Tubos Reunidos Industrialeko zuzendaritzak zazpigarren ABEEE inposatzen digu enpresako langileoi, eta hori apirilean arrazoi produktiboengatik planteatutakoa kontutan izan gabe, enpresak bertan behera utzi zuena. LABen atal sindikalak eta alde sozialak hainbat proposamen egin dituzte ABEEE hauen ondorioak murrizteko eta enpresak tresna honen gehiegizko erabilera kontrolatzeko. Hala ere, zuzendaritzak, beste behin ere, ez du borondaterik izan langileentzat langabeziak dituen ondorioak murrizteko akordioren bat lortzeko eta ez du konpromisorik hartu nahi izan inolako enpleguaren bermeren inguruan.
LABen atal sindikalaren iritziz, enpresaren zuzendaritzak uneoro gutxietsi du alde soziala eta berriro ere erakutsi du ABEEE hauen helburua gure hitzarmenak ahalbidetzen ez dion malgutasuna ezartzea dela.
Egoera hau larritu egiten da iraungita dagoen hitzarmen kolektiboaren negoziazioan jasaten ari garen hiru urte eta erdiko blokeoa kontutan izanda, honek dakarren erosahalmenaren galera, lan-baldintzen okertzea edo errelebo kontratua ezartzeari emandako ezezkoarekin. Bien bitartean, goi-mailako zuzendaritzak bikoiztu egin du soldata azken bi urteotan.
Azken lau urteotan hiru lehendakari ezberdin izan dira kontseiluan. Eta neurri bakarrak kaleratzeak eta taldeko enpresa bat ixtea izan dira, langileei begirako erabaki eraginkorrik hartu gabe.
Enpresaren bideragarritasun plan baten faltak, lantegi ezberdinetako inbertsio falta eta neurrien inprobisazioarekin batera, epe laburrean TRIko langileontzat ziurgabetasunez betetako etorkizuna aurreikustera garamatza.