Iñaki Igerategi bere suhiltzaile postura itzultzeko eskatu dute bere lankideek eta Gipuzkoako Aldundiko langileek, Donostian, Foru Jauregiaren aurrean. Hain zuzen ere, hainbat mobilizazio egin dituzte aldarrikapen honekin, azken hilabeteetan, Iñaki Igerategik pairatzen duen “zigor bikoitza” salatzeko.
Iñaki Igerategi Gipuzkoako Aldundiko suhiltzailea zen eta Tolosako parkean jarduten zuen 2012. urteko otsailean Espainiako poliziak atxilotu zuenean. Espainiako Auzitegi Nazionalak epaitu eta gero, 6 urteko espetxe eta inhabilitazio zigorrak ezarri zizkion. Bere zigorrak beteta, 2018. urteko otsailean espetxetik atera zen eta bere suhiltzaile lanpostura itzultzea eskatu zion Aldundiari. Aldundiak, aurrekari legalei muzin eginez, ukatu zion bere lanpostura itzultzeko eskubidea eta Funtzionario Karreratik baztertu zuen, beteta zuen zigorrari beste bat erantsiz.
Erabakia oso larria da, Iñaki Igerategik eskubide osoa duelako bere lanpostura bueltatzeko. Eta are larriagoa da, Gipuzkoako Aldundiaren Suhiltzaileen Zerbitzuan gabezia pertsonal handiak daudenean, azken asteotan suhiltzaile-etxe bat itxita izatera ere behartu dutenak. Bitartean, Iñaki Igerategi, bere profesionaltasuna urteetan erakutsi zuena eta herritarren zerbitzurako prestutasun guztia agertu duena, kalean utzi dute, suhiltzaileak soberan baleude bezala.
Ebazpena, maiatza inguruan
Otsailaren 21ean bigarren bilera bat eduki zuten Iñakiren abokatuek Imanol Lasarekin eta bertan argi geratu zen, are argiago, Aldundiaren borondate eza egoera nolabait bideratzeko. Beraien hitz onak ekintzekin kontrastatzen saiatu gara eta hitz ustelak direla beste ondoriorik ez dugu atera.
Beraz, borrokarako ordua heldu da. Iñaki laguntzeko, Aldundiaren kolaborazionismo lotsagarria salatzeko Espainiako Estatuaren errepresio neurrigabearekin, eta baita geure buruak babesteko inhabilitazioaren zigorraren erabilpen ankerraren aurrean. Inhabilitazioarena arma arriskutsua da administrazioaren eskuetan, eta kontutan eduki beharko dugu, etorkizunean, errezegi erabil ez dezaten gu mehatxupean eta paralizaturik mantentzeko.
Iñakirena borroka zaila izango da, baina borrokatu beharrekoa. Elkartasun kontua da, lehenik eta behin. Ezin dugu onartu Aldundiari dohainik atera dakion gure kideari egin diona. Nahikoa pairatu eta “ordaindu” du Iñakik, eta orain, ogibidea bera ere kendu dio Aldundiak. Bestalde, gure eskubideak babesteko garaia ere bada. Gaur Iñaki izan da inhabilitatua eta bihar beste edonor izan daiteke, beste edozein aitzakia medio.
Borroka luzea izan daiteke, eta indarrak ondo neurtu beharko ditugu, batez ere zerbitzu hobeago baten alde borrokan gauden honetan. Ziurrenik fase ezberdinak izango ditu borrokak. Orain, eta maiatza bitartean, garrantzitsua izango da azeleradorea zapaltzea. Iñakiren errekurtsoa maiatzaren bueltan ebatziko da, eta maiatzean ere hauteskundeak izango dira.
Beraz, esfortzu berezia eskatzen dugu Iñakiren aldeko lanean, Aldundiko langileen artean; bere etorkizuna baldintzatzeko aukeretan “leiho txiki bat” izango baitugu irekita.