LABek Adunako Irizar E-Mobility enpresako langileak zoriondu nahi ditu gaurko egunez enpresaren aurrean emandako erantzunagatik. Bertako Enpresa Batzordean 9 ordezkaritik 8 ditu LABek eta 1 ELAk, eta hitzarmenaren negoziazioan 4 hilabete igaro ondoren, ez aurrera ez atzera doazela ikusita greba mugagabea deitzea erabaki zuten. Besteak beste lan berdinagatik soldata bera ordaintzea, lana eta bizitza uztartzeko neurriak hobetzea, Gipuzkoako metalgintzako hitzarmena bere osotasunean betetzea eta kanpoan lan egiteko lan baldintzak duintzea exijitzen dute langileek.
Irizar E-Mobility ibilgailu elektrikoak ekoizten dituen punta-puntako etorkizun handiko enpresa dela saltzen duten arren, bigarren mailako baldintzak dituzte langileek, eta horren ondorioz langileen joan-etorria izugarri handia da.
LABetik kezkaz ikusten dugu Irizar Group kooperatibak azken hilabeteetan hartu duen bidea. Izan ere, Berangoko Alconza enpresan 25 langile kaleratu berri ditu, LABen iritziz bestelako neurriak hartzeko aukera izan dutenean.
Irizar Groupi exijitzen diogu bere jarrera aldatu eta langileen eskaerak onar ditzala. Hala ez bada, LABek langileen borrokarekin aurrera egiteko konpromisoa du.