2025-12-25
Blog Page 168

Euskal Herriko armagintza enpresek Palestinako sarraskian konplize izateari utzi behar diote

Zubiate(e)ko Aritz
-
0
Euskal Herriko armagintza enpresek Palestinako sarraskian konplize izateari utzi behar diote

Egoitza Getxon duen Sener enpresaren aurrean mobilizazioa egin dugu.

Amaitzear da 2023a, urte beltza, urte latza izan da palestinar herriarentzat. Han erasoek, zibilen hilketek, giza eskubideek urraketek, minak eta sufrimenduak ez dute etenik. Israelen okupazio, kolonizazio eta apartheid politika salatu nahi dugu berriro, eta elkartasuna adierazi Palestinari.

Gaur, bereziki, armagintzan jarri nahi dugu arreta eta gerra arma enpresetan hasten dela salatu. Horregatik mobilizatu gara Getxon, Sener enpresaren aurrean. Sener bezala, Euskal Herrian badira hainbat enpresa armagintzarekin erlazionatuak.

Euren erantzukizuna seinalatu eta sindikatu palestinarren eskariarekin bat egiten dugu: utz diezaiotela Israel armaz hornitzeari, Israelentzat bideratutako armak egiteari eta garraiatzeari utzi behar zaio. Merkataritza militar oro eten egin behar da, genozidioaren konplize izateari utzi behar diote.

Azken mugimendu geopolitikoei dagokienean, AEBk itsaso gorrian bultzatutako operazio militarraren baitan Yemenen esku-hartu izana salatzen dugu, bakea eta egonkortasuna helburu lituzkeen konponbide politikoa bilatu beharrean genozidioa areagotzea dakarrelako. Gatazkak irtenbide diplomatikoa eskatzen du, ez esku-hartze militar gehiago.

Palestinako herriaren suntsiketa eta okupazioa gelditzeko eskatzen dugu. Azken hilabeteetan euskal langile eta sindikatuok mobilizatzen ari gara: EAEko ospitaletan, Bizkaiko zein Nafarroako suhiltzaileen eskutik, CAF enpresan, Bilbon eta Iruñean egindako mobilizazio sindikaletan…

Gaur, berriro, langileok gure elkartasuna eta babesa helarazi nahi diogu palestinar herriari. Eta eskari zehatza ere bai: berehalako su-etena, preso politikoen nahiz errefuxiatuen itzulera, Gazaren desblokeoa eta Nazio Batuen ebazpenetan oinarritutako elkarrizketa eta negoziazio prozesua aldarrikatzen dugu, Palestinaren eskubide nazionalak errespetatuko dituena. Palestinak irtenbide integrala behar du, eta horren baitan, palestinar Estatu baten zilegitasuna aitortzea eta bizitza duinerako eskubide bermatzea palestinarrentzat.

CCOOk, UGTk eta Lankidek KPIa bermatzen ez duen Nafarroako bulegoen hitzarmena sinatu dute

Zubiate(e)ko Aritz
-
0
CCOOk, UGTk eta Lankidek KPIa bermatzen ez duen Nafarroako bulegoen hitzarmena sinatu dute

Bulegoetako negoziazio prozesua luzea izan da, 2021etik darama hitzarmen honek ultraktibitatean. Langileak 3 urtez egon dira soldata izoztuekin, azken urteetako KPIa nabarmenki igo bada ere. Prozesua luzea izateaz gain, forma eta intentsitate ezberdinak ere izan ditu. Irmo aurkeztu ginen patronalaren aurrean eta argi esan genion Nafarroako hitzarmen duin baten alde ari ginela borrokan. Bideoak egin genituen, baita mobilizazioak eta greba egunak ere. Asko izan dira bidetik borrokara batu diren eta ekimenetan parte hartu duten pertsonak. Harro sentitzeko modukoa da erakutsitako inplikazioa, konpromisoa eta gogoa. Zalantzarik gabe, negoziazioa baldintzatzea eta sektorea astintzea lortu dugu.

Gaur, abenduaren 13an, CCOOk, UGTk eta Lankidek KPIa bermatzen ez duen Nafarroako bulegoen hitzarmena sinatu dute. LABek ezin du proposamen hau babestu. Izan ere, 2020-2024ko KPIa edozein izanda ere, %100ean bermatu behar da. Langileon eros ahalmena ezin da muga batzuek baldintzatuta egon. Hortaz, ezinbestekoa da patronalak proposatzen dituen ehunekoak alde batera uztea eta KPIa edozein izanda ere, guztiz bermatzea. Bestalde, igoerak soldata errealetara izatea eskatzen dugu. Sektore honetako langileen gehiengo handi batek tauletan ezartzen denaren gainetik kobratzen du. Hortaz, soldata igoerak taula horien arabera sinatzen badira, dituzten plus-ekin konpentsatu eta diru kopuru berdina jasotzen jarraituko dute.

Honengatik guztiagatik, sinatutako proposamena oso eskasa iruditzen zaigu, ez baititu islatzen sektorearen errealitatea, ezta langileriaren beharrak ere. Beraz, argi eta garbi diogu sinatutakoak ez diola inolako mesederik egin ez langileei, ezta borroka sindikalari ere. Agerian geratu da zenbait sindikaturen lehentasunak ez direla baldintzak hobetzea, baizik eta patronalari bidea erraztea. Izan ere, hasieratik izan duten sinatzeko prestutasunak posizio indartsuagoa eman die enpresei. Hala eta guztiz ere, mobiliziazio arrakastatsuak burutzea lortu dugu; beraz, LABetik eskerrak eman nahi dizkizuegu hauetan parte hartu duzuen langile guztiei. Oso argi dugu zuen borrokari esker lortu dugula patronala bere lekutik mugitzea. Beraz, ZORIONAK! Emaitza edozein izanik ere, BORROKAK MEREZI DUELAKO!

Amazonek eta Manpowerrek greba eskubidea urratzen dute

Zubiate(e)ko Aritz
-
0
Amazonek eta Manpowerrek greba eskubidea urratzen dute

Abenduko grebetan mehatxuak eta ezohiko kontratazioak egin ostean, urtarrila hasierarako aparteko lanorduak eskaintzen ari dira aldi baterako langileei. Gaur goizean elkarretaratzea egin dugu Manpowerren egoitzaren aurrean, Bilbon.

Trapagarango Amazonen zentroko hitzarmen propioa eskatzeko abenduaren 17an eta 18an egindako greba egunek arrakasta handia izan zuten parte-hartze aldetik. Amazoneko zuzendaritzak ezin izan zuen bere ekoizpena atera nahiz eta Manpower aldi baterako lan enpresaren laguntza izan. Enpresa horrek, azaroaren hasieran, 40 kontratazio baino gehiago egin zituen Gabonetarako, eta hori ez zen ohikoa, inondik inora ere. Pandemiaren unerik txarrenetan ere ez zen langile kopurua 160 baino gehiagora iritsi, gabon hauetan gertatu bezala.

Amazon eta Manpower langileek grebarako duten eskubidea urratzen ari dira, aldi baterako langileei telefono-deiak eginez, Whatsapp mezuak bidaliz edo plantilla osoari e-mailak bidaliz, mehatxuzko tonuan: “Ez dira absentziak justifikatzen sarrerako argazki bat bidaliz, sarbidea segurua izango baita. Eta zehapen prozedura aplikatuko da, edozein absentzia gertatzen denean bezala”.

Hori guztia gutxi balitz, joan den ostiralean, abenduaren 22an, Manpowerrek Whatsapp eta email mezu gehiago bidali zituen, urtarrilaren lehen astean ordu osagarriak eskainiz. Aste horretan, langileek grebara deitu dute urtarrilaren 3an, 4an eta 5ean.

Lan Harremanei buruzko Errege Lege Dekretuaren 6.5 artikuluak ezartzen duenez, grebak irauten duen bitartean enpresaburuak ezin izango ditu grebalariak ordezkatu grebaren berri eman den unean enpresari lotuta ez dauden langileekin. Beraz, legez kontrakoa da greba iragartzen den unean enpresakoak ez diren langileak aldi baterako kontratatzea, hura indargabetzeko helburu bakarrarekin.

Bost greba egunak deitu ditugun sindikatuok (LAB eta ELA) Bizkaiko Lan eta Gizarte Segurantzako Ikuskatzailetzari jakinarazi diogu gertaturikoa, eta ahalik eta azkarren jarduteko eskatu, Manpower eta Amazon egiten ari diren greba eskubidearen urraketaren aurka egiteko.

Hamar greba egun gehiago deitu ditugu EAEko Gizarte Ekimeneko ikastetxeetan

Zubiate(e)ko Aritz
-
0
Hamar greba egun gehiago deitu ditugu EAEko Gizarte Ekimeneko ikastetxeetan

Grebak urtarrilaren 17, 18, 23, 24 eta 25ean eta otsailaren 6, 7, 8, 19 eta 20an izango dira. Aurrez egindako bederatzi greba eguni gehitzen zaizkie eta Lan Hitzarmenaren negoziaketa dugu helburu LAB, ELA, STEILAS, CCOO eta UGT sindikatuok.

Langileek bederatzi greba egun egin dituzte jadanik, apirilaren 25ean lehena, urrian hiru greba egun eta abenduan bertan bost greba egun. Greba hauek langileen babes zabala izan dute, %65ekoa bataz beste.

Helburua 2021eko abendutik iraungita dagoen Lan Hitzarmena berritzea da. Onartezina eta arduragabekeria da abenduko bost greba egunen ostean mahairik deitu gabe eta proposamenik egin gabe jarraitzea Kristau Eskola eta AICE-IZEA patronal nagusiek.

Beraz, sindikatuok urtarrila eta otsailerako beste hamar greba egun deitzea erabaki dugu. Grebak urtarrilaren 17, 18, 23, 24, eta 25erako eta otsailaren 6,7,8, 19 eta 20rako deitu ditugu.

Sindikatuok adostasunetara iristeko borondatea eta prestutasuna dugu, eta patronalei arduraz jokatzeko eta Lan Hitzarmena berritzea ahalbideratuko duten edukiak eta proposamenak egiteko eskatzen diegu.

Izan ere, azken hilabeteetako greba dinamika honek behartuta patronalen aldetik mugimenduak egon badira ere, ez da ez negoziaketa errealik egon ez eta proposamenik mahai gaineratu ere. Horrela, Patronalek azaroaren 27rako negoziazio mahaia deitu zuten arren, ez zuten proposamenik ekarri bertara.

Hezkuntza Sailak ere bilera batera deitu gintuen sindikatuok abenduaren 5ean, baina bilera hura ere aurrerapausorik gabe amaitu zen. Hezkuntza saila ez da edozein eragile eta badu zeresanik langile hauen lan baldintzen inguruan; beraz gatazka bideratzeko esku har dezala galdegiten diogu.

Aldarrikapen nagusiak lan zamak arintzeko neurrietan, sektore feminizatu eta prekarizatuenentzat hobekuntzetan, KPIa bermatuko duten soldata igoeretan, lanpostuak mantentzeko neurrietan eta Lanbide Heziketako edukietan oinarritzen dira. Euskara planak, berdintasun planak eta lan osasuna eta bereziki arrisku psikosozialei aurre egiteko planak ere jomugan ditugu sindikatuok.

Lan Hitzarmenaren negoziaketarako sindikatuon aldarrikapen nagusiak

IRAUPENA

2022-2024 (2021eko soldatak barne).

LAN ZAMAK ARINTZEKO NEURRIAK

  • Irakasleak: eskola orduen murrizketa esanguratsua.

Murrizten diren eskola orduak ordu osagarri bihurtzea eta ordu osagarri horiek lan pertsonalerako izatea.

  • Irakasle ez diren langile tituludunak: Irakasleen urteko lanaldi berdina
  • Kolektibo guztietan ordezkapenen erregimena hobetzea

SEKTORE FEMINIZATU ETA PREKARIONENTZAT HOBEKUNTZAK

  • HH Lehen zikloko langileen HH bigarren zikloko langileekiko homologazioan pausu garrantzitsuak
  • Hezkuntza Laguntza Espezialistak (EAE) lanaldi osoak bermatzea eta ordu osagarriak gehitzea arreta zuzenekoak murriztuz
  • AZP urteko lanaldi murrizketa esanguratsua, lan zamak neurtzeko eta mugatzeko neurriak ezarriz

SOLDATAK:

  • KPIaren bermea
  • Aurrez galdutako eros ahalmena berreskuratzen joatea.
  • DBH 1 eta DBH 2ko irakasleen soldata parekatzea

ENPLEGUA. LANPOSTUAK MANTENTZEKO

  • Birkokapen prozedurari buruzko erreglamendua Hitzarmenean jasotzea eta betearazteko bermeak ezartzea
  • Birkokapen akordio mugagabea bermatzea

LANBIDE HEZIKETA

  • Lanaldi irregularra arautzea: Asteko ohiko eskola orduak gainditzeko baldintzak negoziatu eta hitzarmenean txertatu:

Ordu lektibo eta osagarrien proportzioa mantendu beharko da

Konpentsazioa egon beharko da

  • FCTs: 6 ordu astean ikasturte osoan; ez bakarrik praktika garaian
  • Tailerretan bikoizketa arautu
  • Lanbide Heziketako lege berriak ekar ditzaken aldaketen aplikazioa negoziatzea

BEHIN BEHINEKO KONTRATAZIOA ETA ALDIZKAKO KONTRATAZIO FINKOA

  • Lanaldi osoko kontratu mugagabeen nagusitasuna jasotzea
  • Aldizkako kontratu finkoen erabilpenik ez dela egongo jasotzea arau orokor bezala.

LAN OSASUNA

  • Behin behineko ez gaitasun osagarria baja-denbora efektibo osoan.
  • Arrisku psikosozialak, bai prebentzioan baita identifikatutako gabeziak konpontzeko planak ezarri ikastetxe guztietan, jazarpen-protokolak barne

EUSKARA PLANAK

  • Plantilla osoarentzat, irakasleak ez direnak barne

BERDINTASUN PLANAK

  • Hitzarmeneko zentro guztietan.

Bilboko Udalean kalitatezko zerbitzu publikoak indartzeko beharrizana nabarmendu dugu, aurrekontuek ez baitute halakorik bermatzen

Zubiate(e)ko Aritz
-
0
Bilboko Udalean kalitatezko zerbitzu publikoak indartzeko beharrizana nabarmendu dugu, aurrekontuek ez baitute halakorik bermatzen

Erreklamazioak aurkeztu dizkiogu EAJ-PSEk 2024rako proposatutako udal aurrekontuei.

Bilboko Udaleko LABen atal sindikalak urteak daramatza udal-aurrekontuari erreklamazioak egiten. Bada, aurten ere hala egin dugu, inoiz baino zentzu handiagoarekin gainera; izan ere, aldarrikapenak LAB sindikaltuak azken hilabeteotan eginiko mobilizazioekin (zerbitzu publikoetako bi greba egunak barne) lotuta daude.

Kanpaina honetan defendatutako puntuen artean honako hauek daude:

  • Estatuaren mugak ez onartzea
  • Lan-kargak arintzea, lan-osasuna bermatuz
  • %10eko soldata-igoera, aurreko zorra berreskuratzea
  • Enplegua sortzea eta egonkortzea
  • Arlo publikoa indartzea, ez pribatizazioak
  • Zaintza-sistema publikoa, politika feministak

Bilboko Udaleko langileek bi oztopo izaten dituzte nagusiko negoziazio kolektiboan akordioak erdiesteko: batetik, estatuak mugatzen dituen soldata-igoerak; eta, bestetik, Madrilgo gobernuak enplegua sortu eta egonkortzeari jartzen dizkion mugak zein oztopoak.

Gogora ekarri behar da aurtengo azaroaren 10ean udal hau gobernatzen duten alderdiek (EAJ-PSE) Madrilgo gobernuari inbestidurarako egonkortasuna emateko konpromisoa sinatu zutela. Akordio horrek birjarpen-tasak eta enplegatu publikoen ordainsari-masaren gehikuntza aipatzen ditu.

Bada, LABen sail sindikalak aurkezturiko erreklamazioa onartuz eta udal aurrekontua egokituz, orain da unea akordio hori baliatzeko.

LABen erreklamazioa, batez ere, zerbitzu publikoak indartzeko plaza berriak sortzean oinarritzen da. Besteak beste, honako hauek behar dira:

  • Oinarrizko Gizarte Zerbitzuak indartzeko gizarte-langileak
  • Politika feministetan aurrera egin ahal izateko berdintasun-teknikariak
  • Euskara teknikariak, euskalduntzearen arloan Bilbok merezi duen bultzada emateko

Gainera, dagoeneko pribatizatuta dauden zerbitzuen publifikazioa eskatzen dugu, baina, era berean, sortu berriak diren zerbitzuen pribatizazioaren aurkako jarrera daukagu. Horren adibide da laster Esperantza kalean irekiko den ekipamendu berria, gobernu-taldeak enpresa pribatu baten bidez kudeatu nahi duena. Horren aurrean, LABetik argi diogu: udal zerbitzu publikoak udal langileek kudeatu behar dituzte.

Bi arrantzale desagertu dira eta beste bat larri zaurituta ospitalera eraman dute Ziburun itsasontzi bat hondartuta

Zubiate(e)ko Aritz
-
0
Bi arrantzale desagertu dira eta beste bat larri zaurituta ospitalera eraman dute Ziburun itsasontzi bat hondartuta

Gaur, abenduak 22, beste lan istripu bat gertatu da. Arcachondik Euskal Herri aldera zetorren arrantza-ontzi bateko bi arrantzale desagerturik daude eta beste bat oso larri erreskatatu dute, hipotermiak jota, Ziburun, Zokoako diketik gertu hondartuta zegoela.

Lehenik eta behin, une gogor hauetan LAB sindikatuak elkartasuna adierazi die pertsona horien sendiei, lagunei eta lankideei zein itsas eta arrantza munduari, oro har.

Arrantza sektorean bereziki egoten diren baldintza gogorrak azpimarratu ditu sindikatuak, hala nola garai honetan izaten duten lan karga handia eta kuotek ezartzen duten presioa.

Lan baldintzak oso gogorrak dira, goizaldeko lana, lan ordu luzeak eta ia deskantsurik gabeko jardunaldiak tarteko, eta arrazoi hauek aurkitzen dira istripu hauen iturburuan, itsasoan diren baldintzak edonolakoak direla ere lanera atera behar izaten direlarik, besteak beste.

Azkenik, lan- eta klimatologia-baldintza oso gogorretan bilaketa- eta erreskate-lanetan parte hartzen ari diren langile guztiak egiten ari diren lana ere aitortu du LABek, eta babesa adierazi die, askotan ez baitzaie aitortzen, ez sozialki, ez lan aldetik, haien dedikazioa eta lana.

EAEko enplegu lege berriak ez die erantzuten euskal langileriaren beharrei

Zubiate(e)ko Aritz
-
0
EAEko enplegu lege berriak ez die erantzuten euskal langileriaren beharrei

LABen ustez, atzo Gasteizko legebiltzarrean onartu zen EAE-ko enplegu legea motz jaio da bere sorreratik; izan ere, EAE-k eskumen mugatuak ditu enplegua erregulatzeko garaian, Estatutik datozen arau eta irizpideak ordenatzeko aukera besterik ez baitago. Gainera, Lanbidek izango duen izaera juridikoaren aldaketa salatu du LABek, pribatizazioari eta kontrol publiko ezari ateak irekiko baitizkio.

Euskal Herriak benetako enplegu lege bat behar duela uste du sindikatuak, Lan harremanetarako eta babes sozialerako euskal esparruaren bidean urratsak emanez. Hala, nabarmendu du atzoko legea aukera galdu bat izan dela bide horretan lanean hasteko.

Enplegu politika diseinatu ahal izateko ezinbestekoa da herri batek eskumen osoak izatea, zer nolako enplegua sortu nahi dugun, nola egingo dugun hori eta nola banatuko dugun erabaki ahal izateko. Atzo onarturiko legeak bere sorreratik du muga hori, gaur egun Autonomia Erkidegoetan egin daitezkeen enplegu politikei, ezin baitzaie horrela deitu. Eskumenen mugak azaleratu nahi genituzke beraz. Izan ere politika aktiboak garatzeko eskumena jasoa dugu EAE-n, ez ordea pasiboena, eta ondorioz, Estatutik datozen arau eta irizpideak ordenatzeko aukera besterik ez daukagu. Enplegua eskubide subjektibo gisa onartua izan da enplegu legean, eta hori aurrerapausoa da gure ustez, baina berau egikaritzeko eta praktikan jartzeko tresnak zehaztea falta zaigu.

Euskal Herrian bertan eta Euskal Herriarentzat diseinatutako enplegu politikak garatu ahal izateko ezinbesteko bitartekoa da lan harremanetarako eta babes sozialerako esparru propioaren eraikuntza. Marko hau gainditzeko proposamenak eginak dauzkagu, esaterako Euskal Herrirako proposatzen dugun lan kodea. EAE-n proposatzen diren lege eta araudiek ere norabide hori jasota behar lukete LABen ustez. EAE-ko enplegu legeari ez diogu ordea markoa gainditzeko, marko propio baterantz urratsak emateko bokaziorik ikusten. Ez du Estatuagandik menpekoa izango ez den elkarrizketarik bultzatzen, edo ez dio legeak berak definitzen duen enplegu duin hori bermatzen lagunduko luketen balizko lanbidearteko akordioei erreferentziarik egiten.

Bestetik, Lanbideren pertsonifikazio juridikoaren berregituraketa salatu du LABek, zuzenbide pribatuko entitate publiko gisa definitzen baita, eta horrek kezkatu egiten du sindikatua, pribatizazioari atea ireki ahal dion aldaketa bat delako.

Zuzenbide pribatuko entitate publiko izatera aldatzeak sakoneko aldaketak ekarriko dizkio Lanbideri. Batetik, Lanbideko langileei dagozkionak. Urte luzez behin-behinekotasun tasa oso altuak jasan ondoren, egonkortasun prozesuei bide eman zitzaien azkenean, eta langileek lasaitasun pixka bat izango zutela uste izan dutenean, pertsonifikazio juridikoaren aldaketak zuzenean eragingo dio euren egoera laboralari, funtzionario postua dagoeneko lortu duen langileak ere bi aukeren artean erabaki beharko duelako: Lanbiden laboral gisa jarraitu edo funtzionario gisa irteera prozesuan. Gainera, erreferentziazko hitzarmen kolektiboa edota langileen hornidura gisako gaiak Administrazio Kontseiluak onartu ahal izango ditu.

Lanbideren izaera juridikoa aldatzeak ez die langileei bakarrik eragingo ordea. Kontrol ekonomikoa eta kudeaketa kontrola galduko dira, Funtzio Publikoak gainbegiratu beharko ez duelako, hori 1000 milioiko aurrekontua eta 1200 langile dituen erakunde batean. Kontrol publiko ezak hamaika eremutan eragin ahal izango du, ekonomikoan, baina baita beste hainbatetan ere: gogoan izan behar dugu gaur egun ere entitate kolaboratzaileen bidez estalitako azpikontratazioa egiten duela Lanbidek, eta orain, azpikontratazio hori gauzatzeko garaian berme are eta gutxiago izango ditugu. Ardura kargu desberdinak sortu ahal izango dituzte, bertarako sarbidea gobernuaren konfidantzazko pertsonetara mugatuz. Euskararen inguruan ere eragin ahal du, Eusko Jaurlaritzaren euskara planetik kanpo geratuko bailitzateke erakundea.

LABen esanetan, Euskal Herriak benetako enplegu lege bat behar du, Euskal Herritar guztiontzat enplegu duina bermatuko duen legea, bizitza bizigarriak garatzea ahalbidetuko duena, zaintza lanak eta euren banaketa orekatua aintzat hartuko dituena. Lan harremanetarako eta babes sozialerako euskal esparrua eraikitzea, eta bide horretan urratsak ematea ezinbestekoa da horretarako, eta sindikatuaren ustez enplegu lege honek ez dio erantzuten Euskal Herriko langileriak duen beharrari.

ABEEEaren aplikazioan genero diskriminazioagatik Tubacex zigortzen duen epaia irmoa deklaratu du Euskal Autonomia Erkidegoko Auzitegi Nagusiak

Zubiate(e)ko Aritz
-
0
ABEEEaren aplikazioan genero diskriminazioagatik Tubacex zigortzen duen epaia irmoa deklaratu du Euskal Autonomia Erkidegoko Auzitegi Nagusiak

Zaintzagatiko lanaldi-murrizketan zegoela, enpresak gainerakoei baino eragin handiagoz aplikatu zion enplegu erregulazio espedientea.

Beste behin ere, Tubacexen enpresa-politika zalantzan jarri da Euskal Autonomia Erkidegoko Auzitegi Nagusiak beste epai bat eman duelako (irmoa dena), Tubacex-en azken ABEE-ren aplikazioan generoagatik diskriminatua izan den langile bati oinarrizko eskubide bat urratu zaiola aitortzen duena.

Langilea seme-alabak zaintzeko lanaldi-murrizketan aurkitzen zen, eta koordinatzailearen lanbide-kategoria du, batez ere gizonek betetzen dutena. Tubacex-ek, bere azken Aldi Baterako Enplegu Erregularizazio Espedientearen aplikazioan, pertsona honentzat, ABEEE-ren eragina handiagoa izatea erabaki zuen.  Beraz, horrek kalte ekonomiko erantsia ekarri zion bere egoerari, enpresak aski ezagutzen zuena.

Epaiak berak aitortzen du, azken ABEEE-ren eragina emakume langilearentzat neurrigabea eta diskriminatzailea izan zela generoagatik eta familia-kontziliazioko neurrietara egokitzeagatik.

LABentzat, epai honek urte hauetan zehar Tubacexen ohiko praktika izan diren eta kasu askotan auzitegietan salatu ez diren erabaki diskriminatzaileen aurrean jarri ditugun salaketak aitortzen ditu. Tamalgarria da Tubacex bezalako enpresa bat, Eusko Jaurlaritzaren laguntza mota guztiak dituena, horrelako gertaeren adibide izatea.

Horrek ere agerian uzten du Industrian oso orokorra den errealitate bat, sektoreko emakume langileei zuzenean eragiten diena; izan ere, emakume gehienak dira kontziliazio baimen horiei heltzen dietenak. Baina bizitza eta lana uztartzeko berdintasuna eta babesa bultzatu beharrean, emakumeak, horregatik, diskriminatuak dira.

LABetik epai hau publiko egin nahi dugu eta Tubacex-eko Zuzendaritzaren erabakien larritasuna agerian utzi. Enpresa-abusu eta -diskriminazio oro judizialki eta publikoki salatzen jarraitzeko konpromisoan berresten gara. Era berean, Tubacex-i era honetako edozein jokabide edo ekintza bertan behera uzteko eskatzen diogu irmoki.

Zorionak CECOSAko langileei

Zubiate(e)ko Aritz
-
0
Zorionak CECOSAko langileei

Borrokatzeak merezi duela argi utzi dute azken asteotan Elorrioko Eroskiko biltegiko beharginek. Azaldu duten kemena, indarra eta ausardiari esker lortu da inoiz Cecosan gertatu ez dena. Langileak batu, antolatu eta duintasun erakustaldi baten ondoren lan baldintzak hobetuko dituen akordio batera heltzea enpresarekin.

Sinatutako baldintzen artean daude, besteak beste: bi urteko indarraldia, ultraktibitate mugagabea, lanaldiaren 70 orduko murrizketa, atsedenaldietarako eskubidea, gaueko nahiz asteburu eta jai-egunetako plusa igotzea, antzinatasunak aitortzea…

130 langile ingururi eragiten die akordio honek.

1...167168169...1,583Page 168 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus