Jaurlaritzak sindikatuekin heziketa berezian erdietsitako aurre-akordioa errespeta dezan mobilizazioak hasi ditu gaur heziketa berezian ordezkaritza nagusia duen LAB sindikatuak. Elkarretaratzea Lakuan izan da, Hezkuntza sailari interpelazio zuzena egiteko. Bertan Isabel Celaari zuzendutako idatzi bat erregistratuko dute sindikatuko ordezkariek.
Hezkuntza Sailari zintzotasun falta egozten dio LABek, Heziketa Bereziko Lan Hitzarmen berri baterako aurre-akordioa 5 sindikaturekin sinatu ondoren, aurre-akordioaren edukiak eta negoziazio prozesuaren bitartean hitzartutakoa ez baitu errespetatu. Modu horretan, Celaaren sailak negoziazio kolektiboaren eskubidea urraturik utzi ditu, eta gainera, etorkizun duina izateko aukera lapurtzen die behar bereziak dituzten 5.500 ikasle eta familiari.
Hezkuntza Sailak, egindako proposamen berriarekin, LABentzat garrantzitsuak diren 3 atal larriki erasotzen ditu: Jarduna, prekarietatea eta negoziazio kolektiboaren eskubidea.
Celaa Sailburuari emandako hitza errespetatzea exijitzen dio LABek, eta mahai negoziatzailea deitzeko eskaera egiten dio, irailaren 14rarteko prozesua eta honek emandako aurre-akordioa abiapuntutzat hartuz.