2017ko urtarriletik hasita eta Gobernantza eta Gizartearekiko Komunikazioko diputatuak negoziazio mahaiaren itxiera inposatu bitartean, Gipuzkoako Foru Aldundiko langile batzordeko sindikatuok langileen lan baldintzak arautuko dituen Lan Hitzarmena negoziatzeko gure prestutasun guztia izan eta erakutsi dugu. Gainera, itxieraren aurrean, berriz ere mahaia ireki eta negoziazio erreal bat izateko gure nahia behin eta berriz azaldu dugu. Izan ere, Imanol Lasak 2017ko azaroan, akordiorik erdietsi gabe, Gipuzkoako Foru Aldundiko langileen lan baldintzak aldebakarrez arautzea erabaki zuen. Batzar Nagusietako talde politikoek honen berri izan dute eta gai honi buruzko informazioa emateko agerraldi bat egitera gonbidatu gaituzte. Agerraldia gaur bertan izan da.

Langile batzordeak ohar hau idatzi du, gaurko agerraldiaren harira: 

1-Ia urtebete iraun duen prozesu honetan ez da benetako negoziaziorik egon, baizik eta argudiorik gabeko “bai/ez” erantzunak gure eskaera gehienei.

2-Gipuzkoako Foru Aldundiak (GFA) zenbait hobekuntza ezarri dituen arren, ALDEBAKARREZ, adostasunik gabe eta inongo bermerik gabe egin du eta erraztasun berberarekin ken ditzake.

3-2017ko lan enplegu eskaintza langileen ordezkaritzarekin negoziatu gabe onartzean, GFAk negoziazio kolektiboko eskubidea eta legea urratu ditu.

4-Diputatuen Kontseiluak araudi berri bat ALDEBAKARREZ eta adostasunik gabe onartu eta argitaratuko du; eta ezin dugu ahaztu indarrean dauden adostutako akordioak aldebakarrez aldatzeak legea urra dezakeela.

5-Azkenik, GFAko langileek egin dituzten kontzentrazioak eta mobilizazioak gogora ekarri nahi ditugu eta horrek ematen digun zilegitasunean oinarrituta, eskaera bat luzatu nahi diogu batzorde honi: Diputatu Nagusia den Markel Olano jaunari interpelatzea, berriro negoziazio mahaia ireki dezan eta akordio adostu bat lortzeko benetako negoziazioa bultza dezan.
 

 

 

ERLAZIONATUTAKO ARTIKULUAKIDAZLEAREN GEHIAGO