eta ez die langileei bestelako proposamenik luzatu.

Egoera onartezina dela deritzogu. Osakidetzak berak hartutako erabaki okerrak 18 langileei ordainarazi nahi diete eta ez da inolaz bidezkoa. Horregatik, 18 langile hauen etorkizuna bermatzeko konpromisoak har ditzatela eskatzen diegu Osakidetzari eta Limpiezas Villarri.
 

 

 

Mobilizatzera deitu dugu, Ibon Iparragirre berehala askatzeko

admin
-
0
Oso larria da Ibon Iparragirreren euskal presoaren osasun-egoera. HIESaz gaixo eta ia defentsarik gabe, Kartzela Zaintzako Epaitegia atzeratzen ari da bera kaleratzeko agindua, Estatuak euskal preso politikoen kontra erakusten duen politika basati, krudel eta mendekuzkoaren erakusgarri.

LABek Iparragirre berehala askatzea exijitzen du, gaixorik dauden beste preso politikoekin batera. Aldarrikapen honek sindikatuen ia erabateko babesa du, uztailaren 5ean ELA, UGT, Steilas, ESK, Hiru, EHNE Konfederazioa eta Etxalde Mugimenduarekin batera eta Foro Sozialarekin eskutik egindako agerraldian adierazi genuen bezala: “Sindikatuok eskumena duten agintariei eskatzen diegu indarrean dagoen estatuko legedia eta nazioarteko estandar zorrotzenak aintzat har ditzatela gaixotasun sendaezin oso larriak dituzten presoak hirugarren graduan sailkatzeko eta espetxetik ateratzea ahalbidetzeko, arrazoi humanitarioak eta duintasun pertsonala direla eta”.

Bestalde, euskal presoak lehenbailehen kaleratzeko bidean jartzeko bidean ezinbesteko pausoa da hau.

LABek, Iparragirre zein gaixorik dauden beste presoen askatasuna eskatzeko mobilizatzera deitzen ditu langileak, herri presioa ezinbestekoa izango delako bide honetan. Jarraian dituzue astebururako deialdiak:

Gaur, ostirala:
IRUÑEA – Giza-katea (19.00 Santo Domingo) BILBO – Manifestazioa (20.00 Santutxu, Egunkaria plaza)

Bihar, larunbata:
BASAURI – Giza katea (12.00 kartzelatik)

Etzi, igandea:
DONOSTIA – Giza katea (13.30 Bretxa)
 

 

 
1...864865866...1,592Page 865 of 1,592

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus