Gaur egin da Gipuzkoako Foru Aldundiko eraikinen garbiketako azpikontratatutako langileen lehen greba eguna. Sindikatu deitzaileok positibotzat jotzen dugu grebaren jarraipena.

Langile hauek maiatzaren 7ra arteko greba hasi dute gaur, eta negoziazio kolektiboan KPIa ziurtatzeko borrokan ari dira. Greba deitu dute patronalaren immobilismoaren aurrean, abenduan egindako planteamendu ekonomikoari eusten baitio enpresak: 2021erako soldatak izoztea, 2022rako % 1,5eko igoera eta 2023rako % 1,75eko igoera. Apirilaren 5ean egindako azken bileran patronalak oso argi utzi zuen bere jarrera, ez du KPIri lotutako planteamendu ekonomikorik egin nahi.

Hori dela eta, langileek grebarekin aurrera jarraitzea erabaki zuten eta egunotan kalean izango dira. Grebaren jarraipena oso positiboa izan da, eta lan-baldintzak hobetzeko borrokatzera deliberatuta daude.

LAB, ELA eta ESK sindikatuok ere diputazioaren jarrera salatu nahi dugu. Nahiz eta ziurtatu ezin duela hitzarmenaren negoziazio kolektiboan esku hartu, garbitzaileak Eulenen langileak direla argudiatuz, argi geratu da euren esku dauden tresna guztiak erabiltzen dituztela langileei presioa egiteko. Gaur, astelehena, lehen greba egunean, Ertzaintzak bi langile identifikatu ditu euren greba eta manifestazio eskubidea gauzatzeagatik.

Azkenik, publikoki salatu nahi dugu Eulen enpresa grebalariak ordezkatzen ari dela. Grebalarien lanak egiten ari dira, nahiz eta jakin hori ez dela legezkoa.

Hala eta guztiz ere, langileak gogor ari dira borrokan KPIari lotutako soldata-igoerak lortu daitezen; izan ere, gaur kaleetan argi utzi dutenez: KPIrik gabe ez dago hitzarmenik.


Egun hauetan kalean izango gara eta borroka egingo dugu gure aldarrikapenak bilduko dituen hitzarmen bat lortu arte.