2026-07-29
Blog Page 494

Bizkaiko eraikuntzako patronalak ez du nahi sektoreko lan baldintzak duinduko dituen hitzarmen bat

Aritz Sorzabal
-
0
Bizkaiko eraikuntzako patronalak ez du nahi sektoreko lan baldintzak duinduko dituen hitzarmen bat

Bizkaiko Eraikuntzako Hitzarmenaren negoziazio-mahaiaren hirugarren bilera egin da. Bigarren bileraren ondoren sindikatu guztiok gure plataformak aurkeztu genituen eta, gaurko bileraren aurretik, LABek patronalari eskatu zion berea aurkez zezala. 

Patronala esku hutsik etorri da, ez du inolako plataformarik ekarri. Argi utzi duena izan da bere asmoa ez dela sektoreko langileek bizi duten egoerari konponbideak emango dizkien hitzarmena negoziatzea, oso txikiak izango diren soldata igoeretan oinarritutako gutxieneko akordio bat negoziatzea baizik, hau da, apurrak eskaintzen dizkigu. Mahai gainean jartzen duen aitzakia da ez dela momentua egungo egoera dela eta, eta LABetik gogora arazten diogu patronalarentzat inoiz ez dela une egokia izan sektoreko lan-baldintzak duintzeko. 

LABen oso argi dugu ez dugula onartuko soilik soldata igoera oso txikiak jasoko dituen hitzarmen bat eta horregatik, hitzarmen honetan, funtsezko bi helburu zehaztu ditugu. Batetik, hitzarmena derrigor bete beharrekoa izatea eta bestetik, sektoreko prekaritatea murriztea.

Horretarako aldarrikapen hauek jaso ditugu gure plataforman:

  • EAEko KPIaren gainetik dauden soldata igoera duinak.
  • Sindikatu guztiok, patronalak eta lan ikuskaritzak osatutako Batzorde baten sorrera, hitzarmena eta lan-osasun eta segurtasuneko araudia betetzen direla bermatuko duena orokorrean, eta zehazki azpikontratetan.
  • Hitzarmena betetzen ez duten enpresei kontratua desegitea.
  • Sektoreko lan-egutegia eta aparteko orduak ezabatzea. 
  • Lanaldia murriztea.
  • Sektoreko langileak lan erreformatik babestuko dituzten neurriak.
  • Subrogazioa azpikontratetako langile guztientzat edozein delarik bere jarduera edo lan mota, publikoa edo pribatua.
  • Berdintasun Batzorde baten sorrera sexuagatiko edozein diskriminazio mota ezabatzeko helburuarekin.
  • Erretiro partziala eta errelebo kontratua.
  • Gure plataformak kolektibo espezifikoetako egoerak ere jaso nahi izan ditugu, hala nola errepideen mantenua, lan bertikalak…

Ez du ematen patronala negoziazioan gai hauei ekiteko prest dagoenik eta beldur gara nahi duena dela akordio bat ixtea sektoreko lan-baldintzak hobetuko dituen benetako neurririk hartu gabe. Horregatik, LABen uste dugu patronalaren asmoen aurrean dagoen bide bakarra sektorearen aktibazio eta mobilizazioa dela.

Hitzarmen duina eskatzen diogu CECOBIri Bizkaiko elikadura merkataritzan, langileek egindako lana baloratzeko

Aritz Sorzabal
-
0
Hitzarmen duina eskatzen diogu CECOBIri Bizkaiko elikadura merkataritzan, langileek egindako lana baloratzeko

Supermerkatuetako langileak ezinbesteko langileak izan gara, gara eta izango gara. Herritarrak etxean itxita zeuden bitartean, gu lehen lerroan egon ginen gure onena ematen. Beldurra, babes-neurrien falta, urduritasuna eta estres maila jasanezinak jasaten genituen.

Une honetan, Bizkaiko Elikaduraren Hitzarmen Kolektiboa negoziatzen ari gara, eta bertan islatu beharko litzateke egin dugun ahalegina eta gure zerbitzuaren funtsezko izaera, gure lan-baldintzak hobetuz.

Baina, errealitatetik urrun, CECOBIren proposamen atzerakoiak aurkitu ditugu, hala nola soldata-igoerak emaitza ekonomikoei lotzea, edo ELAren proposamena, handizkako enpresen kolektiboko 1.700 lankide baino gehiago atzerapenik gabe uztea planteatuz. CECOBIk eta ELAk egin azken proposamenean bitan zatitu nahi du sektorea eta lehen eta bigarren mailako beharginak sortu nahi ditu. LABek ez du bereizketa hori onartuko.

CECOBIrentzat dena gutxi da. Hau ez da murrizketa bakarra eta gehiago nahi ditu:

–  Lanaldia 4 ordutan murriztu nahi du bi urtetan.

–  Urtean lau larunbat libratzea.

–  Udako larunbatetan lan egitearekin negoziatzeko aukera zabaldu nahi du.

–  Jaki prestatuen salerosketa igandetara zabaldu nahi du.

–  Eguberri eta gabon zahar egunetan 18:00etan itxi nahi du.

–  Soldata-igoerak, 2019rako +%1,2a, 2020rako +%0,80a eta 2021, 2022 eta 2023rako KPI + %0,50a; handizkako enpresetako langileek ez dute atzerapenik kobratuko.

CECOBIk murrizketak baino eskaintzen ez dituen bitartean, iraingarria da ikustea sektoreko enpresa garrantzitsuak beren emaitza ekonomikoak publiko egiten hasi direla, adibidez; 2020. urteko ekitaldian BM Supermercados-en salmentak nabarmen hazi ziren, %23, 954 milioi euro metatzeraino.

Garaia da patronala jarreraz aldaraz dezagun, eta negoziazio kolektiboari egiten dion blokeoa amai dadin, horrela Bizkaiko elikaduran dihardugun beharginok bizi dugun egoerari aurre egin ahal izan diezaiogun egiazki, eta soldata igoerekin eta aberastasuna banatuz, prekaritatea eta bazterkeria desagerraraz daitezen, alegia, Bizkaian dauden sektoreko 8.000 langile baino gehiagori lan baldintzak hobetuz, bizitza duina izan dezagun.

LABek jarrera-aldaketa eskatzen du, ad hoc ez aplikatzeko proposamena baztertzeko, eta sektoreko problematikari erantzuna emango dion herrialdeko hitzarmen bat ahalbidetzeko, funtsezkoak garela eta azken urte honetan egindako ahalegina kontuan hartuko dituena, eta gure lanari balioa emango diona. Borrokak batu behar ditugu patronalari ahalik eta erantzun irmoena eta sendoena eman diezaiogun, horrela, sektorea osatzen duten enpresetan langile kopurua handia nahiz txikia izan, ez dadin negoziazio kolektiboak eta gure hitzarmenak hamarkadetan izan duten erreferentzialtasuna galdu.

Bihar asteazkena, apirilaren 14an, 15:00etan, elkarretaratzea egingo dugu Hitzarmenaren Negoziazio Batzordearen bilera egiten den bitartean Bilbooko Lan Harremanen Kontseiluaren aurrean (Urkixu Zumarkalea, 2), Bizkaiko elikadura- merkataritzako 8.000 langile baino gehiagoren aurrean patronalak duen nagusikeria horren aurrean gure gaitzespenik sakonena adierazteko. Izan ere, aho betean “ezinbestekoak” garela diote, baina, egia esateko, haien aitorpena gu mehatxatzera mugatzen da, Bizkaiko elikadura arloko langileen borrokaren ondorioz hainbat hamarkadatan lortutako lan eskubideen murrizketarekin irents dezagun.

“CCOOk eta UGTk berriz ere saldu gaituzte”

Aritz Sorzabal
-
0
“CCOOk eta UGTk berriz ere saldu gaituzte”

Apirilaren 13aren etorrerarekin zen hastekoa Nafarroan Garbiketen lau eguneko greba, baina CCOO eta UGTren saldukeriagatik bertan behera gelditu da. Hala salatu dute langileek Iruñean.

Hain zuzen ere, LAB, ELA eta Solidari sindikatuok deituta, garbitzaileek batzarra egin dute, eta, ondoren, mobilizatu dira. CCOO eta UGTren egoitzatik igaro dira, Nafarroako Gobernuaren aurrean amaitzeko, zein ere patronalarekin lerratu da auzi honetan.

Sestaoko kaleak hartuko ditugu larunbatean, Ezkerraldearen etorkizunaren defentsan

Aritz Sorzabal
-
0
Sestaoko kaleak hartuko ditugu larunbatean, Ezkerraldearen etorkizunaren defentsan

Hainbat enpresa batzordek, eragilek eta sindikatuk agerraldia egin dugu, larunbaterako deitutako manifestazioa iragartzeko. Sestaoko Kasko plazatik abiatuko da mobilizazioa, 12:00etan.

Hau da igorritako oharra, gaurko prentsaurrekoaren harira:

GAURKO BORROKA, EZKERRALDEAREN ETORKIZUNA

Ezkerraldeko zein Meatzaldeko hainbat enpresa-batzorde, herri-mugimendu eta sindikatuk kalera irteteko deia egin nahi dugu, eskualdean enplegu eta bizimodu duina izateko eskubidearen alde.

Modu bakarra dugu etengabe jasaten ari garen erasoei aurre egiteko: kalera irten eta erantzun kolektiboa ematea. Geuk pasa behar dugu erasora, politiken oinarria pertsonen bizitza izan dadin, eta ez kapitala esku gutxitan metatzea. Horregatik, ozen aldarrikatu nahi dugu gaurko borrokak Ezkerraldeko jendearen etorkizuna markatuko duela.

UNEAREN IRAKURKETA

Eskualdean desindustrializazio prozesu lazgarria ari gara pairatzen. Garai batean euskal industriaren aitzindari izan zena gaur langabezia eta prekarietate tasarik handienak dituen eskualdea dugu; merkataritzako multinazional erraldoiek hartu dute industriaren lekua, eta gure lan baldintzak prekarizatu dituzte. Gaur La Navaleko ateetan gaude; hemen ere badirudi ontziolaren ordez planta logistiko bat sortuko dela, enplegu gutxi sortuko duena, eta gainera oso kaskarra.

Azken hiletan sektore, enpresa eta kolektibo ugari atera gara kalera injustizia hauek salatzeko. Hainbat borrokaren lekuko izan gara: Erresidentziak, Osakidetza, ITP-PCB, San Juan de Dios, Petronor, Mediapost… Sektoreen borrokak, esaterako zaintzako langileena, etxegabetzeen kontrako mugimenduarena, mugimendu feministarena edota pentsiodunena; hauek pentsio duinak aldarrikatzen dituzte, gutxienez 1.080€koak; ostalaritzako langileen borroka ere hor dago: lehenago hila amaitzeko lanak zituzten, baina orain ezin dute hasi ere, erakundeek ahaztu egin baitituzte, albo- kalte gisa hartzen dituztelako.

Azpian sinatzen dugun kolektibo eta enpresa-batzordeek aldarrikatzen dugu kalitatezko gizarte- zerbitzuak behar ditugula, gertukoak eta ondo kudeatuak; gastu sozialera diru gehiago bideratu behar da, ez gastu militarrera, ez eta burdinbidearen hegoaldeko saihesbidera ere. Salatu beharra dago ere europar funtsak jasotzeko derrigorrezkoak izango direla murrizketa sozialak, eta lan erreforma edo pentsioen erreforma ez dituztela inola ere indargabetu nahi; azaleko aldaketa batzuk egin eta kitto, hori nahi dute.

MOBILIZAZIOA. APIRILAREN 17A. SESTAOKO KASKO PLAZA, EGUERDIKO 12AK

Asko dago jokoan. Unea oso larria da. Pandemiatik atera gaitezke justizia sozial handiagoa lortuz; baina, beti bezala, gure lepotik aberasten jarraitu nahi dute, eta ez gaude prest krisi hau ere ordaintzeko. Ezin dugu beste aldera begira geratu. Inor ez da salbu. Egoera hau ez da banakoen arazoa, enpresa edo sektore jakin batena. Inoiz baino areago mobilizatu beharra dago, enpleguaren alde, lan- eta gizarte-eskubideen alde, kalitatezko zerbitzu publikoak eta gizarte-gastu handiagoa aldarrikatzeko, zerga-erreforma egin dadin gehien dutenek gehiago ordain dezaten… Hots, enplegu eta bizimodu duinaren alde; gure eskualdearentzako etorkizunaren alde.

Horregatik, dei egiten dugu Sestaoko kaleak hartzera, datorren zapatuan, hilak 17, eguerdiko 12etan Kasko Plazatik hasita. Manifestazio plural honetan protagonismo berezia izango du ITP-PCB, San Juan de Dios, Petronor eta Mediaposten borrokak; indarrak bat egingo ditugu borrokatzeko, nork bere lan eremutik harago, azpian aipatzen diren kolektiboekin batera, Ezkerraldeak etorkizuna izan dezan.

Pentsio sistema publikoaren desegitea salatzen dugu

Aritz Sorzabal
-
0
Pentsio sistema publikoaren desegitea salatzen dugu

Escriva ministroak egindako proposamenaren aurrean, LABek adierazi nahi du pentsio sistema publikoaren desegitearen iragarpenaren aurrean gaudela, faszikuluka ematen ari dena eta sindikatuak kezkaz ikusten duena.

Bizitza osoa lanean aritu eta gero langileok erretiro duin baterako eskubidea dugu eta jubilazio adina atzeratzeko pizgarri ekonomikoak planteatzearen ideia erabat baztertzen dugu. Gainera, ministroak kontrakoa esan arrean, gazteen sarbidea lan merkatura zaildu egingo litzateke bere proposamenarekin, zentzugabekeria bat iruditzen zaiguna.

Egoera honen aurrean eta estatuko sistema publikoa deuseztatzen ari diren une honetan, LABek berriro ere aldarrikatzen du Euskal Herrirako pentsio sistema propioa. Premiazkoa iruditzen zaigu. Horretarako, enplegu eta soldata duinak beharko lirateke sistemak finantziazio duina izan dezan, zerga erreforma eta soldata altuen kotizazio topeak altxatzearekin batera. Honekin lotuta, hainbat proposamen jaso ditu LABek bere Programa Sozioekonomikoan, Gizarte Segurantzarako Legean.

Amaitzeko, LABek dei egiten du pentsionisten mugimenduarekin batera kalera ateratzera Toledoko Itunaren gomendioei eta Madriletik datozen erreformei aurre egiteko. Bide horretan sindikatuak bere ekarpena egiten jarraituko du, mobilizazioetan parte hartuz eta etor daitezkeen mugarri berriak ere sustatuz, Lan Harremanak eta Babes Sozialerako Esparru Propioa aldarrikatuz.

Bost eguneko greba Wärtsilän, lau kaleratu egon ostean

Aritz Sorzabal
-
0
Bost eguneko greba Wärtsilän, lau kaleratu egon ostean

Enpresak bapateko 4 kaleratze egin zituen Bermeoko lan zentruan egiten diren lan batzuk deslokalizatzeko.

Kasuren batean 40 urte baino gehiagoko ibilbidea duten langileen kaleratzeak izan ziren. Enpresa Batzordearekin hitz egin gabe eta zuzenean kaltetuei inongo aukerarik eskeini gabe hartu zuen erabakia enpresak; eta batzordeak berak eskatu zion enpresari erabakia bertan behera uzteko eta mahai baten inguruan eztabaidatzeko hartu behar diren erabakiak.

Enpresak ez zuenez eskaera onartu, langileek greba abiatu dute, hasiera batean 5 egunetakoa (atzotik ostiralera), 4 lankideoak lanpostuak defendatzeko eta bide batez beraienak defendatzeko.

Wärstilä enpresan zehar hedatutako multinazional bat dela seinalatu behar da, itsasontzien motorren alorrean aritzen dena. Erabakia lana berrantolatzeko nahi baten ondorioa da, pertsonak kontuan izan gabe, eta ez da langile hauek enpresako beste lekuren baten kokatzeko aukera aztertu ere, nahiz eta ehundaka aparteko ordu egiten diren urtean.

Hau guztia dela eta LAB eta ELAko Batzordeak langilegoa grebara deitu zuen lanpostuen kontrako erasoari aurre egiteko, eta greba gehiengo zabal bat babesten ari da.

CCOO eta UGT sindikatuek Nafarroako Garbiketetako langileak saldu dituzte, greba bertan behera utzita eta 2019 eta 2020ko soldaten izoztea onartuta

Aritz Sorzabal
-
0
CCOO eta UGT sindikatuek Nafarroako Garbiketetako langileak saldu dituzte, greba bertan behera utzita eta 2019 eta 2020ko soldaten izoztea onartuta

Apirilaren 13tik 16ra Nafarroa osoan eginen zen Garbiketen sektoreko greba hasteko ordu gutxi falta zirela, CCOOk greba-batzordetik at deituriko hitzarmena negoziatzeko bilera batean, CCOO eta UGT sindikatuek akordioa lortu dute patronalarekin, dagoeneko mahai gainean zegoen patronalaren eskaintza oso modu txikian hobetzen duena.

LABen iritziz, akordio horrek ez du betetzen grebaren helburu bakar bat ere, soldata arrakala eta sektoreko prekaritatea betikotzen ditu, eta malgutasun handiagoa ematen du ordu osagarrien zabaltzea legeak markatzen duen goi gradura eramanez.

LAB, ELA eta Solidari sindikatuek dei egiten diete langileei apirilak 13, goizeko 11:00etan Iruñeko Gurutze plazara joateko, sektoreak markaturiko helburuak indar handiagoz erreklamatzen segitzeko, hala nola, soldata-arrakalaren bukaeran aurrera egitea eta sektorean partzialtasunak dakarren prekaritatea bukatzea.

Azkenik, LABek Garbiketen sektoreko langile guztiak animatu nahi ditu hilabete hauetan hasitako borrokaren kemen eta bultzadarekin jarraitzeko, eta gaur egun CCOOk eta UGTk dagoeneko ez duten gehiengo sindikala zabaltzen segitzeko.

Garbiketetako sindikatuok Nafarroako Gobernuak ezarritako gutxieneko zerbitzuak salatu ditugu, ia %100ekoak baitira

Aritz Sorzabal
-
0
Garbiketetako sindikatuok Nafarroako Gobernuak ezarritako gutxieneko zerbitzuak salatu ditugu, ia %100ekoak baitira

Bortz sindikatuetako Garbiketa ataleko arduradunak Nafarroako Parlamentuaren parean agertu gara, grebaren bezperan, Nafarroako Gobernuak ezarritako gutxieneko zerbitzuak salatzeko. Izan ere, zerbitzu horiek gehiegizkoak dira, kasu askotan ia %100koak baitira. Garbiketen greba apirilaren 13tik 16era eginen da, biak barne.

LAB, CCOO, ELA, UGT eta Solidari sindikatuok salatu dugu Nafarroako Gobernuak goitik behera aldatu dituela apirilaren 6ko 82/2021 Foru Aginduan argitaratuta zituen gutxieneko zerbitzuak, eta “akats” onartezinak aitzakiatzat hartuta. Orain, Gobernuak ia %100eko gutxieneko zerbitzuak ezarri ditu Ekonomia eta Ogasunean, Hezkuntzan edo Osasun departamentuan, baita gaur egun garbitzen ez diren edo itxita dauden eraikinetan ere. Nola azaltzen da udal bateko garbitzaile batek greba egitea eta museo batekoak eskubide hori ez izatea? Sindikatuok oso larritzat jotzen ditugu azken inposizio horiek, Nafarroako Gobernuak azpikontrataturiko langileei grebarako oinarrizko eskubidea kentzen baitiete.

“Ezin da izan progresista eta berdintasunaren defendatzailea deitzen den Gobernuak gobernu horren bulegoetarako zerbitzuak ematen dituzten milaka langileren greba-eskubidea praktikan jartzea eragoztea”, adierazi dugu sindikatuon ordezkariok. “Sinbolismoetatik urruti, adierazpenetatik urruti, Nafarroako Gobernuak, ekintzen bidez, patronalaren alde jartzea erabaki du”.

Sindikatuon ordezkarion arabera, horrela ez da berdintasuna defendatzen. “Sektore feminizatua gara, lanaldi partzialekoa, eta, gainera, orain, Nafarroako Gobernuak grebarako dugun oinarrizko eskubidea erabiltzea galarazten digu, sindikatu guztiek deitutako greba eta gure hitzarmena eta lan-baldintzak hobetzeko helburu duen greba batean. Hori dela eta, bateraezinak iruditzen zaizkigu Gobernua berdintasunarekin konprometituta daudela dioten mezuak, eta grebarako eskubidea kentzea soldata arrakala eta genero-diskriminazioa bukatzea bilatzen duten langileei”.

“Garbitzaileak funtsezkoak gara”, berretsi dugu sindikalistok. “Eta gure hitzarmena funtsezkoa ere badenez, Nafarroako Gobernuari eskatzen diogu berehala zuzentzeko gehiegizko gutxieneko zerbitzu horiek, eta grebarako eskubidea erabiltzeko aukera emateko”.

Azkenik, LAB, CCOO, ELA, UGT eta Solidari sindikatuok jakinarazi nahi izan dugu sektoreko 62 enpresaren ordezkari sindikalek bat egin dutela bihar, apirilak 13, 11:00etan, Iruñeko Gurutze plazatik aterako den manifestazioarekin.

Enplegu publikoa sortzeko eta egonkortzeko aldarria kalera atera dugu, apirilaren 22ko greba ardatz

Aritz Sorzabal
-
0
Enplegu publikoa sortzeko eta egonkortzeko aldarria kalera atera dugu, apirilaren 22ko greba ardatz

Sektore publikoko delegatuen batzarra egin dugu Donostiako Kursaalen, apirilaren 22rako EAEn deitutako greba lantzeko,  sektorearen behin-behinekotasun ikaragarria eta honen aurrean LABek egiten dituen proposamenetan sakonduz. Ondoren, mobilizazioa egin dugu Eusko Jaurlaritzaren egoitza nagusiaren atariraino.

Mobilizazioaren hasieran, Garbiñe Aranburu idazkari nagusiak adierazpenak egin ditu hedabideen aurrean. Delegatuekin batzarrak egiten ari garela azaldu du, eta gaurkoa sektore publikoko delegatuena izan dela: “Testuinguruaren irakurketa konpartitu dugu eta apirilaren 22ko greba deialdia prestatzen aritu gara. Urteak daramatzagu zerbitzu publikoetan eman diren murrizketak, pribatizazio politikak, inbertsio falta eta enpleguaren kalitate eskasa salatzen”.

Garbiñe Aranbururen hitzetan, “azken hilabete hauetan hezkuntza, osasungintza eta zerbitzu sozialetako langileak kalera atera dira zerbitzu publikoen defentsan, eta, orain, apirilaren 22an, beste aurrera urrats bat ematera goaz, lan-baldintzak eta zerbitzuaren kalitatea guztiz lotuta daudela aldarrikatzeko”.

Grebara eta mobilizaziora aterako gara apirilaren 22an, eta beste horrenbeste egiteko deia egiten diegu zerbitzu publikoetako langileei bi aldarrikapen nagusirekin: “Lehenik eta behin, enplegu berria sortu behar da. Kontuan izan behar da EAEn 20.000 lanpostu daudela, egiturazkoak direnak eta inolako lanpostu zerrendatan aitortuak ez direnak, hau da, iruzurrean daudenak. Horrekin batera ere ratioak murriztea ere beharrezkoa dela iruditzen zaigu. Hortik ere lanpostuak sortzea beharrezkoa da, batez ere hainbat zerbitzu publikotan ematen diren gehiegizko lan zamei interbide bat jartzeko. Bigarren aldarrikapen nagusi batekin ere aterako gara kalera 22an, egonkortasuna eskatzera”.

Azken honi buruz, LABeko idazkari nagusiak jakinarazi du EAEko zerbitzu publikoetan 50.000 pertsona daudela behin-behineko egoeran lanean: “Europako epaitegiek ebatzi duten moduan, iruzurrezko egoera batean ari dira lanean, eta horri ere konponbidea ematea ezinbestekoa da. Horretarako eskatzen duguna da ez dela Madriletik etorriko denaren zain egon behar, ezta epaitegietatik etorriko denaren zain egon behar ere. Horretarako, Jaurlaritzari, lege propio bat eskatzen diogu, egonkortasun lege propio bat, lekuan leku, bertako errealitatea kontuan hartuta, egonkortasun prozesuak bultzatzeko eta negoziazio kolektiboan adostuak izateko”.

1...493494495...1,638Page 494 of 1,638

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus