Ostegunerako, martxoak 15, lanuzteez gain, protestak iragarri ditugu LAB, CFDT eta UNSA sindikatuok. Baionako suprefekturaren aurrean elkarretaratze bat egingo dugu, azken urteetan izandako murrizketak salatzeko. Langileak ez ezik, senideak ere daude deituta, lan baldintzen kaskartzeak zerbitzuaren kalitatean duen eragin zuzena salatzeko.
LAB sindikatuak, Unsa eta CFDTetik batera, mobilizazioetan parte hartzeko deia luzatu dugu. Urtarrilaren 30ean, Frantzian izandako mobilizazioen ostean, egoerak bere horretan darrai. "Aldi honetan, gutun bat bidali dugu Frantziako Osasun ministroari, tokiko parlamentuei, auzapezei eta departamenduko presidenteari egoera larria salatzeko eta inkesta bat galdetzeko ahal bezain fite departamendu maila", azaldu dugu, komunikabideen aurrean egindako agerraldian.