Amurrioko Tubacex-eko lantegi aurrean gertatu da, langileek 43 greba egun bete dituztenean. Ertzaintza gogor oldartu zaie berriz, foam balak eta guzti erabilita, inolako justifikaziorik gabe. Hau al da Jaurlaritzak hainbestetan argudiatutako proportzionaltasuna? #TubacexBorrokan pic.twitter.com/yGLiXEdvhl
— LAB SINDIKATUA (@LABsindikatua) March 25, 2021
Blog Page 447
Osakidetzarako garapen profesionalerako eredu berri bat proposatu dugu osasuneko mahai sektorialean
Mahai sektorialaren bileran, aurreko ereduan oinarritutako garapen profesionalerako ezohiko deialdi baten proposamenaren aurrean, LABek Osakidetzan eredu berri bat aplikatzea aldarrikatu du eta erakundearen zuzendaritzari eredu berri hori definitzeko negoziazio-esparru bat irekitzeko eskatu dio.
LABek oso jarrera argi eta kritikoa izan du Osakidetzan 2005ean ezarri zen garapen profesionalaren ereduari buruz. Zentzu honetan planteatu dugu garapen profesionalaren eredu bat, asistentziaren kalitatea hobetzea helburu duena, eta langileei ere aintzatespena ematen diena lan-baldintzak hobetuz. Izan ere, proposatzen dugun eredu berriak ezaugarri hauek izan beharko lituzke:
- Langileen eskubidea izatea.
- Burutzen balorazio subjektiboak ezabatzea, prozesu guztiz objektiboa, automatikoa eta unibertsala izanik, motibazioa, parte-hartzea eta talde-lana giltzarriak direlarik.
- Merezimenduak aldatzea. Euskararen ezagutzaren eta erabileraren balorazio nabarmena. Irizpide klasistak kentzea, kategoria guztietarako merezimendu berberak baloratuz.
- Genero ikuspegia kontuan hartzen duena.
- Ordainsari ekonomikotik haratago joatea. Ordainsari hori soldatan sartu behar da, eta izaera lineala izan behar du, hau da, kopuru berdinak kategoria guztietarako edo diskriminazio positiboa diru-sarrera txikienak dituzten kategoriekiko.
- Erabateko aldaketa prestakuntzari buruzko ikuspegian, ikastaroen negozioarekin amaituz eta aukera-berdintasuna bermatuz mundu guztiarentzat, baita gaur egun Osakidetzako ikastaroetan sartzeko aukera oso gutxi duten kategoria eta pertsonentzat ere. Prestakuntza Osakidetzak eskaini behar du, eta lanbide-talde guztietara iritsi behar du, modu unibertsalean, egonkorrean eta eguneratuan.
Bestalde, EPE berriari dagokionez, aurreko bileran egindako 3.545 lanpostuko eskaintzari eutsi zaio, baina Osakidetzak 40 plaza gehitu ditu familiako mediku kategorian. LABek berriro adierazi du kopuru hori ez dela nahikoa Osakidetzako egoera larriari aurre egiteko, plantilla zahartuta dagoelako, erretiro-zifrak gora egiten ari direlako, langileen egiturazko defizita dagoelako eta behin-behinekotasuna %40koa delako. Salbuespenezko egoera horrek, Osakidetzarena ezezik euskal administrazio publiko osoarena ere badenak, salbuespenezko neurriak eskatzen ditu, hala nola plantillak finkatzeko prozesuak abian jartzea eta Euskal Herrian lege propio bat ezartzea, Madrilgo legediak eta EAJren interesek ezarritako mugetatik askatzea ahalbidetuko diguna. Finkatzeko EPE horien aurretik, LABek aspalditik eskatu du plantillan sartu behar direla gaur egun kontabilizatzen ez diren baina egiturazko eta beharrezko funtzioak betetzen dituzten behin-behineko milaka lanpostuak. Osakidetzak berak gaurko bileran adierazi duenez, 4.162 lanpostu zenbatu ditu.
Azkenik, behin-behineko kontratazioetan ere euskararen ezagutza bermatzeko eskatu dio LABek Osakidetzari, erakunde publikoan euskararen erabilera normalizatzeko bide bakarra baita, Euskara Planak berak eta Eusko Legebiltzarrak eskatzen duten bezala. Egia da azken zirriborroak Euskara Planak agintzen duenera hurbiltzeko pauso txiki bat eman duela, baina oraindik ez dugu ikusten Osakidetzaren aldetik behar besteko bermerik eta borondaterik.
Ildo horretan, SATSE erizainen sindikatuaren jarrera aipatu nahi dugu, Osakidetzako zuzendaritzak proposatutako urrats txiki hori kritikatu baitu, eta, beraz, bizkarra ematen zaio eta oztopoak jartzen zaizkio euskararen erabileraren normalizazioari Osakidetzan, euskal herritarren eta erakunde publikoko langileen hizkuntza-eskubideen aitortzan eta euskaraz bizitzeko eta lan egiteko ahaleginean gutxien egiten duen euskal administrazio publikoan, alegia.
Haurreskolak Partzuergoko langileek euren aldarrikapenak eraman dituzte Lakuara
Zortzi greba egun arrakastatsuren ostean, sindikatuok EAEko Hezkuntza Saila eta Haurreskolak Partzuergoa mugiarazi ditugu, eta mahai negoziatzailearen bilerara deitu digute Lakuan. Kanpoaldean, bilera egin bitartean, gure aldarriak jendarteratu ditugu, azken egunotan familiekin egin dugun bezala. Hain zuzen ere, besteak beste, Haurreskolak Partzuergoaren doakotasuna eta integrazioa eskatzen dugu Hezkuntza Sailean; dauden akordioak errespetatzea eta betetzea; lan-hitzarmen berriaren negoziazioa abiatzea; langileen behin-behinekotasun tasarekin bukatzea eta lanpostuak egonkortzea; irakaskuntza publikoan Osakidetzak egiten duen Norbera Babesteko Ekipamenduen horniketan Haurreskolak Partzuergoa gehitzea eta aurrekontua handitzea.
Salatu dugu Geroa Baik eta PSNk erregimenaren urteetako irizpide baztertzailea berreskuratu dutela, Nafarroako Kontratazio Batzordetik kanpo utzi baigaituzte
2018ko apirilaren 12an, Nafarroako Parlamentuak Kontratu Publikoen Legea onartu zuen, hortik aurrera administrazio publikoek enpresa pribatuei esleituko zizkieten kontratuak arautuko zituena. LABen ekimenez CCOO eta ELA sindikatuekin batera osaturiko gehiengo sindikalaren lanari esker —UGTk alde batera egin zuen azken unean euskarari dion fobiagatik— lege hori hobetu zen, eta baldintzak jarri ziren administrazioek azpikontrataturiko enpresetako milaka langileren lan-baldintzak duintzeko. Hala ere, LABek orain salatu du lege hori ez dela betetzen ari, eta horretarako sindikatu hau Kontratazio Batzordetik baztertu dutela.
Ordu hartan, LABek administrazioei galdegin zien aurrerantzean Kontratu Publikoen Legea zorrotz bete zezaten. Aitzitik, indarrean sartu zenetik bi urte baino gehiago igaro ondoren, egiaztatu dugu haren ez-betetzeak asko direla. Beste era batera esanda, zinismo ariketa argi batean, Geroa Bairen aurreko Gobernuak eta egungoak, PSNrekin batera, bere irudia salbatu zuten, baina ezer ere ez egiteko erabakiarekin jarraitzen dute. Hau da, Gobernuak enpresa pribatuei laguntzen jarraitzen du diru publikoaz baliatzen, interes orokorraren eta baldintza prekarioetan dauden langileen interesen gainetik.
Honetan guztian berriak ez garenez, legea tramitatzen ari zen bitartean, aldarrikapen garrantzitsuenetako bat izan zen erakunde sindikal guztiek Kontratazio Batzordean parte har zezaten bermatzea, batere bazterketarik gabe. Kontratazio publikoaren sistemaren funtzionamendu ona zaintzea da Batzorde horren zeregina. Helburua argia zen: diru publikoarekin iruzurrik egiten ez dela, zerbitzua betetzen dela eta milaka langileren lan-baldintzak errespetatzen direla bermatzea. Bada, horretarako konpromisoa lortu zuten sindikatuek legeqaren alde bozkatu zuten alderdi politikoekin.
Hala eta guztiez ere, Geroa Bairen aurreko Gobernuak azken orduan egindako Kontratazio Publikoaren Batzordea arautzen duen ekainaren 26ko 74/2019 Foru Dekretuak berreskuratu egin zuen erregimen zaharreko urteetako irizpide baztertzailea; CCOO eta UGTren parte-hartze bakarra bermatzeko. Irizpide diskriminatzaile hori zuzentzeko eskatuz sindikatu honek bidalitako gutun bati 2021eko otsailaren 5ean emandako erantzunean, Ekonomia eta Ogasuneko sailburu Elma Saizek egungo diskriminazioa berretsi zuen, eta LABen parte-hartzeari atea itxi zion.
LAB sindikatutik oso larritzat jotzen dugu hartutako konpromisoak ez betetzea eta iraganeko irizpide baztertzailea berreskuratzea. Era berean, argi daukagu erabaki horren atzean borondate politiko zitala dagoela, egungo eskema apurtuko duten aldaketak eragozteko; eskema horretan Gobernuak ahalbidetzen du, enpresek irabaziak lortzen dituzte, eta milaka langile kaltetzen dira. Eta hori egin ahal izateko, UGTk eta CCOOk bezala jokatzen ez duten beste sindikatuak baztertu behar dira. Izan ere, zer lan egin dute bi urte hauetan CCOO eta UGT sindikatuek, kontratazio publikoak langileen lan-baldintzak urratzen jarraitu baitu? Zergatik edo zeren truke ez dute konpromisoa bete eta beste alde batera begiratu dute?
Praktika hori zuzendu egin behar da, bere larritasunagatik eta irudikatzen duenagatik. Hori da Nafarroako Gobernuari eskatzen dioguna. Gainera, Nafarroako Parlamentuan ordezkaritza duten alderdiekin bilera bana eskatu dugu, apartheid sindikal hori lehenbailehen buka dadin, eta legea benetan bete dadin.
Nafarroako garbitzaileek hitzarmen duin bat aldarrikatu dute patronalaren aurrean
LAB, CCOO, ELA, UGT eta Solidari sindikatuok deituta, Nafarroako Garbiketa sektoreko langileek elkarreraratze jendetsua egin dute CEN Nafarroako enpresaburuen elkartearen egoitza aurrean, Iruñean. Bertan, patronalaren trapu zikin guztiak salatu eta hitzarmen duin baten aldarria zabaldu dugu. Tuteran ere mobilizatu dira.
Hain zuzen ere, sindikatuok gogoratu dugu garbiketa enpresetan emakume langileen %80 lanaldi partzialekin dabilela, eta emakume langileen %90ek gizon langileek baino gutxiago kobratzen dutela. Soldata arrakala eta gizon eta emakumeen arteko desberdintasunak ezabatuko dituzten hobekuntzak lortzen ez badira, grebara joko dugula ohartarazi dugu berriro, duela pare bat aste egindako batzarrean jakinarazi bezala.
Arabako helduen egoitzetako langileak berriro mobilizatu dira, hitzarmen propio eta duin baten defentsan
Blokeo egoeran dago Arabako helduen egoitzen gatazka, eta, horren aurrean, sindikatuok sektoreko mobilizazioekin eta grebekin jarraitzen dugu. Hain zuzen ere, berriro ere gure adinekoak zaintzearen aldeko apustua egiteko eskatu diogu Aldundiari, aurrekontu partiden bidez egoitza pribatuetarako hitzarmen probintzial bat sinatzearen aldeko apustua eginez.
Arabako egoitzak kudeatzeaz arduratzen diren enpresekin izandako bileretan, bertaratutako enpresa guztiek (gogoratu behar da haietako batzuk ez direla joaten, batzuk joango ez direla jakinarazi gabe) adierazi zuten garrantzitsua dela probintzia-hitzarmen propio bat izatea (hori bai, arrazoi erabat desberdinekin), eta, halaber, beharrezkotzat eta ezinbestekotzat jotzen dute Arabako Foru Aldundiak hitzarmen honetan parte hartu behar duela, horretarako aurrekontu-partida bat emanez, bidezko eredu bat lortzeko bidean enpresa, sektoreko langile eta erabiltzaileei begira.
Zentzu honetan, sindikatuok berriro bildu gara Aldundiko Batzar Nagusietan dauden talde politikoekin, helduen egoitzekin dugun kezka helarazteko; izan ere, Aldundiak hitzarmen hau ekonomikoki babesten ez badu, ezingo litzateke sinatu. Talde politiko guztiek adierazi dute oso kezkatuta daudela sektorearen egoerarekin, eta, aldi berean, langileei baldintzarik gabeko babesa eman diete, baina bik bakarrik proposatu dute ekintzaren bat Diputazioa presionatzeko.
Osakidetzak Tolosako Asuncion Klinika bere baitan txertatzeko eta langileak subrogatzeko eskatu dugu
Agerraldia egin dugu Tolosan, Zerbitzu Publikoetako Federazioko idazkari Gorka Berasategik buru, Asuncion Klinika kudeatzen duen Inviza enpresaren inguruan dabiltzan albiste eta mugimendu desberdinen aurrean gure jarrera azaltzeko. Hala, berretsi dugu klase sindikatu bezala Invizako langileak defendatuko ditugula beti, eta Tolosaldeko herritar guztien eskubideak bermatzeko beharra ikusten dugula; hots, ospitale publiko bat izateko eskubidea. Hain justu, horregatik izan gara hasieratik Tolosaldeko Osasun Publikoaren aldeko Plataformaren (TOPA) parte.
LABen iritziz, Eusko Jaurlaritzak zor historikoa dauka Tolosaldearekin, EAE-ko eskualde bakarra delako ospitale publiko bat ez duena; aldiz, ospitale pribatu kontzertatu bat inposatu digute. “Argi dago esperimentua gaizki atera zaiela, nabarmen gaizki”, adierazi dugu. Era berean, zor historikoa dauka ere Invizako 350 langileekin, zeintzuk urteetan zehar beste eskualdeetako zerbitzua eskaini behar izan dute bitarteko eta baldintza okerragoetan. Erabat diskriminatzailea.
Agerraldian azaldu dugun bezala, “ibilbide luze baten ondorioz gaude gauden tokian eta hasiera hasieratik egin genuen aldarrikapenak oraindik ere indarrean jarraitzen du: eskualdeko ospitale publikoa nahi dugu. LAB urteetan zehar aldarrikapen honen alde borrokan egon da eta horretan jarraitzen dugu: Asuncion Klinika publifikatzearen alde!”.
Gorka Berasategiren esanetan, “Tolosaldeako ESIan diru publikoa mozkin pribatua sortzeko erabilia izan da. Osakidetzak bere zerbitzuak handitu eta indartu beharrean, pribatizazioari eta kontzertazioari ekiten dio behin eta berriz. Hiritarron osasunarekin diruzalekeria sustatzea erabat salagarria dela uste dugu eta horrela adierazi nahi izaten diogu Osakidetzako zuzendaritzari egiten ditugu mobilizazio eta greba guztietan”.
Pandemia egoerak zerbait erakutsi badigu, oinarrizko zerbitzuetan inbertsioa eta kontrola handitu behar dela da. Osasun langileak babes neurririk gabe lanean egon dira denbora luzez; osasungintza eremu pribatuetan egoera are eta okerragoa izan da. “Argi eta garbi esan behar dugu, osasungintzan ematen diren pribatizazio eta kontzertazioekin amaitu egin behar dela. Kalitatezko osasun zerbitzu publiko bat beharrezkoa dugu, baita Tolosaldean ere”, azaldu du Zerbitzu Publikoetako Federazioko idazkariak.
LABen iritziz, Tolosaldean osasun zerbitzu publiko bat martxan jarri behar da lehen lehenbailehen. Diru publikoa esku pribatuetara bideratzea utzi eta kalitatezko zerbitzu publiko bat eskaini behar zaie hiritarrei. Horrelaxe adierazi izan du Tolosaldeako biztanleriak urteetan egin diren mobilizazioetan. Premiazkoa dela uste dugu; ospitale berriaren eztabaidatik harago, zerbitzu publikoa lehenetsi behar da, gure iritziz.
Hori guztia dela eta, Asunción Klinika publifikatzeko pausoak eman daitezen aldarrikatzen dugu. “Osakidetzak klinika bere baitan txertatu eta langileak subrogatzea eskatzen dugu, prozedura legalek agintzen duten bezala, hain zuzen ere. Invizari ematen zaion dirutza zerbitzua hobetzeko erabiltzea eskatzen dugu, diru publikoaren xahuketarekin amaitzeko. Era berean, Tolosaldeak beharrezkoak dituen osasun zerbitzuei buruzko hausnarketa kolektibo bat abiatu behar dela aldarrikatzen dugu”, erantsi du Gorka Berasategik.
EAEko Hezkuntza Saila eta Haurreskolak Partzuergoa mugiarazi ditugu
Pasa den astean EAEko Hezkuntza Saila eta Haurreskolak Partzuergoari egin genien bilerarako deiak erantzuna izan du, gaur bertan jaso baititugu martxoaren 24rako mahai negoziatzale baterako deia eta gai-ordena. Hori dela eta biharko, martxoak 23, Lakuan deituta genuen mobilizazioa 24ra pasatu dugu.
LAB, STEILAS eta ELA sindikatuok Hezkuntza Saila eta Haurreskolak Partzuergoa hilaren 23rako Mahai Negoziatzailera deitu genituen pasa den astean. Azkenean, haurreskoletako langileok 8 greba egun eta hamarnaka mobilizazio burutu ostean, deia heldu da.
Gogoratu, bestalde, abenduaren 22an izan genuela ikasturteko mahai megoziatzaile bakarra, zeinetan administrazioak zalantzan jarri zituen Haurreskolak Partzuergoaren bideragarritasuna eta dauden akordioak.
Lotsagarria da Hezkuntza Sailburua eta Haurreskolak Partzuergoko Zuzendaritza Batzordearen Lehendakaria den Jokin Bildarratzek, eta Zorione Etxezarraga gerenteak hezkuntza-proiektu honekiko orain arte erakutsi dituzten arduragabekeria eta langileekiko errespetu falta. Orain, ikusteke dago negoziatzeko duten borondatea eta gaitasuna. Hori dela eta, langileok familiekin batera deituta ditugun mobilizazioak inoiz baino garrantzitsuagoak direla esan beharra dugu. Ondorioz, biharko Gasteizen deituta genuen mobilizazioa asteazkenera pasatuko dugu. Hitzordua, 15:30ean izango da, Lakuan.
Gaur hainbat herritan deituta dauden mobilizazioak aldaketa barik egingo dira.
Covid kasuengatik baheketa eskatu dugu Bilboko instrukzio epaitegietan
Bilboko 10. instrukzio epaitegian izan zen lehena hainbat covid kasu izaten. Gaur egun 8 kasu positibo daude epaitegi honetan. Horietako bik hasieran negatibo eman zuten.
Hirugarren solairuan 7., 8., 9. eta 10. epaitegiak daude. Bertan, 50 pertsona inguruk lan egiten duten leiho gabeko solairu itxian. Birusa erraz iritsi zen 9. instrukzio epaitegira, eta kasu positibo bat agertu da. Gaur jakin dugu 8. instrukzio epaitegiko langile batek ere positibo eman duela. Gainera, Instrukzioko 9. epaitegiko langilearen senide batek ere positibo eman du, lehen solairuan dagoen 7. zigor epaitegian lan egiten baitu.
Ez diogu geure buruari azaltzen nola ez duten baheketa berehala egin. Sindikatu honen salaketa eta kexaren aurrean bakarrik erabaki dute instrukzioko 9. zenbakiko langileei ere deitzea, baina oraindik ez diete guztiei deitu; izan ere, etxean sintomak dituen langileari oraindik ez diote deitu.
Esan digutenez, Osakidetzaren irizpideak dira horiek, baina ezin dugu sinetsi, albisteetan ikusten ari gara gimnasioaren kasua, bertatik igaro diren langile guztiei deitu baitiete, edo taberna baten kasua, non positibo batekin probak mundu guztiari egingo baitizkioten.
Izan al daiteke arrazoia Osakidetzak IMQri (Eusko Jaurlaritzako Justizia Sailak kontratatutako prebentzio-zerbitzu medikua) langile bakoitzari egindako proba bakoitzeko kobratzen diola
Esan digute langileek gezurra esaten dutela denbora guztian maskara jantzita ote zeramaten galdetzen dietenean, baina sindikatu honek egia esan duen lankide baten baino gehiagoren berri du, eta hala ere, berretsi egin dute Osakidetzaren irizpidea dela PCRak ez egitea.
Bilboko epaitegietara etengabe joaten da publikoa, manparek ez dute mostradore osoa estaltzen, epaitegiko langileek kutxak, paperak, edozein gauza jarri behar izan dute mostradoreak estaltzeko. Kasu askotan, telefonoak partekatzen jarraitzen dute kasu askotan, baita ordenagailuak ere. Mostradorean 8 laguntza judizial ari dira lanean, egunero telefonoak eta ordenagailuak partekatuz, mostradore osoa estaltzen duen manpararik gabe. Pandemiatik hona, gainerako langileak mostradorean daude, laguntza judizialei itsatsita, euren telefono eta ordenagailuak erabiliz…
LABek denbora darama langileak kutsaduratik babesteko behar diren baliabideak jartzeko eskatzen. Era berean, aktiboki eta pasiboki eskatu diegu langile guztiei maskara erabil dezatela lanpostuan dauden bitartean.