2026-07-04
Blog Page 1029

Kalitatezko enpleguaren aldeko pausu garrantzitsua eman da CAFen

admin
-
0
Kalitatezko enpleguaren aldeko pausu garrantzitsua eman da CAFen


Lan produktiboen azpikontratazioak eteteko eta tailerreko langileen kontratazioa zabaltzeko eskaera egin zuen enpresa Komiteak. Eskaera honen aurrean Zuzendaritzak emandako erantzun ez nahiko zela iritzita langileek mobilizazioei ekin zieten. Asanbladak erakutsitako tinkotasunari esker Zuzendaritza langileen eskakizunak onartu beharrean aurkitu da.

Zuzendaritzak onartu du 2017ko eta 2018ko errelebo kontratuak 61 urte betetze datatik bertatik aurrera eramatea. Enpresak tailerreko 71 langile eta 15 enplegatu kontratatuko ditu eta aurrejubilatuen ordezko moduan finko izatera pasako dira. Horrez gain, langile ebentual gehiago hartuko dituzte lan kargen zati bati aurre egiteko. Honek Azpikontratazioari galga jartzeko balioko digu. Bestalde azpikontratatutako lan garrantzitsu batzuen errekuperazioa emango da.

Lorpen hauen harira, Enpresa Batzordetik, langile batzarrean onartu ziren kontratazioaren aldeko eta azpikontratazioaren aurkako mobilizazioak ez aktibatzearen erabakia heleraziko diogu Zuzendaritzari. Hemendik aurrera hitzarmenaren plataformako gainontzeko puntuak negoziatzen hasteko epealdia irekiko da eta langileen eskubideak nagusitu daitezen lan egingo dugu.

 

 

 

Correosen egingo den enplegua kontsolidatzeko EPEak ez du enplegu-suntsiketa geldituko

admin
-
0

Igandean, azaroaren 27an, Correoseko enplegua kontsolidatzeko Enplegu Publikoaren Eskaintzako azterketa egingo da, Estatu osoko 1.606 lanpostu betetzeko. LABetik salatu nahi dugu EPE honek ez duela enplegu suntsiketa murrizten eta ez duela 8.000 ebentual egotea galeraziko, iraupen eta baldintza aldetik guztiz prekarioak diren kontratuekin.

Araba, Bizkaia, Gipuzkoa, Nafarroa eta Errioxan onartutako 5.132 pertsonek Barakaldoko BECen egingo dute azterketa eta 76 lanpostu betetzeko aukera izango dute: 35 Araban, 11 Bizkaian, 15 Gipuzkoan eta 12 Nafarroan.

Hautaketa sistemak zehazten du azterketak puntuazio osoaren %61 suposatzea eta deialdia barematutako beste merituek puntuazioaren beste %39a. Momentu ona da Correoseko enpleguaren garapenaren balantzea egiteko: 10 urte baino gutxiagotan, 66.462 langiletatik 51.383tara pasatu da. Hauen %20a aldi baterako langileak dira, gehienak oso egun gutxitako kontratuekin. 15.000 lanpostutik gora amortizatu da. Egungo deialdiak 1.606 plaza kontsolidatuko ditu, kendu diren lanpostuen %10. Aurten enpresak amortizatu dituen lanpostuak baino gutxiago.

LABetik, Correoseko enplegu finkoa sistematikoki suntsitzeko dinamika obsesiboa salatzen dugu eta dagoen aldi-baterakotasun itzela, posta zerbitzuak modu nabarmenean kaltetzen dituena. Gainera, aldi baterako kontratuek iraupen laburragoa dute eta lanaldi murritzagoekin bete ohi dira. Correoseko enpleguaren prekarizazio azkarra nabarmentzen duten datuak dira.

EPE honek ez du enplegu suntsiketa murrizten eta ez du 8.000 ebentual egotea galeraziko, iraupen eta baldintza aldetik guztiz prekarioak diren kontratuekin.
 

 

 

Jantokitik Jangelara egitasmoa aurkeztu dugu Nafarroan

admin
-
0
Jantokitik Jangelara egitasmoa aurkeztu dugu Nafarroan


LABek beste jangela eredu batean sinisten du eta horretarako bidea Jantokitik Jangelara egitasmoaren bidez jorratzen ari da, bertan lan arloa, eredua eta elikadura ardatz direlarik (buruJabetza, Autogestioa, Negoziazio kolektiboa, inteGrala, Elikadura, curricuLuma, ereduA).

Hitz hauek dira LABek aurkezten duen proiektuaren esanahia. Eskoletako jantoki ereduaren aldaketa beharrezkoa da. Jantokietan elikatzeaz gain, heziketa, aisialdia, bizikidetza, kulturak, herrian enpleguari eustea edota sortzea, ingurumena eta osasuna kontutan hartu beharrezkoak izan behar dira ere. Hau da, kontzeptu ASISTENTZIALETIK HEZITZAILERA igarotzea.

Honetarako kudeaketa-eredua, jaki eta elikadura motak zein lan-alderdia berraztertu behar dira.

LABeko proposamenak hiru erronka nagusi ditu: LAN ARLOA (eredu berria publikoa izan behar da eta langileen lan baldintzak berrikusi behar dira); EREDUA (jantokiak gune hezitzaileak bihurtu behar ditugu, Hezkuntz Proiektuaren parte izan behar dira) eta ELIKADURA (guk eta hemen erabaki behar dugu zer eta nola produzitu, elikadura burujabetzaren bidean).

Hau guztia martxan jartzeko eta gizarteratzen hasteko, inkestak pasako ditugu eskola eta jantoki guztietatik. Irakasle zein jantokietako langileen iritzia jakin nahi dugu, eta bide batez, inkestaren tresna erabiliz, sektorearen diagnostikoa egiteko aukera emango digu.

Inkesten emaitzak, diagnostikoa bera, eta proiektuaren aurkezpena, hitzaldi baten bidez egingo dugu. Bertan irakurketa sakona eginez, eztabaida piztuko dugu eta eragile ezberdinen artean aliantzak sortzeko erabiliko dugu.

Jangeletako eredu berriaren bidean, pausoak emango ditugu errealitate bihurtu arte.
 

 

LAB CONFEBASKek deitutako bileran egongo da

admin
-
0

Gaur goizean CONFEBASKek lau sindikatuak bilera batera deitu gaitu negoziaketa kolektiborako akordio intersektorial bat negoziatzeko mahaia irekitzeko. LABek berriki eman zuen agerraldian esandakoan berresten gara. LAB beti egon da negoziazio kolektiborako euskal esparrua blindatzearen alde eta akordio intersektorial bat erdiesteko egondako bi negoziazioetan parte hartu du. Orain arte CONFEBASK izan da horrelako akordio bat ekidin duena. Gogoratu behar da 2013an ezezkoa eman ziola horrelako egitura akordio bati.

Orain deialdi berri baten aurrean aurkitzen gara eta CONFEBASKek argitu beharko du ea jarrera aldatu ote duen eta ea prest ote dagoen 2013an ezetz esan zion akordioaren moduko bat negoziatzeko.

Konbokatoria honek, uztaileko akordioaren porrota erakusten du, saihesbide bat hartu nahi izan zuten gehiengo sindikala baztertuz eta orduan salatu genuen moduan, erabat antisindikala izateaz gain ez du inolako konponbiderik ekarri.

2013tik hona egoera aldatu egin da, okerrera noski, tartean negoziazio kolektiboaren estatalizazio prozesu bat egon da eta orain horrelako egitura akordio batek, zentzu osoa mantentzen jarraitzen du baina egoera berriei ere aurre egin behar die. Negoziazio kolektiboko euskal esparrua blindatzeko egitura akordio batek, euskal eremuko hitzarmen guztiak babestu behar ditu.

Bestalde, negoziazio kolektiboa desblokeatzearen beharraz ere hitz egin behar da, hitzarmenak gure eremuan nahi ditugu baina bizirik ere nahi ditugu, hitzarmenak berritu egin behar dira.

LABek abiapuntu egokitzat jotzen du 2013an CONFEBASKek zapuztu zuen akordio saiakera eta datorren astean negoziazio mahai berria osatzeko bilerara joango dela iragartzen du, CONFEBASKen proposamena jaso eta aztertuko dugu.

 

 

 

[BIDEOA] Alexis, David eta Iñaki LIBRE!

admin
-
0

Alexis Rodríguez eta David González, jada itxia dagoen TMA enpresan, lanpostuen alde borrokatzeagatik epaituko dituzte azaroaren 29an, eta Iñaki Montes azaroaren 24an, Troikaren aurkako mobilizazioetan parte hartzeagatik.

Alexis Rodríguez y David González serán juzgados el 29 de noviembre por haber defendido los puestos de trabajo en la ya cerrada TMA, y el 24 de noviembre, Iñaki Montes pasará ante el juez por participar en las movilizaciones contra la Troika.

Epaiketa hauen harira, Iraultzen aldizkaria Alexis Rodríguez eta Iñaki Montesekin izan da langileon eskubideak defendatzeagatik jasaten ari diren errepresioaz eta honen aurrean langileok hartu beharreko norabideaz mintzatzeko.

Al hilo de estos procesos judiciales, la revista Iraultzen ha estado con Alexis Rodríguez e Iñaki Montes para hablar sobre la represión que sufren por defender los derechos de los y las trabajadoras y sobre la dirección que debemos tomar la clase trabajadora ante esta situación.
 

 

 

Ez dugu langile borrokaren kriminalizazioa onartuko

admin
-
0
Ez dugu langile borrokaren kriminalizazioa onartuko


ALEXIS, DAVID eta IÑAKI LIBRE!
 Elkarrizketa: Iñaki Montes eta Alexis Rodríguez

Gaur, azaroak 24, hasi da JEZ enpresako Iñaki Montes eta beste pertsona batzuen aurkako epaiketa. Troikak 2014ko martxoaren 3an Bilbora egin zuen bisitaren harira egin zen protestetan atxilotu zuten Montes, eta hainbat urtetako kartzela-zigorra eskatzen dute. LABen iritziz epaiketa hau guztiz bidegabea da, eta Montesi bere elkartasuna adierazi eta honelako epaiketak salatu ditu elkarretaratze baten bidez.

Iñaki Montesi “lotsagarria” iruditzen zaio, “laguntza eta eskubideak murrizten dituzten horiek bankuei milaka miloi oparitzea". Gainera, "badakigu esleipenengatik komisioak kobratu dituzten horiek kartzelarik zapalduko ez dutela". Eta aldi berean ohartarazi du, “injustizia hori salatzeagatik kalera irten ziren pertsonak epaituak eta zigotuak” izango direla.

Montesen egoera ez da isolatua. Hain zuzen ere Troikaren aurkako mobilizazioan parte hartzea leporatzen dioten moduan, astelehenean, hilak 29, Alexis Rodríguez y David Gonzálezek epailearen aurrean aurkeztu beharko dute, TMA enpresan, enpleaguaren defentsan borrokatzeagatik. Epaitu guztiek argi dute botere politiko eta ekonomikoek langileak isilarazi nahi dituztela errepresioaren bidez eta honen aurrean langileok indarrak batu eta mobilizatzen jarraitu behar dugula.

MANIFESTAZIOA
Igande honetan, azaroak 27, manifestazioa izango da Markina-Xemeinen, Alexis eta David libre uzteko eta jazarpen sindikalaren aurka. Eguerdiko 13:00etan hasiko da Arkupetik.

 

 

 

Osakidetzan aplikatu diren murrizketetan atzera egiteko eskatu dugu

admin
-
0
Osakidetzan aplikatu diren murrizketetan atzera egiteko eskatu dugu


Gaur, hilak 24, Osakidetzako sindikatuok (SATSE, ELA, LAB, SME, CCOO, UGT eta ESK), Gasteizko Santiago Ospitalaren aurrean mobilizatu gara murrizketak salatu eta enpleguaren defentsa egiteko. Azken urteetan langileon lan baldintzen prekarizazioa ekarri duten murrizketak aplikatu dituzte Gobernu ezberdinek. Horregatik, osatzen ari den gobernu berriari Osakidetzako langileon aldarrikapenei erantzun bat emateko eskatu diegu.

Langileen eskaerek pairatzen duten prekarietatea gainditzea dute helburu. Alde batetik enplegua sortzea ezinbesteko ikusten dute. Ezin da ahaztu Osakidetzako plantillaren heren bat behin-behinekoa dela eta gaur egun lanean den langile kopurua ez dela inondik inora nahikoa kalitatezko zerbitzua eskaini ahal izateko. Beraz Osakidetzari zein gobernu berriari Europatik etorritako sententziak gauzatzeko exijitzen diogu, beharrezko diren lanpostu finkoak sortuz Osakidetzan.

Osasun publikoaren defentsan, langileek galdutako eskubideen berreskurapenean eta baldintzetan beharrezkoak diren hobekuntzetan urratsak emateko ordua dela deritzogu eta hala eskatzen diogu Gobernu berriari. Horrekin batera azken urteetan ezeztatua egon den negoziazio kolektiborako eskubidea aldarrikatzen dugu.

 

 

 

Amatasun eta aitatasun prestazioak IRPF zergan aitortzetik libre uzteko deia egin dugu

admin
-
0

Madrilgo Justizia Epaitegi Goreneko epai batek ebatzi berri du amatasun zein aitatasunagatik jasotako prestazioek IRPFan aitortuak izatetik libre egon behar dutela, Ogasunari kontzeptu horregatik jasotako dirua langileari itzultzera behartuz. Modu honetan, epaitegiak orain arte Ogasunak ezarritako irizpideen kontra egin du, eta, epaiak jurisprudentzia ezarri ez badu ere, Madrilgo erkidegoan behintzat 2012tik hona ogasunak kontzeptu honengatik jasotako dirua erreklamatzeko aukerari ateak zabaldu dizkio.

Euskal Autonomi Erkidegoan, hiru foru aldundiek 2012. urtetik aurrera Gizarte Segurantzak ordaindutako amatasun eta aitatasun prestazioak IRPFan deklaratu beharrekoak bezala ezarri zituzten, urte horretara arte Araban prestazio hauek IRPFen aitortu behar izatetik libre baitzeuden.

LABetik aldundiei dei egiten diegu Madrilgo Epaitegiko epaiak ezarritako irizpideak bere egin eta Gizarte Segurantzak ordaindutako amatasun zein aitatasun prestazioak IRPFetik libre utz ditzaten, erkidego autonomoek zein udal instituzioek kontzeptu hauengatik ematen dituzten prestazioekin egiten duten bezala.

Era berean, 2012.urtetik Gizarte Segurantzak ordaindutako amatasun edo aitatasun prestazioak jaso dituztenei kendutako dirua itzultzeko bitartekoak martxan jar ditzatela eskatzen diegu aldundiei. Norabide berean, 2012. urtetik hona amatasun edo aitatasun bajan egon direnei dagokien Ogasun Bulegoan erreklamazioa egitea gomendatzen diegu, presio neurri honek ere aldundiek hartu beharreko erabakian eragin dezaketelakoan.

Lan hitzarmen duin bat eskatu dute garbitzaileek

admin
-
0
Lan hitzarmen duin bat eskatu dute garbitzaileek

Borrokan daude Euskal Herriko Unibertsitatean eta Hezkuntza Saileko zentroetan azpikontratatutako garbitasuneko langileak. Bada, Gasteizko errektoreordetzaren aurrean elkartu dira gaur, lan hitzarmen duin baten alde protesta egiteko.

Errektoretzarako hauteskundeak dituzte gaur Euskal Herriko Unibertsitatean (EHU), eta, egun hori baliatuta, garbitzaileek protesta egitea erabaki dute Gasteizko errektoreordetzan bertan, LAB, ELA, UGT, ESK eta CCOO sindikatuek deituta. Hain zuzen ere, azpikontratatutako garbitasun arloko langileei 2014ko abenduan amaitu zitzaien hitzarmena eta, bilera ugari egin ondoren, negoziaketa erabat blokeatuta dago. Langileek lan duina eta eros-ahalmena berreskuratzea aldarrikatu dute.
 

 

 
1...1,0281,0291,030...1,632Page 1,029 of 1,632

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus