Gaur, uztailak 15, Bizkaiko Eraikin eta Lokalen Garbiketa Hitzarmenerako aurreakordioa lortu dugu. Aurreakordioak % 13ko igoera jasotzen du hitzarmen honen indarraldirako (2021-2024), eta 1.200 euroko gutxieneko soldata bermatzen da 15 ordainsaritan, azken hau da nagusiki langileak kalera irten eta grebak babesteko izan duten aldarrikapen nagusia. Gainera, KPIen ehunekoen batuketak emaitza handiagoa emango balu, soldatek % 2ko igoera osagarria izango lukete. Horrez gain, batzorde espezifiko bat sortuko da bakanteen kobertura arautzeko helburuz, lanaldi partzialak luzatzeko aukera eskainiko duena.

LAB sindikatuan oso pozik gaude gaur lortutako akordioarekin. Ez da gatazka txikia izan, multinazional handien aurkako borroka izan da, eta garaipen honekin aurreakordio bat lortu da Bizkaian 12.000 langile baino gehiagorentzat.

Borrokak balio du. Bizkaiko garbitzaileak horren adibide argia dira. Grebarik egin gabe ia 30 urte zeramatzan kolektibo hau lehen lerroan kokatu da hainbat ekintza eta protesta eginez eta patronalak mugitzera behartuz. Antolatzeko eta beren baldintzen alde borrokatzeko hautua egin zuten zor edo lor. Izan ere, ez dira grebak egitera mugatu, enpresetako okupazioak, trafiko-mozketak, kateatzeak eta itxialdiak ere burutu dituzte. Garaipen hau langileek azken hilabeteetan erakutsi duten mobilizazioaren eta irmotasunaren ondorioa da.

Azken hamarkadetan sinatu den Bizkaiko Garbiketa hitzarmenik onenaren aurreakordioa lortu da gaur.

Gaurko bileraren ondoren, LABek bere oinarrietara eramango du aurreakordioaren edukia, eta horiek bermatzen badute, hurrengo bileran sinatuko genuke hitzarmena.