2026-07-16
Blog Page 838

Herritar guztiak deitzen ditugu pentsio duinen aldeko apirilaren 22ko Iruñeko manifestazioan parte hartzera

admin
-
0
Herritar guztiak deitzen ditugu pentsio duinen aldeko apirilaren 22ko Iruñeko manifestazioan parte hartzera

12:00etan, Iruñeko Udaletxe plazatik irtengo den protestan izango gara, Sasoia eta Pentsionistak Martxan plataformek deituta.

Heldu den apirilaren 22an, igandearekin, Sasoia eta Pentsionistak Martxan plataformek eginiko deiari erantzunez, pentsionistak Iruñeko karriketara aterako dira berriz pentsio duinak izateko eskubidearen alde eta gizarte segurantzako sistema propio baten alde. LABek herritar guztiak deitzen ditu -langileak, langabeak, gazteak, emakumeak…- manifestazioan parte hartzera, ulertzen baitu pentsioen afera ez dagokiela soilik oraingo pentsionistei, gizarte osoari baizik.

Azken hilabeteetako mobilizazio jendetsuen arrimora, bertze bat datorkigu orain Iruñean, gure ustez, arazoaren funtsa bete-betean asmatzen duena eta Nafarroako 134.177 pentsionistek pairatzen dituzten arazo handiak konpontzeko aldarrikapenak mahai-gaineratzen dituena.

Eskubide ekonomiko eta sozialak urratu dituzte azken erreformek, eta egungo egoera alarma gorria pizteko modukoa da: pentsionisten %61,67k (82.753 pertsonak) 1.080 euro baino gutxiago kobratzen dute, eta talde horren zati handi bat (%65,53; hau da, 54.227 pentsionista) emakumeak dira. Horiek oraingo datuak dira. Baina zer gertatuko da etorkizuneko pentsionistekin? Gure pentsioak kinka larrian daude enpresetan lan erreforma ezartzen ari direlako, lan merkatuan emakumeak segregazioarne bidez baztertzen dituztelako, eta babes sozialeko sistema pobretu dutelako.

LABek bat egiten du Sasoia eta Pentsionistak Martxan plataformen aldarrikapenekin: pentsioetan KPIren igoera bermatzea, eta ez %0,25 ziztrin hori; gutxieneko pentsioa 1.080 eurokoa izatea, Europako Karta Sozialak ezarritako moduan; eta gaur eta bihar pentsio duinak ziurtatuko dituen gizarte segurantzako sistema publiko propioa izatea.

Horregatik guztiagatik, LABek Nafarroako gizarte osoa deitzen du pentsionistekin batera kalera atera dadin. Uste osoa baitugu kapitalak ezarri nahi dizkigun bizitza prekarioen alternatibak badirela. Beraz, apirilaren 22an, 12:00etan, Iruñeko Udaletxe plazan izanen gara.

 

 

 

Ogasun Sailaren aurrean mobilizatzen ari dira Garbialdiko langileak

admin
-
0
Ogasun Sailaren aurrean mobilizatzen ari dira Garbialdiko langileak

Aldundiko garbitzaileek zarata egiten jarraitzen dute, egunotan mobilizatuko baitira Ogasun Sailaren aurrean, Bilbon, errenta aitorpenaren erreklamazio epea irauten duen bitartean. "Aditu nahi ez badute, entzungo gaituzte!”, berretsi dute. Atzo hasi ziren mobilizazioak egiten.
 

 

 

Mobilizazio berriak egin ditugu Osakidetzako Larrialdietan

admin
-
0
Mobilizazio berriak egin ditugu Osakidetzako Larrialdietan

Bilboko Osasun Sailaren Lurralde Ordezkaritzaren aurrean elkarretaratze bat egin dugu.

Osakidetzako Emergentziak zerbitzuko langileak Bilboko Osasun Sailaren Lurralde Ordezkaritzaren aurrean (Rekalde zumarkalea 39) elkarretaratu dira gaur. Osakidetzaren Emergentziak zerbitzuko Langileen Batzordeak, ELA, CCOO, LAB, SATSE, ESK, SME eta UGT sindikatuekin batera, Zuzendaritzarekin negoziazioa desblokeatzea lortu zuten otsailean. Hala ere, Osakidetzaren negoziatzeko borondate faltak prozesua hautsi du eta sindikatuek mobilizazio berrien deialdia egin behar izan dute.

2018ko martxoaren bukaeran, sindikatuek, negoziazio prozesuan aurreratzeko bilera bat izan genuen Zuzendaritzarekin, azken honek lan-karteldegi defizitarioak kendu ondoren. Negoziazio puntuen artean ondorengoak zeuden: langile guztientzako emergentzietako osagarria, txandartekoa (langileek hurrengo txandari erreleboa emateko lanaldian luzatzen duten denbora) eta koordinazio osagarria erizain eta medikuentzat.

Zuzendaritzak ez du modu argian jokatu lehenengo puntuaren negoziazioan. Izan ere, ez du bere hitza eman osagarri horrek gainontzeko osagarrien aldarrikapenak eragotzi ez ditzan. Gainera, ezezko borobila eman du txandartekoaren denboraren aitorpenari (langileek dagoeneko egiten duten arren). Guzti horien ondorioz, Langileen Batzordeak bilerak bertan behera utzi eta mobilizazioetara itzultzea erabaki du aho batez.

“Zuzendaritzaren helburu bakarra negoziazio prozesua luzatzea izan da. Zuzendaritzak sortzen duen mesfidantza eta prozesua kudeatzeko duen gaitasun eza kontuan harturik, Emergentziak zerbitzuko arazoak konpontzeko prest dauden negoziatzaile egokiak eskatzen dizkiogu Osakidetzari”, adierazi dute sindikatuek.

Mobilizazio berriak
Egoera horren aurrean, Langileen Batzordeak eta sindikatuek antolatuko diren mobilizazio berrietan parte hartzeko deia luzatu diete Osakidetzako Emergentziak zerbitzuko langile guztiei, lan-baldintzen hobekuntza aldarrikatzeko helburuarekin.

 

 

 

Baionako kaleak hartu ditugu Macronen erreformen aurka

admin
-
0
Baionako kaleak hartu ditugu Macronen erreformen aurka

Zerbitzu publikoen defentsan eta Emmanuel Macronek iragarri dituen erreformen kontrako beste mobilizazio egun bat antolatu dugu sindikatuok, Ipar Euskal Herrian.

Izan arlo publiko edo pribatuan, gobernamenduak bere estrategia aplikatzen segitzen du: erreformak sortzen, lotura soziala, elkartasuna eta kolektiboa hausteko.

Langileak erasotuz eta zerbitzu publikoa oraindik gehiago ahulduz, gobernamenduak biztanle guziak ditu erasotzen!
Apirilaren 19a azken erreformen salatzeko mobilizazio eta greba eguna da:

Funzio publikoan, Indize-puntuaren balioaren izoztea, egun eskasa berriz ezartzea, 120.000 funzionarioen desagertzea salatu dugu.

Hezkuntza arloan, lizeo eta goi mailako ikasketen erreformak baita ikasleen emendaketa gelaka salatzen ditugu, segregazio soziala garatuko dutelako sektore behardunetik heldu diren haurren kalterako.

Osasun arloan: zahar etxeetako langile eta etxeetako laguntzaileentzat baldintza egokiak aldarrikatuko ditugu, gaizki tratatze instituzionala geldi dadin.

Zerbitzuen arloan: trenbideetako estatutuaren kontrako erasoak gelditzea eskatzen dugu, baita tokiko eta kalitatezko garraio publiko bat aldarrikatzen ere.

Baina haratago, zerbitzu pribatu guzietan, Euskal Herriko langileak oino gehiago prekario bilakarazten dituzten Macron gobernamenduaren ordonentziak salatzen ditugu.

Eta bertan antolatzea balitz aterabidea? 
Apirilaren 19an, edozein motatako zapalkuntza soziala ez dugula onartzen aldarrikatu dugu. Greba isolatu eta zatikatuak ez dira nahikoak izanen gobernamendua gibelarazteko! Haratago jo behar dugu!

Aterabidea, tokika, manera interprofesional eta kolektiboan antolatzea da. LABek egunero lan egiten du baldintza egokiak sortzeko Euskal Herrian eta elgarrekin erreforma hauek gibelarazteko.

LABek Macron erreformen ondorioak ttipitu nahi ditu Euskal Herrian!

Izan publiko edo pribatuan, gure lurraldean baldintza onak ditugu Euskal Herria Macron Legearen eremutik kanpo atxikitzeko.

Euskal Hirigune Elkargo berriak tokiko eta kalitatezko zerbitzu publiko berria asmatu behar du, herritarren beharrei eranzunez eta prekaritatearen aurka borrokatuz.

Euskal Herriaren ezagutza administratibo eta instituzionalak bertan antolatzeko tresnak garatzen lagunduko gaitu.

Horretarako, Elkargoak eskumen batzu berreskuratu beharko ditu: garraioa, energia, osasuna, hurbileko zerbitzuak.

Izan gaiten ikasle, erretretadun, langile, prekario, langabezian, mobiliza gaitezen!
 

 

 

#lanBiziHerriDuina. Burujabetza ezkerretik #M1Duina

admin
-
0
#lanBiziHerriDuina. Burujabetza ezkerretik #M1Duina

Lan eta bizi duina bermatzea herritar orori. Horixe izan behar luke herri baten eredu ekonomiko eta sozialaren helburu nagusia, baina, IBEX 35-ak eliteen mesedetan agintzen du beti eta kapitalak prekarietatea zabaltzen jarraitzen du gure lanean eta gure bizitzan.


Bi estatu antidemokratiko ditugu aurrean. Espainia eta Frantzia inboluzio sozial eta politikoa sustatzen ari dira, euskal herritarron gehiengoaren kaltetan. Hamarkadetan lortu ditugun garaipen sozialak kolokan jartzen ari dira: lan eta bizi baldintzak prekarizatzen ari dira; zerbitzu publikoak murrizten; zaintza lanek emakumeen bizkar jarraitzen dute; pentsio sistema publikoa eraitsi nahi dute; sindikalgintza eta bestelako defensa kolektiborako tresnak indargabetzeko eginahaletan ari dira.

Erasoaldi bortitza da, baina zorionez, inboluzioari aurre egiteko adorea daukagu euskal herritarrek. Pentsiodunen mobilizazio jendetsuak edota martxoaren 8ko greba feminista arrakastatsuak erakutsi dute injustiziei aurre egiteko herri honek duen indarra. Etorkizun justuagoa, demokratikoagoa izateko gogo bizia dago Euskal Herrian.
Aldarrikapen laboral eta sozial komunen inguruan indarrak biltzeko garaia da. Lan esparruari dagokionez honako lehentasunak ikusten ditugu, besteak beste:

> 1.200 euroko gutxieneko soldata.
> 35 orduko lanastea; lanaldi partzial inposaturik ez.
> 1080 euroko gutxieneko pentsioa.
> Gizon eta emakumeen arteko soldata arrakala ezabatu. Zaintza lanak aitortu eta duindu.
> Enplegu publikoa sortu eta publi kazio prozesuak sustatu. Azpikontratetan klausula sozialak ezarri.
> Prekarizazio eta dualizazio formula oro baztertu: soldata-eskala bikoitzak, externalizazioak, pribatizazioak, ustezko autonomoak, iruzurrezko praktikak etab.
> Lanetik etxera bizirik eta osasuntsu bueltatzeko eskubidea. Lan istripuak ekiditeko neurriak. Lan gaixotasunen aitortza eta prebentzioa.
> Euskaraz lan egin eta bizitzeko eskubidea.

Lan, bizi eta herri duina ditugu helburu:

Lan duina. Prekarietatearen kontra, enpleguaren defentsan, eta lan eskubideen alde borroka eta greba eredugarri ugari daude piztuak Euskal Herri osoko lantoki ezberdinetan; lantokiz lan- toki aipatutako aldarrikapenen alde borrokan segitzeko prest gara. Alde batetik, patronalak negoziazio kolektiboan ezarritako jokalekuari aurre egitera goaz ekintza sindikal berrituarekin, lan baldintza duinen defentsan, gure hitzarmenen alde; lantokietan jasaten ditugun egoera injustu eta prekarioei buelta emateko langile borroka indartzea beharrezkoa da. Zehaztu ditzagun lehentasunak eta borrokak, antolatu ditzagun grebak eta bestelako ekimenak.

Bizi duina. Euren erantzukizuna eta ardura delako eta horretarako gaitasuna dutelako, Euskal Herriko instituzioei exijitzen diegu gaurdanik herritarrok lan eta bizi baldintza duina izateko erabakiak hartzeko: pentsioak 1.080 eurora bitarte osagarritzea edota Karta Sozialak sustatutako Herri Ekimen Legegileak aldarrikatzen duen bezala, herritar guztiei oinarrizko errenta eta etxebizitza bermatzea; langileen mesedetan erreforma skal sakona egitea; neurri zehatzak dira, kasuan kasu euskal gobernuek zein aldundiek har ditzaketenak. Herritarren gehiengoaren alde kokatzeko eta jokatzeko, baina, patronalaren neurriko politikak egiteari utzi behar zaio eta langileekin lerrokatu.

Herri duina. Herritarrekin ala patronalarekin egon, 155arekin ala eskubide demokratikoekin egon hautu politikoa da eta aukeratu beharra dago. EAJ, gaur gaurkoz, Confebaskekin eta 155aren sustatzaileekin dago. Elite ekonomiko baten interesak lehenetsi eta herritarrei lan eta bizi baldintza duinak bermatzen ez dien eredua antidemokratikoa da. Madrildik, PP-PSOE-Csen tripartidismo berritua zentralizazioaren aldeko erabakiak hartzen ari da, Euskal Herrian, autogobernua jo-puntuan duten erabakiekin, bertoko hainbat lege indargabetuz. Katalunian egin bezala, subirautza prozesua abiatu asmo duen ororentzat prest dute 155a. Sustatzen dutenen neurrira egindakoa da, eta gurean, lan munduan ere aplikatu digute 155a, bertoko hitzarmenak babesten dituen Akordio Interprofesionalaren inpugnazioarekin.

Erabakitzeko eskubidea eta burujabetza ez dira aldarrikapen abstraktuak, bizimodu duina izango badugu, behar-beharrezkoak ditugu. Estatus politikoen eztabaida irekita dagoen honetan, guk erabaki nahi dugu, Euskal Herrian erabaki, subirautza prozesuan ezkerretik eraginez, herritar, langile orori lan eta bizi duina bermatzeko. Aldaketa sozialerako burujabetza aldarrikatzen dugu. Fase autonomistatik fase soberanistara pasatzeko unea da. Lan Harremanetarako eta Babes Sozialera Euskal Esparrua eraikitzeko, ezkerretik eta feminismotik eredu sozial eta ekonomiko berria sustatzeko, lan, bizi eta herri duina helburu, Maiatzaren Lehenean, kalera!
 

   
 

 

2018ko Maiatzaren Leheneko mobilizazioen zerrenda #lanBiziHerriDuina #M1Duina

admin
-
0
2018ko Maiatzaren Leheneko mobilizazioen zerrenda #lanBiziHerriDuina #M1Duina

Eskualdez eskualde mobilizatuko gara Maiatzaren Lehenean eta aukeratutako leloa "Lan, bizi, herri duina" izan da.

M1eko MOBILIZAZIOAK

ARABA
Gasteiz. Bilbo Plaza 12:00etan
Oion. Herriko Plaza 12:30ean
Laudio. Lamuza Plaza 12:30ean

BIZKAIA
Basauri, Benta plaza 12:30
Bilbo. Zabalburu 12:00
Gernika, Udaletxean 12,30
Markina. Zelaia 12:30
Mungia. Udaletxea 12:30
Sestao. Kasko plaza 12:30
Zornotza. Zelaieta parkea 12:00

GIPUZKOA
Donostia. Bulebarra 12:00
Eibar. Untzaga Plaza 12:00
Hernani. Gudarien Plaza 12:00
Irun. Txanaleta Plaza 12:30
Ordizia. Plaza Nagusia 12:00
Tolosa. Triangelu Plaza 12:00
Zumaia. Beheko Plaza 12:00

NAFARROA
Altsasu. Foruen plaza 12:30
Doneztebe. Avia gasolindegia 12:00
Iruñea. Gazteluko plaza 12:00
Lizarra. Udaletxea 12:30
Tafalla. Nafarroa plaza 12:00
Tutera. Foruen plaza 12:30

IPAR EUSKAL HERRIA
Baiona. Tren geltokia 11:00
Maule. Kurutze Xuria 11:00
 

 

 

Eskualdez eskualde mobilizatuko gara Maiatzaren Lehenean

admin
-
0
Eskualdez eskualde mobilizatuko gara Maiatzaren Lehenean

"Lan, bizi, herri duina" izango da aurtengo leloa, eta bi erronka izango ditu ardatz: eraldaketa sozialerako grina gauzatzeko mobilizazio soziala indartzea; eta aldaketa sozialerako grina edo gogo hori burujabetza prozesuarekin lotzea.

LABek aurtengo Maiatzaren Leheneko bere irakurketa eta egun horretarako deituko dituen mobilizazioen berri eman du gaur Bilbon, LABeko idazkari nagusi Garbiñe Aranburu, Antolakuntza Idazkari Izaskun Garcia eta Komunikazio idazkari Maider Jauregiren eskutik. Eskualdez eskualde hainbat mobilizazio egingo ditugula jakinarazi dute, "Lan, bizi, herri duina" leloarekin.

Maiatzaren Leheneko aurtengo leloa langile eta herri moduan ditugun helburuen erakusle da. Helburu potolo horiek bi erronka nagusi dituzte ardatz, eta horiei buruz aritu da Garbiñe Aranburu.

Lan, bizi, herri duina helburu, herri honetan dagoen eraldaketa sozialerako grina gauzatzeko mobilizazio soziala indartzea litzateke lehen erronka.

Aranbururen hitzetan, "eredu berri bat eta aldaketa soziala aldarrikatzen duen mobilizazio soziala bizi bizirik dago. Emakumeak kalera atera gara, pentsionistak kalean daude, hainbat dira lantokiz lantoki borrokan dauden langileak"

Era berean, Langileen borrokari esker lortu da Tubos Reunidoseko EREa atzera botatzea, Nafarroako klausula sozialen legea onartzea.

Sindikatuko idazkari nagusiaren hitzetan, "LABek lan munduan eragin eta lan mundutik eragitea du helburu, lantokietan ekintza sindikala indartuz, borroka eta grebak sustatuz. Baditugu proposamenak eta badugu zer borrokatu: 1.200 euroko gutxieneko soldata, 35 orduko lan astea, soldata arrakalarekin amaitzeko, pribatizazioa eta azpikontratazioari aurre egiteko, lanetik bizirik bueltatzeko, 1080€ euroko gutxieneko pentsioa…

Pentsionistak eta emakumeak mobilizatu diren moduan, langilego osoa mobilizatu behar da eta lantokietan ere ari dira ugaritzen gatazkak: bulegoetako langileak, gipuzkoako hotelak, Vicinay, Dia supermerkatuak….

Hala, lantokiz lantoki ematen dugun erantzunaz harago, erantzun orokorragoak behar dira: "Inboluzio sozialak hainbat adierazle ditu, baina guretzat azpimarragarria da Akordio Interprofesionalaren kontrako erasoa. Inpugnazioaren helburua dugun burujabetza maila mugatua erasotzea da. Injerentzia argi bat da, 155en artikulua lan harremanetara ekartzea dela esan dezakegu. Bertako hitzarmenak negoziatzeko dugun eskubidearen kontra jotzen du zuzen zuzenean, euskal langileon erabaki ahalmena erabat mugatuz. Eraso larria da eta tamainako erantzuna emateko deia luzatu dugu, eta ez dirudi beste sindikatuak horretarako prest daudenik. LAB mobilizatuko da estatalizazioaren aurka eta Lan Harremanetarako Euskal Esparruaren alde".

Garbiñe Aranbururen esanetan, "mobilizatu behar dugu, ez bakarrik Madriletik datozen erasoen aurrean. Bizi dugun prekarizazioaren erantzuleak ez daude Madrilen bakarrik. Edozein instituzioren ardura izan beharko luke lan eta bizi duina bermatu eta herri duina eraikitzea. Gutxieneko pentsioa, 1.080 bermatu daiteke edota Euskal Herriko Eskubide Sozialen Kartaren Herri Ekimen Legegileak aldarrikatzen duen bezala, herritar guztiei oinarrizko errenta eta etxebizitza bermatzea posible da".

Aldaketa sozialerako grina edo gogo hori burujabetza prozesuarekin lotzea litzateke bigarren erronka, burujabetza prozesuari ekiteko garaia delako.

Garbiñe Aranbururen arabera, "fase politiko honen helburua ezkerretik elikatuko den burujabetza prozesua martxan jartzea izan behar da. Eraldaketa sozialean aurrera egingo badugu, lan duina, bizi duina eta herri duina eraikitzeko, ezinbestekoa da burujabetza eskuratzea".

Esan bezala, bizi bizirik dagoen aldaketa sozialerako grina eta behar hori gauzatzeko burujabetza prozesua martxan jartzea ezinbestekoa da: "Ez dago eraldaketa sozialik erabaki ahalmenik gabe. Ez dago lan, bizi, herri duinik Lan Harremanetarako eta Babes Sozialerako Euskal Esparrua eraikitzeko tresnarik gabe".

LABeko ordezkariaren hitzetan, "Estatuak birzentralizazioaren aldeko apustu argia egin du eta tentaldia dagoenari eustea izan daiteke. Estatutua betetzeko eskaera luzatu dio Urkullu lehendakariak berriro ere Madrilgo gobernuari, guretzat motz geratzen den eskaera. Guk ez diogu gaurko markoari eutsi nahi, ez dugu Autonomia Estatutuan geratu nahi, erabat mugatua delako. Autonomia Estatutuak eta Amejoramanduak esan nahi dutena da gutxieneko soldata, lan baldintzak, pentsio sistema eta abar Madrilen erabakitzen jarraitzea".

Estatus politiko berriaren eztabaidak erabakitzeko eskubideari irtenbidea eman behar dio eta enplegu eta babes sozial gaietan eskuduntza guztiak aldarrikatzen ditugu berriro ere. Estatus politiko berriak Lan Harremanetarako eta Babes Sozialerako Euskal Esparrua eraikitzeko tresnak bermatu behar ditu.

Garbiñe Aranbururen esanetan, "EAJren Gobernua ez dugu bide honetan ikusten. Aurrekontuen negoziazio fasea azken txanpara heltzen ari da. EAJk herritarren gehiengoaren beharrei muzin egin eta berriro ere alderdi korrupto eta antidemokratiko baten eskuetan dagoen gobernuari estabilitatea emateko prestutasuna adierazi du. PPren aurrekontuak, patronalaren klase interesak defendatzen dituen aurrekontuak babesteko, prestutasun osoa du EAJk. Hori da, eta ez besterik, Estatuarekin aurrez aurre ez jartzeko arrazoia. EAJk ez du burujabetzan sakontzearen beharrik, egungo eskuduntzak eta kontzertuak ematen dituen aukerak nahikoak ditu, CONFEBASKen interesak zaintzeko".

Estatuak Kataluniarekiko darabilen errepresio bortitzak apur bat desitxuratzen dio argazkia eta 155.en artikuloaren inguruan hartu duen jarrera antzerki hutsa da, Garbiñe Aranbururen ustez: "155.en artikuluaren mehatxuak, Katalunian gobernua osatu edo ez, bere horretan jarraituko du".

Garbiñe Aranbururen arabera, "eraldaketa soziala eta burujabetza guztiz lotuak dauden eztabaidak dira, lantokietan eta kalean egiten ari garen mobilizazioak, benetan alternatiba orokor batean gauzatuko badira ezinbestekoa.

Sindikalgintza abertzaleak ezin du eztabaida honetatik kanpo geratu, ezin du begirale papera jokatu, ezin ditu aliantza horretan aurrera ez egiteko etengabe aitzakiak bilatu: "Eragile aktibo izan behar dugu, prozesua martxan jartzen laguntzeko, prozesu hori ezkerretik elikatzeko eta prozesu horretara langileen gehiengoa ekartzeko. LAB prest dago horretarako".

Mobilizazioak:

ARABA
Gazteiz. Bilbo Plaza 12:00etan
Oion. Herriko Plaza 12:30ean
Laudio. Lamuza Plaza 12:30ean

BIZKAIA
Basauri, Benta plaza 12:30
Bilbo. Zabalburu 12:00
Gernika, Udaletxean 12,30
Markina. Zelaia 12:30
Mungia. Udaletxea 12:30
Sestao Kasko plaza 12:30
Zornotza Zelaieta parkea 12:00

GIPUZKOA
Donostian. Bulebarra 12:00
Eibarren. Untzaga Plaza 12:00
Hernanin. Gudarien Plaza 12:00
Irunen. Txanaleta Plaza 12:00
Ordizin. Plaza Nagusia 12:00
Tolosan. Triangelu Plaza 12:00
Zumaian. Beheko Plaza 12:00

NAFARROA
Altsasu. Foruen plaza 12:30
Doneztebe. Avia gasolindegia 12:00
Iruñea. Gazteluko plaza 12:00
Lizarra. Udaletxea 12:30
Tafalla. Nafarroa plaza 12:00
Tutera. Foruen plaza 12:30

IPAR EUSKAL HERRIA
Baiona. Tren geltokia 11:00
Maule. Kurutze Xuria 11:00

 

Burgelun hildako garraiolariaren heriotza salatzeko elkarretaratzea egingo dugu astelehenean

admin
-
0
Burgelun hildako garraiolariaren heriotza salatzeko elkarretaratzea egingo dugu astelehenean

Gasteizko Correos plazan izango da protesta, 11:30ean, euskal gehiengo sindikalak deituta.

Lehenik eta behin gure doluminak eta elkartasuna adierazi nahi dizkiegu atzo Burgelun (Araba) lan istripuan hil zen garraiolariaren senide eta lagunei. Beste sektore askotan gertatzen den moduan, garraioan ere lan baldintzak gero eta prekarioagoak dira. Azpimaragarria da euskal garraio sektorea
osatzen duten garraiolari asko autonomoak direla, baina sektorearen beste zati handi bat gidariek osatzen dute. Gaur egun eta urteetan zehar administrazioen utzikeriak eragindako egoera dela eta, gidari nahiz garraiolarien lan baldintzak ez dira hobetu. Ezinbestekoa da garraiolari nahiz gidarien egoera hobetzea, bai porteen prezioetan, bai lan orduetan, Europako herrialde askotan hartzen ari diren antzeko neurriak kontutan hartuz, izan ere, sektorearen zati bat prekarietatean egoteak, bestea ere, bertara bultzatzen baitu.

Administrazioek beste alde batera begiratzen dute, sektoreak bizi duen egoeraren ezagun izan arren. Azpimarragarria da garraiolariek jasaten dituzten lan istripuen gehiengoak errepideetako merkantzien garraioak urte luzez pairatzen daraman prekarietatea eta desregulazio basatia agerian uzten dituela. Gainera, garraiolarien eskubide eza ere nabaria da, izan ere, lana mantendu ahal izateko, askotan kargatzaileen presak, ezinezko ordutegiak, gehiegizko pisudun kargak, prezio baxuak, lan egun luzeak eta atseden eza jasan behar baitituzte. Askotan, gainera, zamaren deskarga egitera behartuak dira. Hauek eta honelako beste hainbat arrazoi dira lana modu seguru eta duinean egitea oztopatzen dutenak, garraiolarien bizitza arriskuan jartzeaz gain. Arazo hauek dira administrazioak behin eta berriz ezkutatzen saiatzen direnak, beste alde batera begiratuz gehienetan, beraien nahia garraio merkea lortzea baita, edozein preziotan.

Garraiolarien lan istripuak ez dira maiz estatistika o zialetan kontutan edukitzen: errepide istriputzak jotzen dira, zenbakiak apaintzeko. Besteetan, “heriotz natural” delakoen zifren barruan sartzen ere saiatu ohi dira, ez garraio sektorean bakarrik, lanak eragiten dituen estres egoerak, besteak beste, alde batera nahita utzita.

2018. urtean jada 17 langile hil dira lan istripuan, horietatik 8, gidari profesionalak. Datu hauek guztiak eta prekarietatearen ondorioak gizarteratzea ezinbestekoa dela kontutan hartuta, gehiengo sindikaleko kideok elkarretaratzea egingo dugu datorren astelehenean, apirilak 23, Gasteizen, Correos plazan goizeko 11.30tan. Mobilizazioa ezinbestekoa da eta istripuak gertatzen direnean ELA, LAB, ESK, STEILAS, EHNE eta HIRUko kideok egoera salatzen jarraituko dugu, baita hildako langilearen familia eta lagunei babesa ematen ere.
 

 

 

Kalitatezko eskola publikoa aldarrikatu dugu Iruñean

admin
-
0
Kalitatezko eskola publikoa aldarrikatu dugu Iruñean

Murrizketen ondorioak bertan behera utziko dituen itunaren alde kontzentratu gara Nafarroako irakaskuntzako sindikatu guztiak.

Irakaskuntzako bederatzi sindikatuok hezkuntza itunaren negoziazioen alde egiten jarraitzen dugu. Hala, beste elkarretaratze bat egin dugu Nafarroako Jauregiaren aurrean, "Kalitatezko irakaskuntza publikoaren alde. Murrizketarik ez. Ituna orain!" leloarekin.
 

 

 
1...837838839...1,635Page 838 of 1,635

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLĂŤTICA DE PRIVACIDAD

www.lab.eus