2026-02-02
Blog Page 493

Deslokalizazioaren aurkako lege proposamenari hainbat ekarpen egin dizkiogu Nafarroan, legearen espiritua indartzeko eta azpikontrataturiko langileak aintzat har ditzan

Aritz Sorzabal
-
0
Deslokalizazioaren aurkako lege proposamenari hainbat ekarpen egin dizkiogu Nafarroan, legearen espiritua indartzeko eta azpikontrataturiko langileak aintzat har ditzan

LAB sindikatuak, Imanol Karrera bere bozeramailearen bidez, eskutitza bidali die Nafarroako talde parlamentario guztiei deslokalizazioaren aurkako lege proposamena aberasteko hainbat ekarpenekin. Gogoratzekoa denez, lege proposamen hori EH Bilduk egin zuen, Parlamentuaren gehiengoak tramitera onartu zuen, eta bihar (urriak 27) bukatzekoa da zuzenketak egiteko epea.

LABek ontzat jo zuen Nafarroako Parlamentuak tramitera onartu izana enpresen deslokalizazioaren aurkako neurriei buruz aurkezturiko lege proposamena. Baina, era berean, oso garrantzitsutzat jo zuen proposamen hori edukiz ez hustea. Ildo horretan, talde parlamentarioei bidalitako LABen proposamen multzoak, hain zuzen ere, legearen espirituan sakondu nahi du; bertzeak bertze, azpikontrataturiko langileak kontuan har ditzan (batez ere enpresa nagusiaren deslokalizazioaren ondorioz enplegua suntsituta ikusten duten emakumeak), eta lana benetan eta eraginkortasunez betetzeko kontrol, jarraipen eta ebaluazio mekanismo zorrotzak ezar ditzan.

Harridura eta haserrea adierazi nahi dugu ELAk zaintzaren eremuan lan egiten duten gizarte zerbitzuetako sektore batzuetan aldebakarrez deitutako grebaren harira

Aritz Sorzabal
-
0
Harridura eta haserrea adierazi nahi dugu ELAk zaintzaren eremuan lan egiten duten gizarte zerbitzuetako sektore batzuetan aldebakarrez deitutako grebaren harira

ELA sindikatuak zaintzaren eremuan lan egiten duten gizarte zerbitzuetako sektore batzuetan aldebakarrez deitutako grebaren harira, LAB sindikatuak bere iritzia eman nahi du.

Lehenik eta behin gure harridura eta haserrea adierazi nahi dugu. Gaur ELAk bere kabuz publiko egin duen deialdia LABekin batera lantzen eta adosten ari zen eta onartezina iruditzen zaigu aldebakarrez eta ezkutuan langileek ezagutzen ez duten deialdi bat publiko egitea. Gure ustez, bizi ditugun garai zail hauetan indarrak batu egin behar dira; horren eredu izan dira hezkuntzan eta Osakidetzan aurrera eramaten ari garen greba eta mobilizazio dinamikak. Ez da orain borrokak patrimonializatzeko garaia. ELAk gaur egindakoarekin, egoera oso larrian dauden langileen arteko batasuna apurtzeko pauso bat eman du, bere interes propioak gailenduz.

Bestetik, deialdi hauek ezin dira langileen bizkar egin; langileekin batera beraien lan baldintzak errotik aldatzeko dinamika oso bat beharrezkoa da zalantzarik gabe, ez greba egun isolatu bat. Adostu gabeko horrelako deialdiek konfiantza falta areagotzen dute eta desmobilizazioa sustatzen dute.

LAB sindikatua prest egon da eta dago greba eta mobilizazio dinamika bateratuak adosteko, bai ELArekin zein beste sindikatu eta eragile sozialekin. Hori horrela izanda, gure hausnarketak sektore hauetan lan egiten duten sindikatu eta eragile sozialekin konpartitzeko ordua dela uste dugu, zaintzan lan egiten duten zerbitzu sozialak publifikatu eta ratioa onargarriak ezarri daitezen helburuarekin.

Gure helburua greba eta mobilizazioaren bidetik zaintza sistema publikoa eraikitzea da eta horretarako gure konpromisoa berresten dugu.

Onartezina deritzogu EAJ-ak Lorent Saleh gonbidatu izana Euskal Herrira

Aritz Sorzabal
-
0
Onartezina deritzogu EAJ-ak Lorent Saleh gonbidatu izana Euskal Herrira

Bihar, urriak 27, Lorent Saleh venezuelarra Euskal Herrian egongo da Eusko Alderdi Jeltzaleak gonbidatuta. EAJ-ak eta komunikabide nagusiek esango dute pertsona hau aktibista baketsu eta demokrata bat dela, Venezuelan Chavismoari modu demokratikoan aurre egin eta bide baketsuetatik demokrazia eraman nahi duela Venezuelara. Preso politikoa izan zela esango digute, eta Operación Libertad izeneko Gobernuz Kanpoko Erakundearen sortzailea dela.

Errealitatea oso bestelakoa da, baina. Venezuelako erakunde demokratikoen kontrako atentatu ezberdinetan harremana izan duen pertsona bat da, bai Venezuelan eta baita Kolonbian ere, ultra-eskuineko taldeekin harremana izan duena; hala nola, Kolonbiako “Alianza Nacionalista por la Libertad” izeneko talde faxistarekin. Bere egunean frogatuta gelditu zen bezala, Lorent Saleh-ek Venezuela ezegonkortzeko helburua zuten ekintza terroristekin harremana izan zuen.

Onartezina deritzogu EAJ-ak pertsona hau Euskal Herrira gonbidatu izana eta are eta mingarriagoa iruditzen zaigu Venezuelan biolentzia eta terrorismoarekin erlazionatua izan den pertsona bati gure herrian eta munduan giza eskubideen sinbolo den Gernikara gonbidatu izana.

Bakoitza bere aliatu politikoak izateko libre da noski, eta Venezuelako egoera politikoaren inguruko iritzi guztiek zilegitasun beradute, baina gonbidapen honek muga guztiak gainditzen ditu, ekitaldi hauekin Venezuelako herriaren kontrako terrorismoa eta indarkeria zuritzen baitira.

LAB sindikatuak Venezuelan bakea, demokrazia eta burujabetza nazionala defendatzera deitzen du bere militantzia. Urriaren 27an, giza eskubideak eta herri guztiok gure etorkizun politikoa aske eta demokratikoki erabakitzeko dugun eskubideak defendatzearren, gonbidapen honen kontra deituta dauden mobilizazioetan parte hartzera deitzen dugu.

Eskola jangeletako langileen lan baldintza ez duinak zentroz zentro seinalatuko dizkiogu Jaurlaritzari

Aritz Sorzabal
-
0
Eskola jangeletako langileen lan baldintza ez duinak zentroz zentro seinalatuko dizkiogu Jaurlaritzari

EAEko eskola-jangeletako langileok urteak daramatzagu gure lan baldintzen defentsan kalera ateratzen, Eusko Jaurlaritzari gu aintzat hartzeko eskatzen, ratioen jaitsieren alde mobilizatzen, lan berdinaren aurrean soldata berdinak eskatzen, hitzarmen propio bat eskatzen, gure miseriazko lan jardunak eta ondorioz, miseriazko soldatak salatzen…

Martxoan, euskal herriko milaka langile bezala, egun batetik bestera, gure lan jarduna eten egin zuten. Ondorioz, milaka haur eta nerabeentzat ezinbesteko elikadura sostengu dena ezabatua izan zen. Hilabete luzez langabezian egon gara diru sarrera oso baxuekin baina ez gara etxean egon. Ekainean mobilizazio ezberdinak egin genituen gure funtzioen aitortza eskatuz, itzulera seguru eta adostu bat eskatuz Eusko Jaurlaritzari.

Baina Gobernu honek, grebekin soilik ulertzen ditu gauzak. Eta horixe egin genuen. Irailaren 15ean, hezkuntza komunitate osoarekin batera, greba egin genuen. Eusko Jaurlaritzak ordea, jangeletako langileon eskakizunei entzungor egin zien. Horregatik, urriaren 7an, EAEko eskola publiko, pribatu eta itunduetako jangeletarako 3 eguneko greba deialdia egin genuen.

Greba deialdiak ezinbestekoak izan dira Eusko Jaurlaritzak bilera batera deitu gaitzan. Greba deialdi horiei esker, hezkuntzako partaide eta interlokutore bezala aitortzea lortu dugu. Izan ere, bilera horretan datuen kontrastea egitearekin batera, azaroaren 10ean berriz ere biltzeko konpromisoa lortu genuen interbentzio kirurgikorako konpromisoa lortzearekin batera.

LAB sindikatuak argi du bilerek ez dutela jangeletan bizi ditugun arazoak konpontzen. Aurretik zetozen eskaerei, pandemiak ekarritakoak gehitu behar zaizkie: lan karga hirukoiztu zaigu burbuilak kontrolatzen, jangela askotan betetzea ezinezkoa den protokoloak errespetarazten, behin eta berriz dena desinfektatzen, espazio berri eta ezberdinetatik mugitzen… Ezinbestekoa da ratioak jaistea, gure jardunak handitzea eta langile gehiago kontratatzea.

Ezinbestekoa iruditzen zaigu hemendik eta azaroak 10 bitarte, Eusko Jaurlaritzak hartutako neurrien ez nahikotasuna agerian uztea. Horregatik, aste honetako grebak, ezinbestekoak direla iruditzen zaigu. Eusko Jaurlaritzari borrokan dugun tinkotasuna, indarra eta duintasuna jangeletako langileen lan baldintza ez duinak zentroz zentro seinalatuz erakutsiko diogu.

LABen lehen ekimena bihar egingo dugu, urriaren 27an, Gasteizko San Inazio ikastetxean 10:30etik aurrera (Iturritxu kalea, z/g). Horrekin batera, batasun sindikalak deitutako mobilizazioetan izango gara bihar 12:00etan, Eusko Jaurlaritzako hezkuntzako ordezkaritzen aurrean, Bilbon (Gran Vía, 85), Donostian (Andia, 13) eta Gasteizen (San Prudentzio, 18).

Tubos Reunidos-ek aurkeztutako ABEEEa erretiratzea exijitzen dugu

Aritz Sorzabal
-
0
Tubos Reunidos-ek aurkeztutako ABEEEa erretiratzea exijitzen dugu

Tubos Reunidosek 8 hilabeterako ABEEE berria aurkeztu du, %66aren eraginarekin. Dokumentazioa aurkeztu ondoren, berau erretiratzea exijitu diogu Tubos Reunidos-eko zuzendaritzari.

LABentzat zentzugabekeria da 8 hilabetetako ABEEEaz hitz egitea, azalpenak jasotzen dituen memorian bertan jasotzen denaren arabera, zuzendaritzak 2020 eta 2021erako bideragarritasun plana aurkeztea aurreikusita duenean 2020a amaitu aurretik. Beste aukera batzuen artean aurreikusten du, berregituraketak eta neurri organizatibo berriei ekitea, eta honetaz gain, 2022 eta 2024 urteetarako plan estrategikoa aurrera eramatea, esaten duten moduan.

Ezin dugu momentu honetan hain eragin handia izango duen eta hain luzea izango den EEE bat aurkeztea, ez dakigunean zein den langileoi aurkeztuko diguten etorkizunerako proiektua.

Tubos Reunidos-eko langileok kokoteraino gaude enpresaren zuzendaritzak ABEEEak malgutasunerako tresna moduan erabiltzea. Kokoteraino gaude enplegu suntsiketaz eta eros-ahalmenaren galeraz, ABEEEak gehiegi baliatzeagatik sortutakoa, eta kokoteraino gaude, baita, 2017tik hona gure lan-baldintzak hobetu eta soldatak hobetzearen inguruan negoziatzeari ematen dioten ezezkoaz.

Langileok egoera hau bizi dugun bitartean, Tubos Reunidos taldeko zuzendaritza-batzordeko kideek, enpresaren egungo kaos organizatiboaren erantzuleek, bikoiztu egin dituzte euren soldatak azken urteotan.

Guzti horrengatik, ABEEE hau bertan behera uztea eta enpresa bizi duen noraezetik ateratzea ahalbidetuko dien bideragarritasun plana exijitzen dugu.

Mankomunitateak eta TCC enpresak arduragabekeriaz jokatu dute Txibiteren Gobernuak emaniko aginduaren aurrean, eta neurriak hartzeko eskatzen dugu

Aritz Sorzabal
-
0
Mankomunitateak eta TCC enpresak arduragabekeriaz jokatu dute Txibiteren Gobernuak emaniko aginduaren aurrean, eta neurriak hartzeko eskatzen dugu

LABek TCCn duen atal sindikalak bere iritzia eman nahi izan du Iruñerriko garraio publiko kolektiboari buruz bat-batean ezarritako neurriei buruz:

“Mankomunitateko buruak esan du billabesen murrizketa berriak bidaiariak utziko dituela geralekuetan, autobus-defizit horrek TCCko gidarien eguneroko lanean zuzeneko ondorioak izango dituela kontuan izan gabe.

Puntako orduetan erabiltzaileak kanpoan geratzeaz aparte, ez da herritarrentzako zerbitzu publiko egokia bermatuko. Horrez gain, gidariek kontrolatu behar dituzte billabesen jende muga, eta langilea arrisku batera eramaten du. Hori dela eta, tentsiodun egoerak ematea, liskarrak ere sortzeak eta ondorioz langile-talde horrekiko erasoak gertatzeak, gehiagotan gertatu den bezala, kezkatzen gaitu.  

Gobernuak edo Mankomunitateak neurriak hartzen dituztenean, kontuan hartu beharko lukete nor eta nola eragiten duten, ondorioz sortuko diren arazoei mahai gainean konponbideak jarriz. Billabesen edukiera %50era murriztea neurri onargarri baina irreala da, egunero lanera edo eskolara joateko garraio publikoa erabiltzen duten pertsona guztiek zerbitzua erabiltzen jarraituko dute.

Egoeraren arduradunek hutsik uzten dituzten zuloaz konstzienteak izateaz eta ezer ez egiteaz nazkatuta gaude. Ez gaude aurpegia emateko prest administrazioa beharrezko bitartekoak jartzeko prest ez dagoen bitartean”.

Gipuzkoako Metalgintzako hitzarmen berria sinatu dugu, langileen borroka eredugarriari esker

Aritz Sorzabal
-
0
Gipuzkoako Metalgintzako hitzarmen berria sinatu dugu, langileen borroka eredugarriari esker

Lan erreformaren ondorioz juridikoki baliorik gabe gelditu ondoren, Gipuzkoako Metalgintzako Hitzarmen berria sinatu dugu gaur goizean, ADEGIren egoitzan. 

2011tik, lan erreformaz baliatuta, ADEGIk uko egin dio hitzarmena negoziatzeari eta sarritan LAB bakardadean gelditu da hitzarmena aldarrikatuz. Baina, zer aldatu da orain? Urteetan enpresetan egindako borrokak, lortutako akordioek eta Bizkaiko Metalgintzan langileek egindako borroka eredugarriak ekarri dute hitzarmena. ADEGIk ez zuen Bizkaiko borroka Gipuzkoan errepikatzea nahi, eta bazekien LAB horretarako prestatzen ari zela.

ADEGIk aliatu paregabea izan du bide honetan. Izan ere, era ulertezinean, negoziaketa bilera baten bezperan, ELAk gehiengoaren babesik gabe ontzat eman zuen ADEGIren proposamena. ELAk ADEGIrekin aliantza egitea nahiago izan du, gainerako sindikatuekin eta Gipuzkoako langile guztiekin baino.

Gerora egondako bi hobekuntzaren ondoren, LABeko delegatuek batzarrean hitzarmena sinatzea erabaki zuten. 

Hitzarmenaren edukiekin pozik gaude, bereziki emakumeen eta azpikontratatutako langileen egoera hobetzen delako nabarmen, baina denak batera aritu izan bagina hobetu zitekeela uste dugu. Harro esan dezakegu, hori bai, patronalaren aurrean mobilizatu garen sindikatu bakarra izan dela LAB.

Hemendik aurrerakoei begira, lantokiz lantoki lortu ez ditugun edukiak (lanaldiaren jaitsiera, laneko bajen osagarria, baimenen hobekuntza, soldata igoera handiagoak…) lortzeko konpromisoa hartu dugu. Albiste on hau lantokietan hobetu behar dugu.

Sindikatuak presoen eskubideen defentsan mobilizatu gara berriro Bilbon

Aritz Sorzabal
-
0
Sindikatuak presoen eskubideen defentsan mobilizatu gara berriro Bilbon

LAB, ELA, UGT, ESK, STEILAS, CGT/LKN, CNT, EHNE, HIRU eta Etxalde sindikatuok elkarretaratzea egin dugu Bilbon, euskal presoen eskubideen alde. Sare erakundearen Izan Bidea ekimenaren baitan egin dugu mobilizazioa, Plaza Eliptikoan.

Presoen egoerari heltzea eta konponbide bat ematea premiazkoa dela adierazi, eta Espainiako Gobernuari salbuespenezko espetxe politikarekin amaitzeko exijitu dugu.

Sindikatuon oharra, gaurko elkarretaratzearem harira:

Gaur berriro elkartu gara hemen, Bilbo mailako presoen eskubideen aldeko sindikatuen mobilizazioan. 2018ko abenduaren hasi genuen dinamika hau, indarrean dagoen salbuespenezko espetxe politika bertan behera uzteko helburuarekin.

Neurri hauek lehenbailehen martxan jartzea eskatzen dugu: euskal preso guztiak Euskal Herriko kartzeletara gerturatzea; gaixorik dauden presoak eta adinez nagusienak berehala kaleratzea; gradu aldaketa eta ohiko kartzela legerian aurreikusitako kartzela onurak eskura izatea inolako diskriminaziorik gabe eta salbuespen legeria oro gainditzea.

Aipatu neurriok premiazkoak dira eta ezin da gehiago itxaron. Kartzeletako salbuespen-egoerak, oinarrizko eskubideak urratzeaz gain, bizikidetza demokratikoan aurrera egitea zailtzen du eta sufrimendu gehiago sortzen du.

“Covid-19a hedatzeak lan-karga jasanezina handitzea ekarri du, baina egoitzetako langileen kopurua ez dute handitu”

Aritz Sorzabal
-
0
“Covid-19a hedatzeak lan-karga jasanezina handitzea ekarri du, baina egoitzetako langileen kopurua ez dute handitu”

Elkarretaratzea egin dugu Bilbon, Lan Ikuskaritza aurrean, “SOS hirugarren adineko egoitzetan” leloarekin, helduen egoitzetan bizi den egoeraz ohartarazteko. Hain zuzen ere, titular publikoak jotzen ditugu egoeraren erantzule. Urte asko daramatzagu aldarrikatzen benetako irtenbidea zerbitzu publiko, doako, unibertsal eta nahikoa eskaintzea dela, hain funtsezkoa den zeregin hori egiten duten egoiliarrak eta langileak zaintzeko, eta mendeko pertsonen bizitzak bihurtu nahi dituzten negoziotik aldentzeko.

2016an, LAB sindikatuak sinadura bilketa bat hasi zuen, gizarte-zerbitzuetako langileen ratioak berritzeko premian arreta jarriz. Gasteizko Legebiltzarrean egon ginen kalitatezko zerbitzua izateko, nahitaez, zerbitzuok ematen dituzten langileen kopurua handitu behar dela defendatzen.

Hala eta guztiz ere, 2019ko uztailean, aurreko dekretua sinatu zeneko 21 urte pasa ondoren, Eusko Jaurlaritzak eskasa zen dekretu berria onartu zuen.

Baina egoera hori are gogorragoa bihurtu da hilabete hauetan, eta egoitzetako langileen osasuna suntsitzen jarraitzen du. Covid-19a hedatzeak lan-karga jasanezina handitzea ekarri du, baina egoitzetako langileen kopurua ez dute handitu.

Pertsonal falta dago eta lanean ari diren langileek baldintza fisiko eta psikologiko jasanezinetan egiten dute lan. Gaur egun egoitzetan, produkzio-kate batean (zaintza-kate batean) bezala lan egiten da. Atsedenik gabe.

Baina, nori egingo lioke mesede egoera honek? Erantzuna mingarria da, eta modu gardenean definitzen du zapaltzen gaituen sistema: kapitalista eta patriarkala.

Kapitalista, nahiz eta unibertsala, doakoa eta publikoa izan beharko lukeen gizarte-zerbitzu bat izan, enpresa pribatuen bidez kudeatzen delako. Eta enpresa horiek, besteon beharretatik sortzen diren onura ekonomikoak bilatzen dituzte.Patriarkala, berez zaintzailetzat hartzen diren milaka langile emakumeren bizitzaz elikatzen delako. Rol horri esker, ez da funtsezkotzat hartzen garatzen duten zeregina, eta eskaintzen zaizkien lan-baldintzak prekarizatu egiten dira.

1...492493494...1,589Page 493 of 1,589

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus