2026-04-25
Blog Page 398

Errefusatu egin dugu UGT, USO, La Senda de Ugarte eta CCOO sindikatuek Sidenor enpresarekin Basaurin lantegiko hitzarmenerako sinatu duten aurreakordioa

Aritz Sorzabal
-
0
Errefusatu egin dugu UGT, USO, La Senda de Ugarte eta CCOO sindikatuek Sidenor enpresarekin Basaurin lantegiko hitzarmenerako sinatu duten aurreakordioa

Aurreakordio honek ez du errespetatzen Sidenor Basauriko lantokiko langileen borondatea. Izan ere, azaroaren 8an langileen batzarra egin zen, eta bertan taldeko lantoki batzuei aplikatzen zaien Esparru-Akordioaren pean jarraitzearen aurka bozkatu zen. Lantokiko langileek oso argi utzi zuten Esparru-Akordioaren kontra egiten zutela eta beren lan-baldintzak Basaurin negoziatu behar zirela, eurek bozkatu eta aukeratutako ordezkaritza sindikalarekin.

Sinatutako aurreakordioak Esparru Akordioan ezarritakoari eusten dio, ez dira berreskuratu aurreko negoziazioetan galdutako eskubideak, eta gainera, soldata-igoera ez dago KPIari lotuta, eta horrek esan nahi du Sidenor Basauriko langileek erosteko ahalmena murrizten jarraituko dutela.

Urteko lanaldia Bizkaiko Metalgintzako Hitzarmenean ezarritakoa baino ordu gehiagokoa da. Sidenorreko langileek Bizkaiko metalgintzako enpresako gainerako enpresetan baino ordu gehiago lan egiten dute urtean.

Ez da hobetu lana eta familia bateragarri egitea. Aurrekoetan ezarri ziren neurriek asko zailtzen dute uztartzea, egutegiak ez baitira arautu eta malgutasuna oso handia baita.

Aurreakordioan adostutako gaiak ez dira funtsezkoak, eta horietako askok ez diote Basauriko langileen langileen kolektibo osoari eragiten, baizik eta haren zati bati.

Sidenorrek asko erabiltzen du azpikontratazioa Basauriko lantegian, neurriz kanpo; batzuetan, azpikontrata horietan lan egiten duten pertsonen kopurua Sidenorreko langileen bestekoa da, eta ez da inolako neurririk aurreikusten azpikontratetako arazorik konpontzeko.

Horren guztiaren aurrean, esan behar dugu espero dugula Sidenor Basauriko langileen batzar batean, langileen kolektiboarekin batera sakondu ahal izatea LABek akordio hori ez onartzeko dituen arrazoietan.

Osakidetzak atea zabalik utzi dio sindikatuak sinatutako Lanbide Garapenerako Akordioa ez betetzeari

Aritz Sorzabal
-
0
Osakidetzak atea zabalik utzi dio sindikatuak sinatutako Lanbide Garapenerako Akordioa ez betetzeari

Mahai Sektorial bilera egin da. Bertan, Garapen Profesionalaren gaian, Osakidetzak arrazoi burokratikoak, Ogasun sailaren txostenaren beharra, jarri ditu aitzakia gisa bere hitza bete ez izana arrazoitzeko, errua beste batzuei leporatuz, modu honetan bere arduragabekeria eta langileekiko errespetu eza ezkutatu nahian. Garapen Profesionala ordaindu beharra epaitegiek agindu zuten, eta gerora garpen profesionalaren ez-ohiko deialdiaren akordioa sinatu genuen besteak beste LAB sindikatuak. Akordio horren arabera, ez-ohiko deialdi honetarako izen-emate epea abenduaren 31ean hasia beharko litzateke.

Osakidetzak bere langileei tratu txarra ematen diela gero eta nabarmenagoa da. LABetik izugarriak iruditzen zaizkigu Osakidetzako zuzendaritzak langileekiko duen utzikeria, errespetu falta eta mespretxua. Gaurko Mahai Sektorialean aurreakordioa deitu diote 2021eko uztailean sinatutako akordioari, eta akordioa betetzearen erantzukizuna beste erakunde batzuen gain utzi dute.

Halaber, Kudeaketa Klinikoko Unitateen bidez, osasungintza publikoaren atomizazioaren aldeko apustuarekin jarraitzen du Osakidetzak. Unitate hauen konfigurazioak bertako arduradunei erabateko boterea ematen die langileentzako funtsezkoak diren gaietan. Kontratazioak eta gestio ekonomikoa bere kabuz kudeatzeko, Osakidetzatik at, aukera ematen dien araudi batean oinarritzen dira Kudeaketa Klinikoko Unitateak. Pizgarri ekonomikoak ere ekar ditzakete. Osasungintza publikoaren ikuskera zatikatu hau, funtzionatzeko modu ez oso gardenekin, osasungintza desintegratzea eta kontrapartida onartezinen bidez Kudeaketa Klinikoko Unitateen kontrola mantentzea helburu duen eredu batetik baino ezin da etorri. Iraganean, eta agian gaur egun, azterketak filtratzearen bidez zerbitzu-buruei beren menpeko zerbitzuen gobernantza errazten bazitzaien, beren lantaldeen konfigurazio askea ahalbidetuz, Kudeaketa Klinikoko Unitateek kontrapartida berberak eskaintzen dituzte, botere absolutuak dituzten buruzagiekiko langileen otzantasuna lortzeko.

Osakidetzako hirugarren Euskara Planari dagokionez, argi geratu da ez dagoela anbiziorik, zehaztapenik, eperik eta neurri sakonik lan-eremu euskalduna eta herritarren hizkuntza-eskubideak errespetatuko dituen osasun-arreta bermatzeko.

Laburbilduz, Osakidetza langileoi tratu txarrak ematen eta eskubideak kentzen ari zaigu. Espreski ari da egiten, eta, horregatik, Osakidetzako arduradunen utzikeria, sinesgarritasun falta eta despotismoa gorabehera, erakundean gobernantza ziurta dezaketen neurriak ezartzen ditu. Baina langileei tratu txarrak emateaz gain gutxietsi egiten dute; beraz, urrezko aukera dugu igande honetan, ozen eta argi oihukatzeko ez dugula utziko osasun publikoari, gure langileei eta gure langileei tratu txarrik ematen.

Lan heriotzak patronalak ezartzen dituen baldintza eta lan egiteko moduen emaitza dira

Aritz Sorzabal
-
0
Lan heriotzak patronalak ezartzen dituen baldintza eta lan egiteko moduen emaitza dira

Atzo, hilak 19, beste lan istripu hilgarri baten berri izan genuen, alegia, Maderas Melchor Gomezeko M.M. 46 urteko langilea hil zen Pipaoneko mendietan lanean zegoen bitartean, Araban. Adar haundi batek kolpea eman zion lanean ari zela. Honekin, gutxienez, 4 dira Euskal Herrian aurten hildako langileak. Lehenik eta behin, LAB sindikatutik ¡gure elkartasuna eta babesa helarazi nahi diegu hildakoaren senide, lankide eta ingurukoei.

Atzo gertatutakoa ez da berria. Urtero ditugu honelako lan istripuak. Izan ere, pasa den urtean 5 langile hil ziren basogintzan, baina ezaguna izan arren, praktikan ez dituzte neurriak hartzen honelako istripuak berriro gerta ez daitezen. Baina ematen du administrazio publikoen arduradunek ez dakitela hau. Non daude administrazioko arduradunak heriotz berri hau salatzeko? Zein aldaketa eta zein pausu emateko prest daude egoera eta eredu hau geldiarazteko?

Argi daukagu lan istripuak ez direla zoriak edo kasualitateak sortuak, ematen diren lan harremanen, prekarizazioaren, lan arautegiaren eta azpikontratazioaren emaitza dira.

Langileok, bizi ahal izateko egiten dugu lan eta ez saiakera horretan bizia galtzeko. Lan istripuak ez dira bizitzako gertakari arruntak, langile bat hiltzea ez da lanaren ezaugarri bat. Ez, lan istripuak patronalak lan egiteko orduan ezartzen dizkigun baldintza eta lan egiteko moduen emaitza dira.

LAB sindikatutik argi dugu, bizi eta lan duinak behar ditugu, lanetik onik eta bizirik bueltatzeko eskubidea dugu, norbanakoena, familiena eta gizarte osoarena den lakra honekin bukatzeko bide bakarra borroka eta antolakuntza direla. Lan harremanen eta joku arauen aldaketa batetik etorriko da aldaketa. Eredu berri bat gauzatu behar dugu, langileon bizitza eta osasuna lehenetsiko dituena.

Horretarako, bihar hilak 21, eguerdiko 12:00etan, SEAren aurrean elkarretaratze bat egingo dugu Gasteizen, ELA, ESK, STEILAS, HIRU eta EHNErekin batera, azken laneko heriotza salatzeko.

Gure borroka sindikalaren ondorioz, EAEko Lanbide Heziketako Irakasle Teknikoen afera konpontzeko aurrerapausoa eman dugu #LortuDugu

Aritz Sorzabal
-
0
Gure borroka sindikalaren ondorioz, EAEko Lanbide Heziketako Irakasle Teknikoen afera konpontzeko aurrerapausoa eman dugu #LortuDugu

Jakin berri dugu EAEko Irakasle Tekniko guztiek EHUk eskainitako Formakuntza Pedagogikoa egiteko aukera izango dutela, ikastaroan sartzeko baldintza gisa ezarritako hizkuntza-mailaren frogagiria matrikula egitean aurkeztu beharrean, geroago aurkezteko aukera eman baitiete, LABek eskatzen zuen bezala. Enplegu Publikoaren Eskaintzan aurkeztu ahal izateko beharrezkoa den formakuntza egiteko, atzerriko hizkuntza baten B1 mailako frogagiria exijitzen du unibertsitateak. Arazoa zen irakasle tekniko batzuek, hizkuntza-maila izan arren, ezin zutela garaiz aurkeztu, ikastaroetatik kanpo, eta, ondorioz, lanean jarraitzeko aukerarik gabe geratzen zirela.

Hori dela eta, eta arazoari konponbidea emateko asmoz, Hezkuntza Sailari eskatu genion EHUk bi aukera eman zitzan irakasle tekniko guztiek behar duten formazioa egin zezaten: batetik, hizkuntza gaitasuna akreditatzeko froga EHUk egitea edo eta, bestetik, hizkuntza gaitasuna titulua lortzeko baldintza gisa ezartzea eta ez izen-emateko orduan aurkezteko ezinbestekoa. Lehenengoa ezinezkoa zela-eta, azkenean, presio sindikalaren eta negoziazioen ondorioz, matrikulatzeko momentuan ordez, langileek akreditazioa lortzeko azterketa gaindituko ahalko dute udaberriko deialdian, ikastaroa hasi eta gero.

Hiru urteko borrokaldi baten ondoren, irakasle teknikoen kolektiboak argia ikusten du, eta hurbilago du beren aferaren irtenbidea. Gogoratu, aurreko ikasturtearen amaieran, 16 espezialitate ez-singularretako ordezko irakasleentzat Jaurlaritzak egindako proposamenean hurrengo LEPean aurkeztu ahal izatea eta Formakuntza Pedagogikoa egiteko aukera jasotzen zirela. Ez-nahikotzat jo genuen, besteak beste LEPa gaindituko ez luketenen etorkizuna zein izango zen ez baitzigun esan Hezkuntza Sailak.

Orain, garaipen baten albisteagatik zoriondu behar ditugu langileak. Eta aurrerantzean emango diren urratsetan, LABetik langile guztientzako berme izateko lanean jarraituko dugu. Lanbide Heziketako langile guztien lanpostuen defendatzen jarraituko dugu!

Sokoa enpresak Sebastien Hiriart bidegabe kaleratu zuela berretsi du Paueko Dei Auzitegiak #LortuDugu

Aritz Sorzabal
-
0
Sokoa enpresak Sebastien Hiriart bidegabe kaleratu zuela berretsi du Paueko Dei Auzitegiak #LortuDugu

Paueko Dei Auzitegiak Sokoa enpresa zigortu du bertako langile ohi eta LABeko kide Sebastien Hiriarti 10.000 euroko kalte-ordaina ordaintzera, kaleratzea arau kontra eman zela argudiatuta. Halaxe erabaki zuen Baionako Prud’hommetako kontseiluak bere momentuan eta halaxe berretsi du, orain, Paueko Dei Auzitegiak.

Gure helburuak bete dira epai honekin, besteak beste, frogatuta geratu baita Hiriart ez zela kaleratua izan enpresak argudiatutako ekoizpen arrazoiengatik.

Lau urte iraun du prozesu judizial honek, eta antolakuntza, borroka eta ekintza juridikoari esker lortu dugu langilearen aldeko epaia. Tamalez, ez da lehen aldia Sokoa enpresa zigortzen dutela. Jazarpen sindikalarengatik, lan kodea ez errespetatzeagatik edo hitzarmen kolektiboa ez aplikatzeagatik ere bukatu du epaitegietan. LABek enpresarekin konpondu nahiko lituzke arazo hauek guztiak, mahai baten bueltan, Justiziara jo gabe, baina, hori gertatu ezean, antolakuntza eta borroka izango dira gure lanabes.

LABen oharra, epai honen harira:

Elkarretaratzeak egin ditugu Nafarroan, pandemiaren kudeaketa zerbitzu publikoak mugara eramaten ari dela salatzeko

Aritz Sorzabal
-
0
Elkarretaratzeak egin ditugu Nafarroan, pandemiaren kudeaketa zerbitzu publikoak mugara eramaten ari dela salatzeko

Nafarroako Gobernuak pandemia kudeatzeko moduak mugara eraman ditu zerbitzu publiko asko. Beharbada, kasurik nabarmenena Osasunbidea da, baina ez da bakarra. Nafarroako SOS Zerbitzua kolapsatzeko zorian dago. Adinekoen egoitzetan oso tentsionatuta dago egoera. Ikastetxeetan, aurre egin behar diote kutsatzeen gorakadari eta plangintza egokien faltari. Jarrai genezake, horrek guztiak ia zerbitzu publikoei eragiten baitie, modu batera edo bestera. 

Ia bi urte daramatzagu pandemian eta badirudi ez dugula deus ikasi. Olatuak bata bestearen ondotik etorri dira, baina akats berberak errepikatzen dira, protokoloak maiz aldatzen dira eta ez da neurririk hartzen. Ondorioa da nabarmen okerrera egin dutela lan baldintzek eta herritarrei eskaintzen dizkiegun zerbitzuek. Bien bitartean, gure kudeatzaileei bururatzen zaien gauza bakarra da plantilla estutzen jarraitzea.

Horregatik, aski da! esaten dugu ozen, eta Nafarroako Gobernuari eskatzen diogu zuzentzeko, langileei eta haien ordezkariei entzuteko eta egoerari aurre egiteko benetako neurri zehatzak hartzeko.

Horregatik guztiagatik, LAB sindikatuak elkarretaratzeak deitu ditu Nafarroako hainbat lekutan: Iruñean, Tuteran, Lizarran eta Elizondon, tartean.

Urtarrilaren 23ko mobilizazioetan parte hartzeko deia egin dugu, kalitatezko osasungintza publikoaren defentsan

Aritz Sorzabal
-
0
Urtarrilaren 23ko mobilizazioetan parte hartzeko deia egin dugu, kalitatezko osasungintza publikoaren defentsan

Urtarrilaren 23an kalera ateratzeko deia egin diegu Osakidetzako langile eta herritarrei LAB, SATSE, ELA, CCOO eta UGT sindikatuok, lehen mailako arretaren egoera larria eta ospitaletako arretaren gainkarga salatzeko eta egoera horri aurre egiteko berehalako neurriak eskatzeko. Mobilizazio egun hau iragartzeko, auto karabanak egin ditugu, asteotako dinamika mobilizatzailearen baitan.

Zentzu honetan, joan den astean, elkarretaratzeak egin genituen Araba, Bizkaia eta Gipuzkoako osasun etxeen aurrean.

Gipuzkoako Foru Aldundiko garbitzaile azpikontratatuek hitzarmen duin bat aldarrikatu dute

Aritz Sorzabal
-
0
Gipuzkoako Foru Aldundiko garbitzaile azpikontratatuek hitzarmen duin bat aldarrikatu dute

Azpikontratatutako langile hauek Aldundiko zuzeneko garbitzaileak baino 6.000 euro gutxiago jasotzen dute, lan bera egiteagatik. Foru Jauregiaren aurrean egindako elkarretaratzean salatu dute administrazioak, berriro ere, kostuak merkatzeko bidea hartu duela zerbitzua azpikontratatuz.

LAB, ELA, ESK, CCOO eta UGT sindikatuon ohar bateratua:

Gipuzkoako Foru Aldundiko garbikuntzako langile azpikontratatuek mobilizazioak hasi dituzte enpresari benetako negoziazioa eta kolektiboaren erosmen ahalmena ez galtzea eskatzeko.

Hitzarmen berriaren negoziazioa 2021ko maiatzean hasi zen. Azpikontratatutako kolektibo hoenk, Aldundiko zuzeneko garbitzaileekin alderatuta, 6.000€ gutxiago kobratzen ditu. Azpikontratatutako enpresa bateko langile izate hutsagatik. Berriz ere ikusten dugu administrazioak azpikontratazioaren bidea hartu duela kostuak merkatzeko.

Baina administrazioak ez ezik, enpresa esleipendunak ere, EULENek, 6.000 euroko soldata-arrakala izanik, azpikontratei soldatak izoztea proposatzen du. EAEko KPIaren itxiera % 6,5ekoa izan denean, 2021erako soldatak izoztea proposatzen du enpresak, % 1,5eko igoera 2022rako eta % 1,75ekoa 2023rako.

Enpresa-batzordeak uste du planteamendu hori onartezina dela. Pandemia garaian, birusik ez hedatzeko garbitzaile hauen lana funtsezkoa izanik, onartezina iruditzen zaigu soldatak izoztea. Baina ez bakarrik, soldata-igoera KPIarekin ez lotzea jokoaren arauak aldatzea da, eta ez dugu onartuko.

Badakigu egoera honen erantzuleak enpresa eta Gipuzkoako Aldundia direla, azken batean. Administrazio horri bilera eskatu diogu egoera azaltzeko, eta gaur egun ez digu erantzun.

Horregatik guztiagatik, langileek elkarretaratzea egin dugu. Diputazio parean elkartu gara administrazioari egoera honen aurrean daukan erantzukizuna eskatzeko.

Desgaitasuna duten pertsonen arretarako zerbitzu publiko eta duinak aldarrikatu ditugu Iruñean

Aritz Sorzabal
-
0
Desgaitasuna duten pertsonen arretarako zerbitzu publiko eta duinak aldarrikatu ditugu Iruñean

LAB, ELA, UGT eta CCOO sindikatuon oharra, Pertsonen Autonomia eta Garapenerako Nafarroako Agentziaren aurrean egindako elkarretaratzearen harira:

Datozen egunetan, Nafarroako Gobernuko Eskubide Sozialeko Departamentuak lehiaketara aterako ditu desgaitasuna duten pertsonen arretarako zentro itunduen zentroen pleguak.

Aspalditik ohartarazi dugun bezala, sektorea ezin da inbertsio-funtsen esku geratu, horien interes bakarra etekinak maximizatzea baita, langileen lan-baldintzen eta zerbitzuaren kalitatearen kalterako.

Zerbitzuaren zuzeneko kudeaketa defendatzen dugu, erakunde publiko baten bitartez, lan-zentroetan dauden plantillak sendotuko dituena.

Berriz ere, Nafarroako Gobernuak langileen parte-hartzea saihesten du sektoreko pleguak egiteko orduan. Plegu horietan informazio gutxi dago, eta aurreikusten diren baliabideak gutxiegi dira zerbitzuen beharrei eta funtzionamendu egokiari erantzuteko. 

Horregatik, zera eskatzen diogu gobernuari: plantillak handitzea, ratioak hobetzea, kategoria profesional guztiak kontuan hartzea eta jarraipen eta kontrol-mekanismo zorrotzagoak eta eraginkorragoak jartzea.

1...397398399...1,612Page 398 of 1,612

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLĂŤTICA DE PRIVACIDAD

www.lab.eus