2026-07-03
Blog Page 1048

Mercedes eredua: prekarietate gehiago etekinak handitzeko

admin
-
0
Mercedes eredua: prekarietate gehiago etekinak handitzeko


LABek prentsaurrekoa eskaini du gaur Gasteizen MERCEDES BENZ enpresaren egoera ekonomikoaren inguruan egin dugun azterketaren ondorioak azaltzearekin batera, hitzarmenaren gaur egungo egoeraren berri eman eta sindikatuak horren inguruan egiten duen irakurketa helarazteko. Lan zama eta egoera ekonomikoari erreparatuta Mercedes inoiz ezagutu den egoera onenean dago, eta hala ere, gezurra badirudi ere, Gasteizko lantegiak ez du egun jasaten duen prekarietatea sekula pairatu.

Mercedes eredua: prekarietate gehiago etekinak handitzeko

AZTERKETA EKONOMIKOA
MERCEDES BENZek emaitza historikoak lortu ditu:
− Fakturazioa: 4.306 mill. €, 2014an baino %25 gehiago
− Etekina: 77 mill. €, 2014an baino %30 gehiago
− DAIMLER AG: 9000 mill €ko etekina, automozioan 3.a; munduko 43.a
− Dibidendoa: 3,25€/akzioa, inoizko handiena (normalean 2€)

KOSTE SOZIALA: fakturazioaren %5,55a, industriako enpresetan %10-%30 izaten da

2016an 137.000 unitate ekoiztuko dira, 2017an gehiago, beraz etekin handiagoak

Halere, MERCEDESen apustua da koste soziala mugatzea, inolako arrazoirik gabe

MERCEDES EREDUA: gero eta etekin gehiago, koste soziala txikiagotuz. Aberastasuna pilatzen du lan legeak errazten diotelako, sindikatu batzuk laguntzen diotelako eta instituzioek babesten duelako.

LAN EGOERAREN AZTERKETA
Ebentualitatea %40a da, 2000 langile inguru (guztira 5000 dira)
− lanpostu estrukturalak dira
− Diskrimatzen dituzte: soldata eskala bikoitza
Lan erritmoak jasangaitzak dira
Malgutasuna izugarria: egunean 9 lan ordu, astean 53 edo 45 ordu.
Externalizazioa: berezko lanak kontraten bidez egiten dira

MERCEDES EREDUA: prekarietatean, ebentualitatean eta esternalizazioan oinarritutako enplegu politika.

HITZARMENAREN NEGOZIAZIOAREN EGOERA
Blokeoan dago, enpresak ez du gehiengoarekin negoziatu nahi, plataforma amankomunak prekarietatea borrokatzen duelako, malgutasuna mugatu, lan baldintzak hobetu eta gure eskubideak bermatu nahi dituelako.

Orain gutxiengoarekin negoziatzen hasi omen da, gure ustez benetako arriskua dago akordio batera heltzeko sindikatu batzuei kontratu mugagabeak eskaintzearen truke. LABek ez du onartuko inolako akordiorik eskubideak galtzeko oparien truke, hala izanez gero kontratazioaren jarraipen zorrotza egingo dugu eta arlo guztietan salatuko dugu.

LABen IRAKURKETA ETA ONDORIOAK
Mercedesen lan zama eta egoera ekonomikoari erreparatzen badiegu, inoiz ezagutu den egoera onenean dago. Baina, gezurra badirudi ere, Gasteizko lantegiak ez du egun jasaten duen prekarietatea sekula pairatu.

Egun, inoiz izan duen behin-behinekotasun tasarik altuena dauka.
– Egun, inoiz izan duen azpikontratazio tasarik altuena dauka. (beraz, Mercedesek gero eta langile gutxiago ditu).
– Egun, inoiz izan dituen lanaldirik luzeenak eta neketsuenak ditu. (9 orduko lanaldiak eta 10. ordua ezarri nahian).
– Egun, lan baldintza okerragoak ezartzen ari zaizkie kontratazio berriei.

Eta abar luze bat.

Neurri guzti hauek enpleguaren kontrako neurriak dira eta, batez ere, enplegu duinaren kontrako neurriak dira. Mercedesen enplegu politika argia da: kalitatezko enplegua desagerrarazi eta, bere ordez, enplegu prekarioagoa sortu.

Honengatik guztiarengatik, negoziazio honetan LAB Mercedeseko zein azpikontratetako langileen lan baldintzak are okerragoak izan ez daitezen, lan egiten ari da. LAB sindikatuak ez dio multinazionalari alfonbra gorria jarriko langileen gehiengo handi baten lan baldintzak okertzen jarraitu ahal izateko. Erakutsi dugun moduan, egon badagoelako tarte oso handi bat Mercedesen gauzak beste modu batean egiteko. LABek ez du inondik inora erraztuko, soilik gutxi batzuek gero eta handiagoak diren etekinak jasotzea, gehiengo zabal baten lan baldintzak prekarizatzearen truke. Hori ez baita enpresa eredu justu zein jasangarria, ezta langileen inplikazioa zein partehartzea bilatzen duen eredua ere. Eredu honek etekinak eta emaitzak lehenesten ditu, bere jendearen ongizatearen gainetik.

Egoera honen sorreran Eusko Jaurlaritza bezalako erakundeek lagundu dutela uste dugu, Mercedesen eredua Euskadiko eredua izendatu baitute, “aberastasuna sortzeko eredugarria” euren hitzetan. Aberastasuna sortzen duela ez dugu inongo zalantzarik, baina aberastasuna norentzat?. Eusko Jaurlaritza ados al dago egun Mercedeseko langileek jasaten duten prekarizazioarekin, multinazionalaren emaitzak kontuan harturik? Hau da Eusko Jaurlaritzak gainerako enpresentzat nahi duen eredua? Mercedeseko langileek (eta EAEko gainontzeko langileek) jakinaren gainean egoteko eskubidea dute. Eta, horrela izango ez balitz, zer nolako konpromisoak hartuko ditu egoera honekin bukatzeko?

Datorren igandean EAE gobernatzeko aukeratua izango denari ere eskatzen diogu argitu dezala Mercedeseko prekarizazioarekin bukatzeko zer egiteko prest dagoen.

 

 

 

LABek babesa erakusten dio Eneko Compains irakasleari jazarpen mediatikoaren aurrean

admin
-
0

El Correo egunkariak bere azalean gaur argitaratu duen berri baten arabera “etakide-ohi batek Konstituzio Zuzenbidea irakasten du UPV/EHUn”, barnealdean honakoan aldatzen delarik: “UPV/EHUk etakide izateagatik kondenatutako irakasle bat kontratatu du”. Hain zuzen, Konstituzio Zuzenbidea eta Pentsamenduaren eta Mugimendu Sozial eta Politikoen Historia Saileko Eneko Compains irakasleari buruz ari dira, Konstituzio-Zuzenbidea euskaraz irakasteko kontratatua.

Argitaratutako testuaren irakurketaz ondorioztatzen denaren arabera, berri honen helburua irakasle horren jazarpen politikoa da, irakaslearen heriotza zibila eta laborala bilatuz. Edonola, azpimarratu nahi dugu UPV/EHUk Eneko Compains kontratatu izan duenean, orain eta lehenago ere, legearen barruan egin izan duela, baita Eneko Compainsek eta berarekin batera epaitutako lagunek Fiskaltzarekin eta AVTrekin lortutako akordioaren ondorioz Entzutegi Nazional espainolak ezarritako sententzia bidegabearen arabera ere.

Berriaren irakurketaz, kazetari sinatzaileak aipatzen ez dituen iturriak UPV/EHUtik beretik datozela antzematen dugu, eta ez dugu zalantzarik, informazio okerra eta kontrastatu gabeko atalak edukitzeaz gain, bakearen aurka dauden UPV/EHUko sektore atzerakoien eta minoritarioen aldetik datozela. Sektore hauek ez dute nahi pertsona guztien eskubideak bermatzen dituen egoera normalizaturik, tartean, atxilotuak eta , torturatuak izan ondotik, espetxera itzuli behar ez izateko helburuarekin lortutako akordio baten ondoren, bidegabeki kondenatuak izan ziren pertsonena. Sektore horiek gainera, euskal gizartearen gehiengoak onartzen ez dugun errelatoa inposatu nahi digute, bakezko orainaldi eta etorkizun aske eta demokratikoa eraikitzeko berme gisa balio ez duelako.

Aurrekoagatik, publikoki gure elkartasuna adierazi nahi diogu Eneko Compains irakasleari, eta UPV/EHUri eskatzen diogu Vocento Taldeko hedabideak bidegabeki jazarritako irakasle honen eskubideak defenda ditzala. Era berean, UPV/EHUko irakasle-ikertzaile laboralaren Enpresa-Komiteari ez-ohiko bilera eskatuko diogu gai hau aztertzeko eta egoera salatzeko.

UPV/EHUko LABeko Sail Sindikala

 

 

 

Lanbideko langileek kontzentrazioa egin dute Eusko Jaurlaritzaren aurrean Lanbideko bigarren greba egunean

admin
-
0
Lanbideko langileek kontzentrazioa egin dute Eusko Jaurlaritzaren aurrean Lanbideko bigarren greba egunean


Atzo Gasteizen mobilizatu ondoren, Bilbon egin dute kontzentrazioa gaur. Grebaren jarraipena %25eko izaten ari da bigarren egun honetan. Eusko Jaurlaritzak egindako kudeaketa negargarria eta gelditasuna salatzeko eta akordio batera heltzeko borondate ezaren aurrean, mobilizazio sendoak burutzearen beharra ikusten dugu.

Lanbideko Zuzendaritzak berak defendatu du Orientazioa organismoaren modelo antolatzaile eta funtzionalaren zutabe bezala. Baina errealitateak kanporatutako eta gutxitutako zerbitzu bat erakusten digu. Pertsonal gutxi egoteaz gainera, orientazioko funtzioarekin bat ez datozen betebehar gehiago egiten dituzte eta orientatzaileek haien lanpostua galtzeko arriskua daukate ere.

Gatazka honek direktoki 195 langileen egonkortasunarengan dauka eragina, bulegoetako %30a, plantila osoan eta gizarte osoan ere Lanbidek eskeintzen duen zerbitzu publikoa txarragotzen den heinean.

Akordio batera heltzeko administraritzaren borondate ezaren aurrean, mobilizazio sendoak burutzearen beharra ikusten dugu eta organismoaren plantilla osorako 5 egunetako lanuztea iragarri dugu.

Datorren astean langileon ordezkariek bilera egingo dute Eusko Jaurlaritzarekin eta atzo bertan, sindikatuok proposamena helarazi genion administrazioari.

 

 

Lakuak eskola-jantokietako beharrak aintzakotzat hartzen ez dituela salatu dugu

admin
-
0


LABek, eskola-jantokien inguruen EAEko Hezkuntza Sailak agertzen dituen gaitasun eza eta nagikeria salatzen du. Jona den astelehenetik aurrera (irailak 19), Laukarizko eskolako cateringa ezarriko da. Cateringeko enpresa bat arduratuko da bigarren jakiaz hornitzeaz. Egoera honek ondorioak ekarri ditu langileentzat horregatik LABetik gaiari trataera egokia ematea eskatzen dugu.

Honen zergatia ulertzeko, jakin behar da Hezkuntza Sailak ez duela sukaldari baten lanpostua hornitu. Irailaren 7az geroztik Ikastetxeko zuzendaritza nahiz LAB arazo hau konpontzen saiatu diren arren, ezinezkoa izan zaigu Sailak gaiari irtenbide egokia ematea.

Sortu den egoera honen ondorioz, sukaldean aritu den sukaldari bakarrak, orain arte behintzat, dagokion ratioaren bikoitza bete eta horren ondorioak jasan behar izan ditu. Baldintza berdinetan jardun zuen iaz, sukaldean bi lagunek lan egin behar dutenean eta bazkaltiarren ratioa aldatu ez denean.

Eskolako guneetako bat zerbitzu osagarritzat hartzen da berriro. Langile osagarritzat jotzen da hartaz arduratzen den sukaldaria. Horrela, hitzarmen kolektiboa urratzen da, lanaldi amaiezinak eragiten dira eta laneko estresa jasateko arriskuan jartzen da langilea.

Bestalde, deigarria da hau Laukarizeko eskolan gertatzea. Gogora ekarri nahi dugu gurea lau ikastetxe pilotuetako bat dela (Urduña, Mungia, Gernika, Laukariz), non eskolaren auto-kudeaketa ahalbidetzen den ikasturte honetan, halaxe egitea adostu zelako Gasteizeko Legebiltzarrean.

LABen irudikoz, garaia da sistema honekin amai dezagun, heziketa-gune baten garapen egokiari kalte egiten diola agerikoa delako, eta hortaz, horrekiko egokia den trataera eman behar zaio.

Gogoan izan dezagun LAB lanean ari dela eredu berri bat proposatze aldera: sorospen kontzeptutik hezkuntza kontzeptura igaro nahi dugu, eta hiru printzipio hauetan oinarritu: eredu berria, elikadura eta burujabetza eta lan baldintza duinak.

 

 

 

Murrizketak salatzeko elkarretaratzeak burutu ditugu

admin
-
0


SATSE, ELA, LAB, SME, CCOO, UGT eta ESK sindikatuok Gurutzeta, Txagorritxu eta Donostiako Ospitaleetan elkarretaratzeak egin ditugu, Osakidetzako lan-baldintzak eta arreta-kalitatea okertu dituzten murrizketak salatzen jarraitzeko. Bestetik, dei egiten diegu alderdi politikoei murrizketa horiek guztiak igandeko hauteskundeen ostean kentzeko konpromisoa har dezaten.

Euskal osasun publikoak mota guztietako murrizketak jasan ditu azken lau urteotan. Osakidetzak 3.000 lanpostu baino gehiago suntsitu ditu, pertsonaleko ordezpenak gutxitu, soldatak izugarri jaitsi, gaixotasuna zigortu… Eta, gainera, itxaron-zerrendak luzatu dira, lan-kargak handitzearen ondorioz arreta-kalitatea gutxitu da, oinarrizko zerbitzuak —larrialdiak, besteak beste— gainezka daude, edo txertoen hornikuntzan eskasiak gertatu dira…

Bidegabekeria horien aurka Gurutzetako, Txagorritxuko eta Donostiako ospitaleetan, irailaren 22an goizeko 11etan burutuko diren kontzentrazioetan parte hartzera dei egiten dugu.

Osakidetzako Zuzendaritzari joera hori zuzentzeko exijitzen diogu, eta batez ere, alderdi politikoei eskatu nahi diegu irailaren 25a baino lehen argitzeko, ea murrizketa-politika horrekin amaitzeko asmorik duten, edo osasun pribatuaren mesedetan gure osasun publikoa ahultzen jarraituko duten. Osakidetzako langileek ere merezi dute jakitea zer gertatuko zaien irailaren 25etik aurrera. SATSE, ELA, LAB, SME, CCOO, UGT eta ESK sindikatuok mobilizazio-deia egin dugu, murrizketa horiei aurre egiteko, eta mobilizazioak bultzatzen jarraitzeko gure asmo irmoa azaldu nahi dugu, orain arte egindako murrizketak lehengoratzeko, eta murrizketa bakar bat ere gehiago egiten ez uzteko.

 

 

 

Unai Rementeria eta greba eskubidea

admin
-
0

Unai Rementeria, Ahaldun nagusiak Bizkaiko Adineko Egoitzetako gatazkari zuzenduz, erabiltzaileen duintasuna bermatuko duen zerbitzu minimoak ezarri behar direla adierazi zuen komunikabideen aurrean, langileek duten greba eskubidearen gainetik. Berez, aurreko grebetan oinarrituta eta Aldundiak berak eginiko ikuskatze txosten batean agertutakoa konpontzeko bide bezala jartzen du mahai gainean exigentzia hau. Txostenak, erabiltzaileen oinarrizko arretan utzikeria egon zela adierazten ei zuen.

Txostenaren nondik norakoak ezagutu gabe eta greba horietan gertatutakoaren ustezko gertaera batzuk aztertuta, komunikabideetan zabaldu direnak, bertan lan egiten dugunok eta erabiltzaileen familiek, badakite zein den egoitza hauetako egoera, greba edo greba gabe!

Egun normal batean, langileen kopurua oso murritza da txanda bakoitzean, laneko antolakuntza eta lan baldintzen egoera erreala… Hauek dira benetan egoitzetako sistemaren arretan utzikeria bat sortzen duten elementuak. Beraz, sistema bera bihurtu da “desatentzio” sistema batean! Eta guzti honek, nola ez, langileon prekarizazio eta lan baldintzen urraketan sakontzen du etengabean.

Ahaldun Nagusiak, oso modu miserablean, hauteskunde kanpaina hau aprobetxatu du gezurrak esan eta bere partidua den EAJk, arlo honetan diseinatzen dituen politika eskasak justifikatzeko. Dependentzia sistema hau, zeinek izaera soziala eta titularitate publikoa duen, baina empresa pribatuek, batez ere merkantilek, kudeatzen duten, haien onura pertsonalak lehenetsi eta sistemak berak dituen gabezia guztiak aprobetxatuz. Enpresek, erreforma laboralak zabaltzen dituen aukerak bereganatzen dituzte zerbitzua antolatzeko eta haien poltsikoak betetzeko.

Guzti honek, langileengan arazo anitz sortzen ditu: bizitza pertsonala eta laborala ezin bateratu, lanaldi murriztuak eta egutegi oso ezegonkorrekin. Lansari miserableak egiten den lan guztirako eta jasaten dituzten karga fisiko zein emozionalentzako eta inolako prebentzio bitartekorik gabe langileon osasunerako.

Dependentzia egoeran dauden pertsonentzako arreta sistema bat eraiki dute inongo oinarri humanorik gabe eta ingeniaritza industriala izango balitz bezala. Metalezko piezak egiteko erabiltzen den produkzio kate bat izango balitz bezala antolatua, eta gelditu gabe. Azken finean, langileon lan baldintza prekarioen gainean eraikitzen den sistema oso bat.

Ahaldun Nagusiak, Unai Rementeriak, beste behin ere, bere etika falta eta miseria humanoa erakutsi dizkigu. Agian ez da kontziente, baina dimentsio oso handia hartzen ari den gatazka dago sortzen. Helduko da, eta lehertuko ere egingo da langile guztiok posizio bateratu bat hartzearekin batera. Luzera begira eta beldur tantarik gabe. Hau, langileok dugun erantzukizunarekin, profesionalak garen heinean, eta etorkizuneko erabiltzaile bezala.
 

 

 

71.724 sinadura pentsio duinen alde eta babes eta gizarte segurantza sistema propioaren alde

admin
-
0
71.724 sinadura pentsio duinen alde eta babes eta gizarte segurantza sistema propioaren alde


Eskubide Sozialen aldeko EAEko Pentsionisten Platatormek 71.724 sinadura aurkezten zituzten Gasteizko Legebiltzarreko Diputazio Iraunkorrean pentsio duinen alde eta babes eta gizarte segurantza sistema propioa eskatuz (sinadura kopuru hau, Herri Ekimen Legegile bat aurkezteko behar diren sinadura kopuruá baino zazpi aldiz handiagoa da). 

Eskubide Sozialen aldeko EAEko Pentsionisten Platatormen (Arabako Pentsionistak Lanean, Gipuzkoako Duintasuna Elkartea eta Sizkaiko Pentsionistak Martxan) irakurketa
PENTSIO DUINAK 1080€
BABES ETA GIZARTE SEGURANTZAREN SISTEMA PROPIOA

"Gaur, irailak 21, Eskubide Sozialen aldeko EAEko Pentsionisten Platatormek: Arabako Pentsionistak Lanean, Gipuzkoako Duintasuna Elkartea eta Sizkaiko Pentsionistak Martxan, gure Erkidegoan jasotako. 71.724 sinadura aurkezten ditugu Gasteizko Legebiltzarreko Diputazio Iraunkorrean (Sinadura kopuru hau, Herri Ekimen Legegile bat aurkezteko behar diren sinadura kopuruá baino zazpi aldiz handiagoa da).

Sinadura hauen bitartez zera eskatzen dugu: Gure Erkidegoan pentsio baxuenak jasotzen dituztenek, 1.0800 arteko osagarria jaso dezateía. Ezin dugu ahaztu EAEn 249.579 pertsona dagoela 700€z azpiko pentsioarekin eta horietatik gehienak emakumeak edo bizitzan zehar lan prekarioetan arituak direla.

Sinadura hauen indarraz baliatu nahi dugu, halaber, bigarren eskaera bultzatzeko, hain zuzen Sabes eta Gizarte Segurantzako Sistema Propioa sortzea, horrela gaurko eta etorkizuneko pentsioak bermatuta izan ditzagun. Sistema horrek bere gain hartu beharko luke arloaren kudeaketa osoa.

Une honetan gogora ekarri nahi dugu Nafarroan sinadura bilketarekin aurrera doazela, joan zen udazkenean guk aurkeztutako Herri Ekimen Legegile bertako Foru Parlamentura eraman asmoz. Saina Nafarroako Legebiltzarrak Ekimen Herrikoia tramitera onartzea erabaki zuen bitartean Gasteizko Legebiltzarreko Mahaiak gure proposamena atzera bota zuen EAJ, PSE, PP eta UPDren bozkekín eta horrela, gizartean zegoen eta dagoen eztabaida sozialari atea itxi zitzaion.

Gaur entregatzen ditugun sinadurek, bere garaian aurkeztu genuen Herri Ekimen Legegilearen arrazoiak indartu eta bide horretatik jarraitzeko bultzada supcsatzen dute, hauteskunde hauetatik sortuko den Legebiltzar berriak beste jarrera bat erakutsiko itxaropena piztuz.

Diputazio Iraunkor honen eskuetan milaka sinadura aurkezten dugun unean, Alderdi Politikoak interpelatu nahi ditugu, beraien eskuetan izango dituzten baliabideak, ezertan baino lehen behartsuenen zerbitzura jar ditzaten.

Eskerrik beroenak eman nahi dizkiegu bere sinadurekin eskaera hauek babestu dituzten guztiei eta hiri eta herri guztietan pentsiodunen oinarrizko eskubideen alde mobilizatzen jarrai dezatela eskatzen diegu, hori izango baita etorkizunean pentsio duinen bermea.

Eskubide Sozialen A1deko EAEko Pentsiodunen Plataformek jasotako babesarekin, zilegitasun osoz ikusten dugu geure burua, adineko pertsonen eta pentsiodunen beharren aldeko lanean jarraitzeko. Hainbesteko kalte egiten digun Kopagoa gaitzesten dugu, Mendekotasun egoerei aurre egingo dion Lege propioa aldarrikatzen dugu eta egunerokotasuneko bizi-baldintZak hobetzea exijitzen dugu, gure etxeetan zein kalean, beti ere geure iritzia eta geure parte hartzea bermatuz.

Gasteiz, 2016ko irailak 21"
 

 

 

LANBIDEko langileak greban

admin
-
0
LANBIDEko langileak greban


Atzo, LAB eta ELA sindikatuok deitutako 5 egunetako greba deialdiaren lehen egunak jarraipen zabala izan zuen. Orientazio lanak egiten dituzten 196 langileren kaleratze eta ordezkatze posibleak enplegu zerbitzuan izan dezakeen kolpe berri bat ekiditeko neurriak har ditzala eskatzen dizkiogu Eusko jaurlaritzari.

Gure datuen arabera, langilego osoaren %25ak baino gehiagok egin du greba, jarraipena ia erabatekoa izanik orientatzaileen artean.

Langileak zoriondu eta gaurko greban zein Bilboko Gran Via 85ean 10:00etan izango den elkarretaratzean parte hartzera animatu nahi ditugu. Aldi berean, Eusko jaurlaritzari eskatzen diogu egonkortasun eta kalitatezko enplegu zerbitzu bat bermatzeko neurriak har ditzala.

GREBA EGUNAK
Gaur, hilak 22, eta urriaren 3, 4 eta 5ean.
 

 

Zerbitzu publikoetan dagoen prekarietatea mugatzeko baliatuko dugu Europako jurisprudentzia

admin
-
0

Gure Zerbitzu Publikoetako langileen artean prekarietate aldagai nagusia lanaren behin-behinekotasuna da. Gai honen inguruan, Europatik heldu diren hainbat epairen berri jaso dugu berriki. LABek epai hau positiboki baloratzen du euskal administrazio gehienetan dagoen behin-behinekotasun tasa altuak ikusita, aldi baterako langileen egoeran honen aplikazioak ekar ditzakeen onurengatik.

LABek, epaion urjentziazko lehen irakurketaldian oinarrituta, eta egingo ditugun irakurketa xeheagoen zain, honako ondorio juridikoak ateratzen ditu:

  • Aldi baterako kontratua duten funtzionarioek, hau da, funtzionario interinoek, laboralek bezala EPEa egin bitartean, “funtzionario mugagabe ez finkoaren” izaera eskuratzeko eskubidea izango dute baldin eta haien kontratazioan iruzurrik izan bada.
  • Aldi baterako kontratua duen langile orok -laborala, estatutarioa edo funtzionarioa izan – bere aldi-baterako lan harremana etetean, kalteordaina jasotzeko eskubidea izango du.
  • Administrazioak ezin du beharrizan edo eginkizun estruktural bat betetzeko aldi baterako kontraturik egin. Hortaz, denboran zehar behin eta berriz errepikatzen den eginkizun baten kasuan, aldi baterako kontratazio asko eginez gero, dena delako eginkizun hori estrukturaltzat hartua izan beharko da, eta berau betetzeko dagokion lanpostu estrukturala sortu.

Epaiok bestalde, indarrean diren Europako zenbait zuzentarautan oinarrituz, bete beharrekoak dira, eta inongo legedik zein lan hitzarmenek ezin du ezer ezarri aplikazio zuzenekoak diren zuzentarau hauen kontrako norabidean.

LABek oso positiboki baloratzen ditu epaiok arrazoi birengatik:

  • Batetik, euskal administrazio gehienetan dagoen behin-behinekotasun tasa altuak ikusita, aldi baterako langileen egoeran honen aplikazioak ekar ditzakeen onurengatik (egonkortasuna sustatu, kalteordainak aitortu, …).
  • Bestetik, zerbitzu publikoen sistema egonkortu eta sendotzeko ekar dezakeenarengatik. Gure administrazio eta Zerbitzu Publikoen sistema gutxienekotzat jo liteke, hau da, gure agintari politikoek gutxieneko lanpostu batzuk baino ez dituzte egiturazkotzat jotzen, eta bestelako zeregin asko betetzeko aldi baterako kontratazioen bidea hautatzen dute. Epai honek praktika anker honen kontra egiten du, eta behin eta berriz errepikatzen diren zereginak administrazioaren funtzio estruktural bezala aitortuak izan eta lanpostu estruktural baten bidez beteak izateko aukerak irekitzen ditu. Gainera, zuzentarau hauek estatuen legedien gainetik daude, eta beraz, espainiar Estatuak birjartze tasaren inguruan ezarritako legedi murriztailea indargabetuta gera liteke honen aplikazioz.

Hala, azken urteotan kontratazio finkoak egiteko edota lanpostu publiko berriak sortzeko arazo edo oztopoak Estatuko legedian zein birjartze tasan kokatzen zuten alderdiek, badute arazo edota oztopook saihesteko bidea, eta orain badute erakustea ea Estatuko oinarrizko legedia kezka iturri ala aitzakia zuten. Nolanahi ere, LABek euskal administrazioak zuzentzen ari diren gobernu guztiei epai hauen bidez, europar direktibak aplikatuz, espainiar legediari bizkar eman eta zerbitzu publikoak eraikitzeko bide propioari ekin diezaioten aldarrikatzen eta borrokatzen jarraituko du.

Datozen egunotan, LABek azterketa sakonagoa egingo du sententziok dakartzaten ondorio guztiak ahalik eta zehatzen ezagutzeko, eta honen arabera erabakiko ditu zer iniziatiba juridiko edota sindikal hartuko dituen aldi-baterakotasunaren ondorioak mugatzeko, zein epaiok zerbitzu publikoak sendotzeko baliatzeko.
 

 

 
1...1,0471,0481,049...1,632Page 1,048 of 1,632

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus