Aurreakordioan hitzarmenerako ondorio ekonomikoak dituzten neurri guztiak (soldata, lanaldia, IT ak, oporrak, plusak…) eta negoziazio kolektiboaren erreformak ezarritako muga guztiak gainditzeko klausulak agertzen dira.
2012ko udazkenean hasi ginen aurreakordioa sinatu dugun bost sindikatuok hitzarmen honetarako bidea egiten. LABek hasieratik bultzatu du bide hau, bere indar guztiak honetan inbertitu ditu, lan harremanen zehazterako negoziazio kolektiboari garrantzia emanez, prozesu horretan sektoreko langilegoaren parte hartzeari bidea emanez… Sektorearen kohesiorako, lan baldintzak eta soldatak enpresen zein azpisektoreen artean orekatzeko, eta enplegu zein zerbitzu kalitatea bermatzeko, garrantzitsutzat jotzen genuen eta dugu sektorea arautzea hitzarmen kolektibo baten bidez.
Langileekin lehenik, ondoren enpresekin eta erakunde publikoekin eman genituen urratsen ondorioz lortu genuen, 2013ko maiatzean, negoziazio mahaia osatzea. Eta ordutik honako hilabeteetan egoera kaotiko eta desoreka eta bidegabekerietatik sektore oso bat eratzeko bidea egin dugu. Langileen bultzada ezinbestekoa izan da: mobilizazioak, zentroz-zentroko bilerak, asanblada orokorrak… langileen baldintzak bateratzeko ahalegin ugari egin izan dira.
Hitzarmena irailean osatzeko konpromiso irmoa daukagu. Baina uztailaren 18an sinatu dugunak itzelezko garrantzia du. Negoziazio kolektiborako garai okerrenetan burutzen ari gara prozesu hau: lan eta negoziazio kolektiboaren erreformen erasoak, hitzarmenen desagertzea eta desaktibatzea, egoera ekonomiko eta soziala krisialdi larri batek baldintzatuta… Eta erakutsi dugu borondatea dagoen tokian dena posible dela.
Hemendik aurrera guk lan egiten dugun zerbitzuak finantzatzen dituzten erakunde publikoetara zuzenduko gara, sinatutako aurreakordioa eta atzean etorriko den hitzarmena, datorren urteko aurrekontuetan kontuan har dezaten.
ASKO EGIN DUGU, ASKO FALTA ZAIGU EGITEKO
Irailaren 8an gelditu gara negoziazio mahaiari berrekiteko. Hitzarmenaren zirriborroa eginda daukagu, orain gauza inportanteak erabaki ditugu eta zirriborroari behituko dizkiogu. Baina badira oraindik ere elementu eztabaidagarri batzuk hitzarmena osatzeko.
Baina lan inportanteena ez da mahaian bertan daukaguna, azpisektore batzuetan eta enpresa guztietan izango dugu (gehien bat “duzue”, kasu honetan), lanik mardulena:
-Alde batetik Aisialdia-animazioan aztertu beharko dugu irailaren hasieran presio kanpaina burutzeko aukera. Hitzarmenean sartzeko konbentzitu behar ditugu nola edo hala.
-Bestaldetik hitzarmena aplikatzeko enpresa guztietan kontrola egin behar dugu eta behar izanez gero aldarrikapen dinamika. Ezin dugu utzi enpreseei eta administrazioei hitzarmena letra hila bilakatzea.
Preacuerdo del I Convenio Intervención Social para Araba [PDF]
LABen balorazioa. Info 2014ko uztaila [PDF]