Gizarte Ekimeneko Patronalak eta ordezkaritza daukagun sindikatuak PRECOn izan ginen atzo (osteguna) Kristau Eskolak eta AICEk hartutako bidea bertan behera uzteko asmoz. Baina akordioa ezinezkoa izan da Patronalek izan duten jarreragatik. Momentu oro Mahai Negoziatzailea jarraitzearen kontran agertu dira eta orain arte daukagun lan hitzarmena “hiltzat ematen dutela” esan dute.
Patronalaren aldetik emandako erantzuna ikusirik, bide judiziala eta ekintza sindikala baino ez zaizkigu geratzen. Horregatik Auzitegi Nagusira jo dugu jada.
LAB sindikatuak argi dauka bere lehentasuna: Euskal Herriko langile guztien negoziazio kolektiborako eskubideari eustea. Hitzarmen sektorialak nahi ditugu. Gehiengo sindikala duen sindikatuari dei egiten diogu sektoreko hitzarmenen defentsan lanean has dadin, hauek baitira langile guztiak babesteko tresna, eta argi dagoelako enpresetako hitzarmenak adoste soilarekin ez dagoela irtenbiderik.
Patronalak lehenik ikastetxeek langileekin dituzten zorrak kitatzeko gehiengo sindikalarekin akordio partzialak sinatu, eta orain Estatuko Lan Hitzarmena aplikatuko dutela jakinaraztea oso larria iruditzen zaigu. Alde batetik, sindikatuen borondateaz probestu dira eta beste aldetik, jarraian, epaitegiek emandako ebazpen bat denboran luzatzea lortu dutelako. Hau da Patronalek duten borondatea? LABek beste sindikatuei haien sinadura kentzera gonbidatzen die. Nola liteke gehiengo sindikala duenak ikastoletan 2011n LABek sinatutako zorren inguruko akordioa (sententziak atera aurretik lortu zirenak) kritikatzea behin eta berriro eta kasu honetan “bake soziala” eskaintzea Patronalari arlo honetan?.
Aurreko egunetan esan bezala, langileei gogorarazi nahi diegu euren lan baldintzen aldaketak iragarriz jakinarazpen edo gutun bat iristen bazaie (hitzarmen estatalaren aplikazioa iragarriz alegia), jasotako egunetik aurrera demanda sartzeko 20 egun dituztela.
{module[111]}