LABek elkarretaratzeak deitu ditu azken egunetan ezagutu dugun Osasunbideko 350 langileren kaleratzea salatzeko. Mobilizazioak Nafarroako hiru ospitale nagusietan egin dira; Iruñean, Lizarran eta Tuteran, hain zuzen ere.

LAB Osasunbideak hamarnaka lagun bildu ditu gaur goizean Nafarroako hiru ospitalegune nagusietan egin dituen elkarretaratzeetan: Nafarroako Ospitale Unibertsitarioan, Tuterako Reina Sofía ospitalean eta Lizarra García Orcoyen ospitalean.

Mobilizazio horien helburua izan da salatzea Osasun Departamentuak eta Nafarroako Gobernuak Osasunbideko langileekiko erakutsi duten utzikeria eta konpromisorik eza. Horrek eragin duen egoera urte luzez ari da jasaten Osasunbideko plantilla, eta hori gutxi balitz bezala, berriki nabarmen egin du okerrera 376 langileri kontratua ez luzatzeko erabakiaren eraginez.

Elkarretaratze horietan aipagai izan zen ere Indurain kontseilariak atzo Nafarroako Parlamentuan egin zuen agerraldia, eta argi adierazi zen horren eragile nagusia LAB sindikatua izan zela. Izan ere, halako kaleratze mordoaren gaineko datu xeheenak ezagutzeko agertu dugun egoskorkeriari esker eta plantillaren egoeraren aurrean erakutsi dugun kezka dela-eta eman baitzituen azalpenak Indurain andereak. Kontseilariak 150 langileri kontratua luzatuko zitzaiela adierazi zuen, denak ere txertaketa kanpainarako, baina LABen badakigu datu horiek ez datozela bat aurreko astean Osasunbideko arlo guztietako profesionalen zuzendaritzek sindikatuei eman zizkigutenekin. Baina zuzenak izanik ere, datu “apaindu” eta koiunturalak baino ez dira, kontratuaren luzapena sinatu duten langileek azarora arte baino ez baitute jarraituko. Eta kontratazio horiek, bistan denez, ez dute inondik inora ere konponduko Osasunbideko langileek aspaldiegitik jasaten duten egoera makurra.

Horregatik guztiagatik, LAB Osasunbideko kideok gure prestasun guztia agertu nahi dugu plantilla guztiarentzako baldintza duinak lortzeko helburuz borrokan eta mobilizatzen jarraitzeko. Eta aurretiaz ohartarazten dugu ez gaituztela isilaraziko, ez promesa elektoralekin, ez zatikako irtenbideekin, ezta legez ezarritako zirkuituetatik kanpo negoziatutako konponbideekin ere.