Beasaingo CAFen amiantoarekin lana egitearen ondorioz bi langile hil zirela jakinarazi zuen iaz enpresa batzordeak, eta, horren harira, omenaldi bat antolatu zuen urrian, Beasainen. Bada, enpresa batzordeak berak beste heriotza baten berri eman du orain, urte amaierarekin batera etorritakoa.
Beasaingo CAFeko enpresa batzordeak jakin zuen duela aste batzuk Donostiako 2. Epaitegiak laneko gaixotasun gisa onartu ziola CAFeko langile ohi bati amiantoarekin lan egin izanaren ondorioz eratorritako mesotelioma gaitza. Orain, zoritxarrez, urtearen amaierarekin batera langile ohi horren heriotzaren berri izan dute.
Enpresa batzordeak doluminak eta elkartasuna adierazi nahi dizkie hildakoaren senide eta lagunei. 2017an, amiantoaren ondorioz hil den 19. langilea da Euskal Autonomia Erkidegoan.