2026-07-25
Blog Page 475

Garraiolarien lan istripuak sektorean ezartzen diren lan baldintza prekarioen ondorio dira

Aritz Sorzabal
-
0
Garraiolarien lan istripuak sektorean ezartzen diren lan baldintza prekarioen ondorio dira

Aste gogorra izaten ari da langile klasearentzat. Atzo jakin izan genuen Gasteizen, Lakuan, 48 urteko langile bat altueratik erori eta zauri larrien ondorioz zendu zela. Gaur, berriz, Laudioko Guardian enpresako azpikontrata den Oiartzungo Transportes Gexako 47 urteko langile bat hil da, atzo istripu larria izan ondoren, Orozkoko BP gasolindegian, karga gainera erorita.

Euskal Herrian 2021 urtea hasi denetik, gutxienez, 26 langile bizia galdu dute lanean edo lanaren ondorioz.

Lehenik eta behin, LAB sindikatutik hildako bi langileen familia, lankide eta gertukoei gure elkartasun eta babesa adierazi nahi diegu.

Beste sektore askotan gertatzen den moduan, garraioan ere lan baldintzak gero eta prekarioagoak dira. Azpimaragarria da garraio sektorea osatzen duten garraiolari asko autonomoak direla. Gaur egun eta urteetan zehar administrazioen utzikeriak eragindako egoera dela eta, gidari nahiz garraiolarien lan baldintzak oso kaskarrak dira. Lan zama, lanaldi luzeak, kargak eta  deskargak … sektoreak bizi duen egoera oso larria da.

Administrazioek beste alde batera begiratzen dute, sektoreak bizi duen egoeraren ezagun izan arren. Azpimarragarria da garraiolariek jasaten dituzten lan istripuen gehiengoak errepideetako merkantzien garraioak urte luzez pairatzen daraman prekaritatea eta desregulazio basatia agerian uzten dituela. Gainera, garraiolarien eskubide eza ere nabaria da. Izan ere, lana mantendu ahal izateko, askotan kargatzaileen presak, ezinezko ordutegiak, gehiegizko pisudun kargak, prezio baxuak, lan egun luzeak eta atseden eza jasan behar dituzte.

Askotan, gainera, zamaren deskarga egitera behartuak dira. Hauek eta honelako beste hainbat arrazoi dira lana modu seguru eta duinean egitea oztopatzen dutenak, garraiolarien bizitza arriskuan jartzeaz gain. Arazo hauek dira administrazioak behin eta berriz ezkutatzen saiatzen direnak, beste alde batera begiratuz gehienetan, beraien nahia garraio merkea lortzea baita, edozein preziotan.

Garraiolarien lan istripuak ez dira  estatistika ofizialetan azaltzen: errepide istriputzat jotzen dira, hau ere salatu nahi dugu.

Lakuako Gobernuari langileen osasuna lehenesteko eta segurtasuna eta bizitza bermatzeko exigitzen diogu, langileon bizitza eta osasuna erdigunean jarriko dituen politika publikoak garatzea. Horretarako, egungo politiken norabidea aldatzea exigitzen diogu, lan osasun arloan, egiazko politikak bultzatu eta lanari lotu gaixotasunen benetako zergatiei ekinez. Enplegu duina eta kalitatezkoa sortzeak lehentasuna izan behar du Gasteizko Gobernuarentzat .

Politikak aldatzeko garaia da, baditugu alternatibak, borondate politikoa bakarrik falta da. Lan eta bizitza duina bermatu behar da laneko indarkeriarekin amaitzeko, lanetik bizirik eta osasuntsu itzultzeko eskubidea dugulako. LAB sindikatutik lanean eta borrokan jarraituko dugu langileen segurtasun, osasun eta bizitzen alde.

Elikagai merkataritzako langileak ere funtsezkoak direla aldarrikatu dugu Iruñean, supermerkatuz supermerkatu

Aritz Sorzabal
-
0
Elikagai merkataritzako langileak ere funtsezkoak direla aldarrikatu dugu Iruñean, supermerkatuz supermerkatu

Egunotan egiten ari garen dinamika ekintzailearen harira, beste mobilizazio bat egin dugu; oraingoan, Iruñean. Hain zuzen ere, elikagai merkataritzako langileak funtsezkoak direla aldarrikatu eta euren lan baldintzen prekarizazioa salatu dugu. Hainbat supermerkatu bisitatu ditugu ekintza ibiltari baten bitartez, sektore honetako langileentzat lan baldintza duinak exijitzeko.

Basaurin jazotako eraso homofoboa salatu eta erasoa pairatu zuen pertsonari elkartasun guztia adierazten diogu

Aritz Sorzabal
-
0
Basaurin jazotako eraso homofoboa salatu eta erasoa pairatu zuen pertsonari elkartasun guztia adierazten diogu

Onartezina da edozein pertsona bere sexu-genero identitateagatik edo joerengatik erasotzea; argi daukagu eraso hau faxismoaren oldarraldi berriaren barruan kokatu behar dugula. Azken boladan ikusi dezakegu nola balore erreakzionarioen suspertzeak horrelako erasoak ugaritu dituen eta langileon eta gazton kontrako ofentsiba baten aurrean kokatzen garen.

Argi dago lantokiak, kaleak bezala, ez direla espazio seguruak heteroarautik at kokatzen diren pertsona eta kolektiboentzat. Horretaz jakitun, LAB sindikatuak orain dela urte batzuk gida eta protokolo bat argitaratu zituen lan zentroetan ere tresnak garatzeko eta horrelako erasoei aurre egiteko.

Ezinbestekoa da autodefentsa sareak osatzea eta faxismoaren kontrako erantzuna langile klasearen aniztasunetik eraikitzea. Bide horretan eta orain arte bezala, LAB prest dago ekarpena egiteko eta ekintza soziosindikalaren bidez aurrepausoak emateko. Zentzu horretan, LAB Sindikatuak bihar, osteguna, arratsaldeko 19.00etan Basauriko Udaletxetik abiatuko den manifestazioan parte hartzera deitu nahi du. Erasorik ez erantzunik gabe.

EAEko Ikastoletako Lan Hitzarmena berritzeko aurreakordioa sinatu dugu #LortuDugu

Aritz Sorzabal
-
0
EAEko Ikastoletako Lan Hitzarmena berritzeko aurreakordioa sinatu dugu #LortuDugu

Covid 19aren pandemiaren ondorio ekonomikoek eta jaiotze tasaren jaitsierak baldintzatutako testuinguruan hasitako negoziazio-prozesuak fruituak eman ditu. LAB sindikatuak Ikastolen Elkartearekin eta Eusko Ikastola Batzarekin Lan Hitzarmena berritzeko akordioa lortu du.

Negoziazio mahaian adostasun batera iristeko moduko edukiak egon zitezkeela baloratu orduko, gure delegatu, afiliatu eta sindikatuko beste kideekin proposamena kontrastatzeari ekin diogu, gehiengoaren oniritzia jasoz.

Adosturiko akordioan, Lan-hitzarmen berriak jaso beharreko hobekuntzak zehazten dira, eta bertan bi aldeok, gehienez 3 hilabeteko epean, Lan Hitzarmen berria idazteko konpromisoa hartu dugu.

Era berean, testuinguru zailean eman den ikasturte honetan ere, azken urte luzeetan bezala, ikastoletako langile guztien enplegua mantentzea lortu dugu, kaleratzeak ekidinez.

Hona hemen akordioak dituen hobekuntza nagusiak:

-Lan-sariak: 2021ean oinarrizko soldata eta antzinatasunean lan-sari baxuenak dituzten lan kategorietarako %1,75 soldata igoera. Gainerako kategorietarako, %1,4.

-DBHko maisu-maistren soldata parekatzea.

-Gurasotasun-baimena: bi gurasoen baimena berdintzen da (16 + 2 aste).

-Mantenu-langile eta sukaldari-languntzaile kategorien desagerpena. Langile hauek goiko kategoria hartuko dute.

-Lan-kargaren arintzea:

.Hezkuntza Laguntza Espezialistek astean ordu erdi osagarri gehiago edukiko dute.

.Haur Hezkuntzako bigarren zikloko tutoreei ikasturteko eskola-orduak 15 orduz jaitsiko zaizkie.

.Lehen Hezkuntzako tutoreei ikasturteko eskola-orduak 20 orduz jaitsiko zaizki

-Ikastoletako langileen kudeaketan ikuspegi nazionalerako urratsak:

.Ikastoletako kontratazio batzordeek Euskal Herriko Ikastolen Elkarteko sarean metaturiko lan-esperientzia aintzathartu beharko dute.

.Euskal Herriko Ikastoletan eszedente eta beharren prozedura gauzatzeko orduan Euskal Herri osoko ikastolak hartuko dira kontuan.

-Klausula feministak:

.Ikastola guztietan berdintasun planak gauzatzeko prozedura eta epeak zehazten dira.

.Indarkeria matxista pairatu duten langileei nahitaezko eszedentzia hartzeko eskubidea aitortuko zaie.

Eskertzekoa da honaino heltzeko LABeko delegatuek eta kideek egindako lana. Aurrerantzean ere erronka handiak ditugu. Duela urtebete 2018-2019ko EAEko Ikastoletako Lan Hitzarmena argitaratu zen, eta orain 2021erako akordioa lortu dugu hainbat hobekuntza jasoz. 2022ko urtarrilean Lan Hitzarmen berri bat negoziatzeari ekingo diogu, urratsez urrats langileen eskubideen hobekuntzan aurrerapausoak emanez.

LAB, orain arte bezala, lehen lerroan egongo da Ikastoletako langileen alboan borrokan, bai ikasgeletan eta bai kalean.

Urratsez urrats, lan baldintza duinetan oinarritutako Euskal Eskola Publiko Komunitarioa iruten!

Nafarroako adingabeen zentro batzuetan izan diren azken erasoak salatu ditugu, eta publifikazioa eskatu dugu

Aritz Sorzabal
-
0
Nafarroako adingabeen zentro batzuetan izan diren azken erasoak salatu ditugu, eta publifikazioa eskatu dugu

LAB sindikatuak elkarretaratzea egin du gaur Iruñean, Eskubide Sozialen Departamentuaren ondoan, salatzeko Nafarroako Gobernuak pribatizatu eta azpikontrataturiko adingabeen zentroetan azken asteetan izan diren larritasun handiko gertakariak —langile eta erabiltzaileentzako arrisku handikoak batzuk—. LABek funtsezko gizarte-zerbitzuak publifikatzea eskatzen du, egiturazko prekaritate jarraitua ezabatzeko bidean.

Gertakari larriak izan ziren: bi langile ia bota zituzten eskaileretan behera , gela batean sutea, adingabeen arteko liskarrak tresna ebakitzaileekin, eta, azkenik, segurtasuneko langileen aurkako eraso bat; eraso horren ondorioz, langile batek orkatila, tibia eta peronea hautsita zituen, eta beste langile batek ubelduak eta arnasa hartzeko zailtasunak izan zituen, zapalduta eduki zutelako.  LABek bere elkartasunik handiena helarazi nahi die baldintzarik txarrenetan onena ematen ari diren pertsona horiei.

Kasu horiek ez dira bakanak, ez. Egiturazko prekaritate-egoera luze baten ondorioa baino ez dira, funtsezko gizarte-zerbitzuen pribatizazioak eragindakoak: zuzeneko arretako langileen eta segurtasuneko langileen ratio baxua (halakorik dagoenean); enpresetako eta Administrazioko balorazio-langileen ratio baxua; soldata txikiak; aldaketa arbitrarioak titulazioen eskakizunetan; eraso fisikoak eta hitzezkoak; lan-arriskuen eta neurri zuzentzaileen prebentzio falta; mehatxuak eta aldi baterako kontratazio ilegala, abusuzkoa eta justifikaziorik gabea;  zerbitzuen kontrol publikorik ez eta aurreikuspenik, baliabiderik, plangintzarik eta gardentasunik ere ez; sindikatuetako ordezkariei informaziorik ez ematea,  lidergoa duten postuetan eta aginte-kateetan kalitate eskasa; Gobernuari informazioa ezkutatzea…

Eta zer eginen du Nafarroako Gobernuak egoera honen guztiaren aurrean? Errotik konponduko du arazoa inoiz esku pribatuetan egon behar ez zuten zerbitzu horiek guztiak publiko eginez? Eta zerbitzuak publifikatzen diren bitartean, ezarriko ditu enpresa horiek kontrolatzeko mekanismorik? Bermatuko du langileak eta erabiltzaileak bizirik iraunen dutela? Hartuko ditu neurriak langileen eskubideak sistematikoki urratzen dituzten enpresa horien aurka? Zergatik ez dute sekula ondoriorik izaten enpresa horiek?

Zer gehiago gertatu behar da neurriak hartzeko? LABen ustez, premiazkoa da arazo horri behingoz heltzea, arazoaren errora joatea, funtsezko gizarte-zerbitzu horiek publifikatzea eta, behin betikoz, zerbitzu horiek azpikontratatzeko aukera debekatzea.

Sindikatuok hezkuntza publikoko sektore guztietan ratioak jaisteko, enplegu publikoa sortzeko eta kontsolidatzeko galdegin diogu EAEko Hezkuntza Sailari

Aritz Sorzabal
-
0
Sindikatuok hezkuntza publikoko sektore guztietan ratioak jaisteko, enplegu publikoa sortzeko eta kontsolidatzeko galdegin diogu EAEko Hezkuntza Sailari

EAEko hezkuntza publikoan ordezkaritza dugun LAB, STEILAS, ELA, CCOO eta UGT sindikatuok elkarretaratzea egin dugu Jaurlaritzak Gasteizen duen egoitzaren aurrean, “Hezkuntza publikoa indartu! Ratioak jaitsi, enplegua sortu eta kontsolidatu!” lemarekin.

Sindikatuon ohar bateratua:

EAE-ko azken hauteskunde politikoek, benetako gobernu aldaketa suposatu ez bazuten ere, Hezkuntza Sailaren berrantolaketa bat ekarri zuten. Sail berria egonda ere, hezkuntzako langileok ikasturtea gogor hasi genuen, pandemiari aurre egiteko mobilizazio eta greba dinamika batekin; “aurrez aurreko hezkuntza itzulera seguru eta adostu baten alde”. Aldarrikapenen artean aurrez aurreko hezkuntzaren aldeko apustua egin genuen eta horretaz gain, lehenagotik urgentziazkoa zen lan-kargak eta ratioak murriztea exijitzen genuen, baliabide gehiago eskatzearekin batera. Apurrak eman zizkiguten.

Horretaz gain, mahai sektorialetan negoziaketari bidea ireki zitzaiola pentsarazi nahi izan ziguten baina ikasturtea amaitzear dugun honetan esan dezakegu orokorrean negoziazioek -sektore batzuetan bilera ugari egon diren arren- etekin gutxi eman dutela besteak beste funtsezkoak diren gutxieneko hiru edukietan -ratioak, enpleguaren sorrera eta kontsolidazioa-. Izan ere, hezkuntza publikoko langileon sektore ezberdinetako mahai negoziatzaileetan adierazi bezala, sindikatuontzat edozein akordio lortzeko abiapuntua ratioak eta lan kargak murriztea da. Horrekin batera, apirilean egin genuen greban aldarrikatu bezala, enplegua sortzeko neurri errealak eta kontsolidaziorako tresnak adostu behar ditugu; eta gai hauen inguruan ez dugu gaur gaurkoz Hezkuntza Sailaren aldetik inolako aurrerapausurik ikusi. Gainera, Hezkuntza Sailak ohikoa duen bezala, ikasturtean zehar zenbait erabaki aldebakarrez hartu eta aplikatu ditu, sindikatu eta langileengan izugarrizko kezka eta nahasmena sortuz.

Horixe izan da Pandemiaren kudeaketari dagokionez ere egondako jokaera. Egunotan Hezkuntza Sailburua komunikabideetan ikusi dugu hezkuntzan izandako kudeaketaren arrakastaz hitz egiten. Gogorarazi nahi dugu alabaina, ikastetxeetan aurrera eramandako kudeaketa bertako langileek eginiko lanaren ondorioa izan dela; osasun prebentziorako materiala eta giza baliabideak ez baitziren garaiz iritsi, iritsi direnak ere erabat ez nahikoak izan direla eta ratioak ez direla inoiz jaitsi. Egoera honetan, ikastetxeek plangintza eta protokoloak ahalik eta modu egokienean kudeatzeko egindako esfortzua izugarria izan da. Bestalde, guztiz salatzekoa da, txertaketaren harira egindako kudeaketa eta sortutako nahasmena. Gogoratu behar dugu egungo langile-taldearen kopuru handi bat txertatu gabe dagoela oraindik eta ez dakiela noiz edo zerekin txertatuko duten. Beraz, nabarmena da pandemiaren kudeaketa guztiz inprobisatua eta alde bakarrekoa izan dela.

Gaur gaurkoz gainera, datorren ikasturteari begirako plangintza, antolakuntza eta baliabideak zeintzuk izango diren ere ez zaigu langileon ordezkarioi jakinarazi. Beste behin ere beraz,  Hezkuntza Sailak gai hau langileen ordezkaritzaren negoziazio esparrutik at utzi du bere aldebakarrekotasun borondatea agerian utziz. Edozein kasutan, negoziazio mahaiek argi utzi digute edozer gauza gertatzen dela ere Hezkuntza Sail honek ez duela ratioak jaisteko asmorik,  ez osasun arrazoiengatik, ezta hobekuntza pedagogikoak sustatzeko ere. Hori da Sail honek hezkuntza publikoaren kalitatearen alde egiten duen apustua. Ratioak jaisteko intentziorik ez, eta enplegu sorreraz eta honen zein langileen kontsolidazioaz hitz egiteko borondaterik ere ez!

Hezkuntzako sektore desberdinetan pairatzen dugun behin-behinekotasun maila onartezina da; Haurreskoletako hezitzaileen artean %40koa eta kudeaketa langileen artean %100koa, irakasle funtzionarioetan %41ekoa, heziketa bereziko langileen artean %60koa, eta sukalde eta garbiketako langileen %65koa. Datu larri hauek izan eta aldatzeko borondaterik ez erakusteak agerian uzten du Administrazioak hezkuntza kalitateari eta bere ardurapeko langileei ematen dien balioa.

Horregatik urgentziazko da enplegua eta langileak egonkortzea eta horretarako ezinbestekoa da kontsolidazio prozesuak abiaraztea behin behineko langileek euren lanpostuak kontsolidatu ahal izateko. Kontziente izan behar dugu lanpostuak estrukturalizatu ezean, horiek desagerraraztea errazagoa izango dela, hau da, enplegua suntsitzeko arriskua areagotzen dela, baita zerbitzuak azpikontratatzea eta pribatizatzea ere, hots, prekarizatzea. Ezinbestekoa da pribatizazio dinamika honekin amaitzea bereziki sukalde eta garbitzaileak bezalako sektore prekarizatuetan.

Gaur hemen sinatzen dugun sindikatuok jakinarazi nahi dugu ez dugula Hezkuntza Sail honek orokorrean aplikatzen duen hezkuntza politika pribatizatzailea onartuko eta borrokatzen jarraituko dugula, ez soilik langileen lan baldintzengatik baita zerbitzu publikoaren kalitatearengatik ere. Hori horrela, Hezkuntza Sailari galdegiten diogu, negoziazio mahaiak edukiz bete eta  hezkuntza kalitatean hobetzeko ezinbestekoak diren gaiei heldu diezaiela, besteak beste ratioen jaitsiera, plantillen gazteberritzea eta enpleguaren sorrera zein kontsolidazioaren gaiari.

Datorren ikasturtean gai hauen inguruko erantzunik izan ezean, hemen batu garen sindikatuok mobilizazio dinamikari ekin beste biderik ez digu utziko Hezkuntza Sailak.

Krisia emakumeon* lan baldintzen eta lanpostuen kontura gainditzea onartezina dela salatu dugu Donostiako erdigunean

Aritz Sorzabal
-
0
Krisia emakumeon* lan baldintzen eta lanpostuen kontura gainditzea onartezina dela salatu dugu Donostiako erdigunean

Sektore feminizatuetako langileek bizi duten prekaritatea eta enplegu galera borrokatzeko abiatutako dinamika ekintzailearen baitan, beste ekintza bat egin dugu; Donostian, oraingoan.

Sektore feminizatuetako langileen lana aitortzea, duintzea eta babestea aldarrikatu genuen astelehenean Deustuko zubian, Bilbon. Bada, gaur, sektore feminizatuetako borrokak eta enplegu suntsiketaren salaketa Donostiara eraman dugu. Hain zuzen ere, Gipuzkoako hiriburuko erdigunean dagoen Askatasunaren hiribidea blokeatu dugu, autobus artikulatu batera igota. Bertatik, inor ez dagoela soberan aldarrikatu dugu, sektore feminizatuetako langileek bizi duten prekaritatea eta enplegu galera salatzeaz gain.

Emakume* langileok kalera atera gara, eta egunerokoa eten nahi izan dugu gaurko ekintzarekin: “Gelditu egin nahi izan dugu sektore feminizatuetako egoera salatzeko, emakumeon* lan baldintza prekarioen arduradun nagusiak seinalatzeko eta instituzio zein patronalei mezu bat helarazteko: langabezia izugarria da, eta, hemendik aurrerako joeran, kopurua hau biderkatzeko arrisku handia dago. Krisia ezin da gure lan baldintzen eta lanpostuen kontura gainditu. Eta ezin du isilpean gelditu”.

LABeko ekintzaileek nabarmendu bezala, “emakumeon* lanpostuak ezinbestekoak dira jendartean eta babestu egin behar dira. Nazkatu gara gure aldarrikapenak inon ez jasotzearekin. Nazkatu gara gure kaleratzeak inon ez ateratzearekin”.

Alga eta Inervoleko langileen lan-baldintzak zaintzen jarraituko dugu

Aritz Sorzabal
-
0
Alga eta Inervoleko langileen lan-baldintzak zaintzen jarraituko dugu

Atzo astelehena, ekainaren 7an, 22:00etan hasi behar zen Zaldibarreko Inervol eta Abadiñoko Alga lantegietan deitutako greba mugagabea. Deialdiaren arrazoi nagusiak honakoak ziren: enpresak hilabete honetako soldata ordaintzea (berau ordainduko ez zietela jakinarazi zieten langileei) eta enpresaren informazio ekonomiko-finantzarioari dagokionez, gardena izatea, argi utziz langileak ez zeudela prest zorretan soldata gehiago izateko, are gutxiago topera ari direnean lanean.

Atzo arratsaldean, enpresak hilabete honetako nomina osoa ordaindu, eskatutako dokumentazio ekonomiko-finantzarioa eman eta informazio hori astero emateko konpromisoa hartu zuen, Alga eta Inervoleko enpresa-batzordeak eta bertako langileek uneoro jakin dezaten enpresaren benetako egoera zein den.

Enpresak greba-deialdia eragin zuten eskaera nagusiak bete zituenez, atzo gauean Algako instalazioetan egindako langile batzarrean, gau horretan bertan hastekoa zen greba bertan behera uztea erabaki zuten. 87 langilek greba bertan behera uztearen alde bozkatu zuten, 31k kontra, eta 2 abstentzio egon ziren.

Abadiñoko Alga eta Zaldibarreko Inervol Alga Industria Taldearen barruan daude. Talde honek 18 hilabete daramatza egoera ekonomiko eta finantzario oso larrian, nahiz eta lan-karga handia izan. Gaur egun Amtek taldearen barruan dago. Indiako nazioarteko taldea da hau, herrialde honetan lehiaketa prozesu batean sartuta dagoena.

Dirudienez, lehiaketa hori aste edo hilabete batzuk barru ebatziko da, eta jabe berri bati esleituko zaio. Hala ere, Amtek taldeak Alga Industria Taldearen jabetza hartu zuenetik nabarmen egin du okerrera bere egoerak eta balizko porrotetik gertu egon liteke. Gaur egun, bi nomina baino zerbait gehiago zor zaizkie langileei, atzo ordaindutakotik aparte.

LABetik argi daukagu, enpresaren egoera ikusita, eta enpresaren jabe berri bat etortzen ez den bitartean, mobilizazioetara, greba-deialdietara eta abarretara jo beharko dugula berriro. Etorriko den jabe berriak instalazioak eta makineria berritzeko inbertsioak egin beharko ditu, eta enpresan dirua jarri, langileen zorrei aurre egiteko, kutxa nahikoa izateko, horrela etorkizunean likidezia-tentsiorik ez izateko. Ziur gaude Alga Industria Taldeak etorkizuna duela (bezero onak dauzka, oso lan espezializatua egiten du…), baina pausoak eman behar dira berandu izan baino lehen.

Argi utzi nahi diegu egungo jabeei, eta etorkizunean etor daitezkeenei, ez dugula doanik lan egingo, eta, nolanahi ere, Alga eta Inervoleko langileen lan-baldintzak zaintzen jarraituko dugula.

Electroaceros enpresako grebalariek Nafarroako Gobernuari eskatu diote esku har dezala 37 lanpostuak babesteko

Aritz Sorzabal
-
0
Electroaceros enpresako grebalariek Nafarroako Gobernuari eskatu diote esku har dezala 37 lanpostuak babesteko

Electroaceros-eko Enpresa Batzordea, LABeko bi ordezkarik eta ELAko ordezkari batek osatua, gaur bildu da Iruñean Nafarroako Gobernuko Lan Zerbitzuko zuzendariarekin, langileek soldata ez kobratzearen eta enpresaren etorkizun ilunaren aurrean duten kezkaren berri emateko eta, ahal den neurrian, egoera hori lehenbailehen konpontzeko esku har dezan eskatzeko.

Enpresa Batzordeak, ia langile guztiek astebete greba mugagabean egon ondoren, Nafarroako Gobernuari eskatu dio egoera horretan esku har dezan, uste baitu ezin dela onartu hainbat hamarkadatan aberastu den Nafarroako enpresa batek 37 lanpostu suntsitzea, eta 50 urtetik gorako langileak egoera larrian uztea.

Electroaceros enpresa Astibia familia ezagunekoa da, azken urteotako kudeaketa negargarriaren zuzeneko arduraduna izan den familia. Enpresa Batzordeak behin eta berriz eskatu die jabeei bideragarritasun-plan bat egin dezatela enpresan dauden lanpostuak ziurtatzeko; baina beti erantzun izan diote plantillari egindako erasoen ondorioz, langileen lan-baldintzak nabarmen okertu nahi zituztenak. Gaur egungo egoerara iritsi arte, soldatak behin eta berriz atzeratzea, azken hilabetea ez ordaintzea eta enpresaren etorkizun ilunaren aurrean ziurgabetasuna izatea.

Bien bitartean, jabeek irabaziak izaten jarraitu dute, beren jabetzak bermatzen, bai ondasunen autoalokairuen bidez, bai urteko 80.000 eurotik gorako soldata estratosferikoen bidez, bai sozietate kooperatibo bat eratzetik sozietate mugatu batera pasatuz.

Puntu honetara iritsita, Enpresa Batzordeak Nafarroako Gobernuko Lan Zerbitzuko zuzendariarekin bilera egitea erabaki du, lantegiaren egoeraz duen kezka bertatik bertara azaltzeko eta esku har dezan eskatzeko, alde batetik, 37 lanpostu suntsitzeko mehatxua dela-eta, eta, bertzetik, kalteturiko langile askori, duten adinagatik, lan-merkatua itxi eta gizarte bazterketaren atarian jartzen direlako. Batzordeak positiboki baloratu du Lan zuzendariaren harmena, eta espero du jarrera on horrekin batera langileak babestuko dituzten neurriak hartzea.

Mobilizazioekin jarraituz, ekainaren 1ean abiatutako greba mugagabearekin jarraituko dute Electroaceros-eko langileek, eta kontzentrazioak eginen dituzte ekainaren 9, 10 eta 11n, 11:30ean, Agustindarren industrialdeko Soto de Ainzoain kalean, eta auto-karabana bat ekainaren 19an.

1...474475476...1,637Page 475 of 1,637

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus