Euskal gehiengo sindikalak deituta, elkarretaratzea egin dugu Asparrenan, Asparrondo industria gunean, Euskal Herrian izandako azken lan heriotza salatzeko. Hain zuzen ere, urtea hasi denetik, gutxienez sei langile hil dira lan istripuz; azkena Araban, Donemiliagan, garraiolari bat bere kamioiarekin beste kamioi batekin talka egin eta gero.
Blog Page 509
Pentsio sistema propio baten alde irten gara kalera
Pentsiodunen mugimenduak Hego Euskal Herriko hiriburu eta zenbait herritan deitutako mobilizazioekin egin dugu bat. Langileon etorkizuneko pentsioak eta gure pentsio sistemaren oinarriak daude jokoan, bizi baldintza duinak bermatu edo prekarietatea, genero arrakala, ezberdintasun sozialak zein elkartasun ezan oinarrituko den sisteman sakondu. Hain zuzen ere, 2010 eta 2012ko lan erreformak eta 2011 eta 2013ko pentsio erreformen aspektu erregresiboak indargabetzea eskatu du, baita pentsio sistema propioa eta 1.080 euroko gutxieneko pentsioa aldarrikatu ere.
Sindikatuok Izan Bidea ekimena babestu dugu Gasteizen kartzela-politika berria eskatzeko
LAB, ELA, ESK, STEILAS, CNT, HIRU sindikatuek, gaur Gasteizko Foruen Plazan egin dugun elkarretaratzearen bidez, bat egin dugu Izan Bidea ekimenarekin, espetxe-politika berri bat eskatzeko.
Espetxe-politika berri bat, sakabanaketari amaiera emateko eta legea aplikatzen hasteko, orain arte izan duen salbuespenezko izaeratik urrun. Lehenbailehen aplikatu beharreko elementuak dira gaixo dauden presoak berehala espetxetik ateratzea, baita gaur egun kartzelan dauden adinekoak ere, eta baita gradu-aldaketa eta legeria arruntean aurreikusitako onurak eskuratzea.
Oinarrizko eskubideen urraketarekin amaitzeko behar diren mekanismoak jartzea atzeratzeam senideen sufrimendua handitu besterik ez du egiten, bizikidetza sozialean aurrera egitea zailduz. Zalantzarik gabe, presoen arazoa konpontzea oso ekarpen garrantzitsua izango da adiskidetzea lortzeko.
Herritarrak eta, bereziki, langileak animatzen ditugu Izan Bidea ekimenaren inguruan antolatzen diren ekimenetan parte hartzera, bai eta estatu espainiarreko espetxeetan salbuespen-politikak aplikatzeko bidean ekarpena egiten duten ekimenetan parte hartzera ere.
Greba Iruñeko udal haur-eskoletan erregimenaren euskarafobia salatzeko
Erregimenaren Euskarafobia salatzeko LABek eta CCOOk Iruñeko Udal Haur Eskolen Erakunde Autonomoan egindako greba-deialdiaren jarraipena guztiz ona izan da. Iruñeko Udaleko fobia, oraingo honetan, datorren ikasturterako egin duen eskaintzaren proposamenean islatu da. Izan ere, 16 haur eskoletatik euskarazko murgiltze-eredua bakar batera murriztu du, azken 40 urteetan egindako ibilbide pedagogiko arrakastatsua bertan behera utzirik.
LABek eta CCOOek Iruñeko Udalaren Haur Eskolen Erakunde Autonomoan gaurko deitu duten grebaren jarraipena %86koa euskarazko eskoletan, eta %62koa orokorrean. Tamalgarritzat jotzen dugu Afapna sindikatuak azken orduan greba bertan behera utzi izana, ez baitugu oso ondo ulertzen zerk bultzatu dituen erabaki hori hartzera. Salatu nahi dugu, halaber, erakundeko gerentziak agindutako zerbitzu minimoen ondorioz, langileen ia erdiari grebarako eskubidea ukatu zaiela. Gainera, Jose Ramon Rabade gerenteak gutxieneko zerbitzuen inguruan egin duen kudeaketa ezin txarragoa azpimarratu nahi dugu, astearen hasieran langileen batzordearekin adostutako ebazpena atzera bota eta erabateko abusua suposatzen duen beste bat ezarri baitzuen ondoren.
Hala eta guztiz ere, gure poza azpimarratu nahi dugu, grebaren jarraipena masiboa izan baita. ehunka lagunek babestu dituzte langileak Hezkuntza Departamentutik abiatu eta Nafarroako Diputazioan amaitu den manifestazioan, ibilbidean zehar Iruñeko Udalaren proposamena aurrera ateratzeko ardura dutenak seinalatuz; beraien erabakiak zuzen eta bortizki eragiten baitie herritarron euskara-eskubideari zein eskoletako kudeaketari. Familien babesa ere jaso dugu, neurri handi batean ez baitituzte seme-alabak eskolara eraman, bai eta herritarrena eta sindikatu batzuena ere, proposamen honen gehiegikeria eta inposaketa salatzeko.
Azkenik, gaur arratsaldean egingo diren mobilizazioetan parte hartzera animatzen zaituztegu:
– 16: 30ean elkarretaratzea egingo da Udaletxe Plazan, CCOOk eta LABek deituta.
– 17: 30ean, manifestazio bat, goizekoaren ibilbide berarekin, oraingoan Haur Eskolak Euskaraz plataformak deituta.
Egoeraren larritasunaren eta Nafar Gobernu “aurrerakoiak” erakutsitako utzikeriaren aurrean -dirudienez, Iruñeko Udalaren proposamen atzerakoia onartzeko arazorik ez du izango-, muturreko egoera honetan, eta euskarari eta eskoletako pedagogia-printzipioei eraso egin ondoren, Erakundeko langileei greba-deia egitea beste aukerarik ez zaigu geratu.
Mila esker grebarekin bat egin duzuen guztioi. Euskaraz bizi, hezi eta lan egin nahi dugu! Euskarafobiari Stop!
Grebara deitu ditugu Gipuzkoako helduen egoitzetako langileak otsailaren 25a eta martxoaren 30erako
LAB sindikatutik, Gipuzkoako helduen egoitzetako langileei greba deialdia zabaltzen diegu otsailak 25a eta martxoak 30erako. Krisi honek modu zuzenean jo du helduen egoitzetako langile eta egoiliarren kontra, baina ulergaitza izan arren egoerak berdin jarraitzen du, 2012tik herrialdeko hitzarmenik gabe, langile ratio berdinarekin 2006. urtetik… zer gehiago gertatu behar da helduen egoitzetako sisteman aldaketak emateko? Noiz hasiko da Gipuzkoako Foru Aldundia beraien ardura onartzen eta behar diren pausuak ematen egoera aldatu dadin?
Ezin dugu ahaztu langileak lanera joateagatik gaixotzen ari direla, lan karga eta erritmoak handitu egin dira eta enpresetan ez dira lan arriskuen ebaluazioak egiten, nahiz eta legeak hori eskatu.
Ezin dugu onartu egoilarrek eta langileek bizi duten egoera gogor hau denbora gehiago luzatzea, denen ardura delako zaintzan oinarrituta dagoen zerbitzu sozial hau defendatzea, jendartearen ardura delako pertsona hauen ongizatea.
Helduen egoitzetako langileek urteak daramatzate beraien eskubideen defentsan borrokan eta bizi duten egoera bortitz honen aurrean tinko helduko diote borrokari, langileez gain jendartea aktibatzeko garaia da eta horregatik deia egiten diegu langileei egingo diren mobilizazioetan parte hartzeko.
Helduen egoitzetako sistema publikoa, doakoa, unibertsala eta pertsonak erdigunean jarriko dituena izateko garaia da eta hau lortzeko sektoreko alde guztiek parte hartzea ezinbestekoa da.
EAEko aurrekontuek herritarren lehentasunekin ez dutela bat egiten salatu dugu Gasteizko Legebiltzarrean
EAEko 2021eko aurrekontuak onartzeko saioaren eguna da Gasteizko Parlamentuan. Honen aurrean, Euskal Herriko Eskubide Sozialen Kartako eragileok mobilizazioa egin dugu kanpokaldean, “Ondasuna banatu, eskubideak bermatu, zerbitzu publikoak garatu” lemarekin. Hain zuzen ere, Legebiltzarraren eraikina inguratu eta ekitaldia egin dugu bertan, eta LABeko idazkari nagusi Garbiñe Aranburuk hartu du hitza. Langile borrokak puri-purian dauden honetan, herritarren gehiengoaren egoera gero eta kaxkarragoa denean, langileen eta jendartearen aldarrikapenek aurrekontuetan ez dutela islarik salatu du: “Aurrekontu hauek langileak eta herritarrak mespretxatzen dituzte”.
Halaxe kritikatu genuen urtarrilaren bukaeran egindako agerraldian, non, krisi sozial eta ekonomikoari erantzuteko, aurrekontuetan gidoi neoliberala alde baera uzteko eskatu genuen. Garbiñe Aranburuk Legebiltzarraren aurrean egindako adierazpenen arabera, “gaurko argazkiak islatzen du bi eredu ekonomiko eta sozial guztiz kontrajarriak daudela. Kalean gaude eredu ekonomiko eta sozial berri bat aldarrikatzen dugunak, bizitza erdigunean jartzea eskatzen dugunak; hor barruan daude, EAJ eta PSE-ren gehiengoz, patronalaren mesedetan onartuko dituzten aurrekontuak eztabaidatzen ari direnak. Aurrekontu horiek ez dira gidoi neoliberaletik milimetro bat bera ere aldentzen. Ez dago erabaki politikorik zerga erreforma bat egiteko eta sortzen den aberastasuna banatzeko; ez dago erabaki politikorik zerbitzu publikoak indartzeko eta zaintza lanak aitortzeko, ezta prestazio sozialetara diru gehiago bideratzeko. Aldiz, esku pribatuetara gero eta diru gehiago bideratuko dute, eta inolako baldintzarik gabe”.
Pentsio sistema propioaren alde, otsailaren 13an langileok ere kalera!
Euskal Herriko pentsiodunen mugimenduak larunbata honetarako mobilizazioak deitu ditu Hego Euskal Herriko lau hiriburuetan. LAB sindikatuak mobilizazio deialdiarekin bat egin eta langileak mobilizazioetan parte hartzeak duen garrantzia azpimarratu nahi du. Izan ere, langileon etorkizuneko pentsioak eta gure pentsio sistemaren oinarriak daude jokoan, bizi baldintza duinak bermatu edo prekarietatea, genero arrakala, ezberdintasun sozialak zein elkartasun ezan oinarrituko den sisteman sakondu.
Zentzu horretan, pentsiodunen mugimenduak eginiko aldarrikapenekin bat egiten dugu:
• 2010 eta 2012. urteetako lan erreformak indargabetzea.
• 2011 eta 2013. urteetako pentsio erreformen aspektu erregresiboak indargabetzea.
Era berean, pentsio sistema propioa eta 1.080 eurotako pentsio minimoak aldarrikatzen ditugu, Euskal Herrian erabakiaren erabakitzeko eskubidea aintzat hartuz, Babes Sozial eta Lan Harremanetarako Euskal Esparru baten norabidean. Hortaz, Toledoko Itunak eginiko gomendioak gaitzetsi eta pentsioen inguruko erabakiak hartzeko eskumen osoa exijitzen dugu.
Osasun krisialdiak lehendik zetorren alde anitzeko krisia azeleratu egin du, estrukturalak diren krisiak ikusaraziz: zaintza krisia, eskubide sozialak unibertsalizatzeko zerbitzu publikoen gabeziak, osasuna, hezkuntza… Bidegurutze baten aurrean gaude, baina uste dugu badugula aukerak politikaren lehentasunak herritarron zerbitzura jartzeko. Beraz, larunbata honetan hitzordu garrantzitsua dugu bizitza, lan eta pentsio duinak aldarrikatzeko.
Plastibor-eko langileak zoriondu nahi ditugu lortu duten akordioarengatik #LortuDugu
Astelehen gauez, 2021-2013rako enpresa-hitzarmenaren inguruko akordio batera heldu ziren Plastibor Slko langileen-batzordea (LABeko 7 delegatu, ELAko 1 eta CCOOeko 1) eta zuzendaritza. Akordioa langileen asanbladak berretsi du.
Plastibor SL Zornotzan dagoen kimika arloko enpresa da, 111 langile ditu eta automoziorako eta alor elektrikorako plastikozko piezak ekoizten ditu.
Enpresako lan-hitzarmenaren inguruan akordio bat lortu nahian, bilera mordoa egin zituzten 2020ko martxotik inongo akordiorik lortu gabe. Azkenean, langileen-batzordearen proposamenari jarraituz, asanbladak urtarrilean mobilizazioei ekitea erabaki zuen. Horrela, egunero enpresa aurrean elkarretaratzeak egiten hasi ziren. Hala ere, eta enpresarekin akordioa erdiestea posible izan ez zen, greba mugagabea deitu zuten negoziazioetako blokeoa hautsi asmoz. Greba mugagabea otsailaren 7ko gaueko txandan hasi zen eta gaurko, otsailaren 9ko goizeko txandara arte luzatu da, akordioa atzo gauez lortu zelako.
Hitzarmenaren eduki garrantzitsuenak:
-3 urterako iraupena (2020-2023).
-Ia 7 egun gutxiago lan egingo dira urtean, otartekoaren denbora lanordu kontsideratzearen ondorioz.
-Soldata igoerari dagokionez, lehenengo urtean gutxien irabazten dutenek igoera altuagoa izango dute. Hurrengo urteetan, aurreko urteko KPI + 0,5 eta KPI + 0,75 izango dira hurrenez hurren, igoera nabarmena gaueko plusean eta erreleboko plusa ezartzen da lehen aldiz. Adibide bezala, kategoria baxueneko langile batentzat, 2021eko soldata-igoera %6 ingurukoa izango da.
-Kategoria-promozioetarako protokolo bat landuko da.
-%100 edozein bajetan, eta bajek ez diete aparteko pagei eragingo.
-Lan erreformari mugak jarri. Enpresak ezingo du hitzarmena ez ezarri, lan baldintzak aldatu edo nahieran inor kaleratu. Behartuta egongo da langileen ordezkariekin borondate onarekin akordioa bilatzera.
LAB sindikatuarentzat, hitzarmen honetan aurrerapauso ikaragarriak jasotzen dira Plastibor-eko langileentzat, eta agerian uzten du langileen batasunak eta lan sindikal serio eta konprometituak bere emaitzak ematen dituela. Antolakuntza eta borroka.
[IRITZIA] “Aski da!”
![[IRITZIA] “Aski da!”](https://www.lab.eus/wp-content/uploads/2021/02/HaurEskolak-768x1086.jpeg "[IRITZIA] “Aski da!”")
LAB Irakaskuntzako ordezkari Edurne Lekunberrik Iruñeko haur eskolen aferari buruz idatzi du:
Azken egun hauetan, uste dut, bizirik gabeko gauza bat balitz bezala tratatua senti daitekeen haurtxo bat bezalaxe ari naizela sentitzen. Mugimendu zakarrak erabiliz, esperientziarik gabeko eskuek helduta, ekarri-eramanda, baita bultzatua ere, haurtxoa bezala, ziurgabetasuna, egoneza, estutasuna eta dardara, ari naiz sentitzen, ni ere. Eskuartean daramaten bitxikeriari erreparatu gabe, beharrezkoa den arreta, zaintza eta maitasuna ematen ez duten eskuek ibiltzen naute.
Jostailu bat banintz bezala sentitzen naiz; erraldoiek elkarri pasatzeko erabiltzen duten pilota bat bainintzan; batzuek, ostikoka, nire norabidea markatzen dute, niretzat lortuezinak diren jarreretan jarraraziz, garatu gabeko gaitasunak erabiltzeko exigituz… Nik, jokaldi honetan, zer esan handia dudala ohartu ere, egin gabe.
Izan ere, ASKI DA! Oihukatzeko gogoa dut, eta zentzugabeko partida hau, geldiarazi dezatela. Eta jokoa, berriro hasi baino lehen, guztion artean, modu lasai batean, hemendik aitzina, joku hau gobernatuko duten arauak asma ditzagun. Aurreiritziriak albo batera utzita, ingurua eta jokuan dauden elementuak, aztertuz; ahalegin handiz, ilusioz eta bokazioz arlo honetan lan egiten duten profesionalen iritziak, kontuan hartuz; familiak ere entzunez eta batez ere, hiri honetako 0 eta 3 urte tarteko haurren eskubideei erreparatuz eta horiek errespetatuz.