Sindikatuok elkarretaratzea egin dugu Bilbon, Eusko Jaurlaritzaren egoitzaren aurrean, eta bertan iragarri ditugu grebak, hitzarmen berri baten defentsan eta homologazioaren alde.

LAB, ELA, UGT, CCOO eta ESK sindikatuon oharra:

Negoziazio-mahaiak 40 bilera egin ditu, eta dagoeneko enpresen borondatea zein den argi geratu da: homologazioa kendu nahi digute. Homologazioa galtzeko arrisku larrian gaude. Hitzarmen berriaren negoziazioa 2018an hasi genuen, negoziazio erraza izango zelakoan, Osakidetzako langileekin homologatuta egoteak gai jakin batzuk akordio berrietara egokitzea baino ez baitzuen suposatu behar: 2012ko karrera profesionala, lanpostu hutsak betetzeko sistema zabalagoa eta bidezkoagoa, errelebo bidezko jubilazioa, Osakidetzako langilentzat onartu berri dituzten baimen eta lizentziak, etab.

Baina, enpresek ez dute hitzarmena eduki minimoetan egokitu nahi izan eta malgutasunik gabe azaldu dira. Mahaia blokeatuta dago eta badirudi blokeo hori Osakidetzak berak babesten duela, eta ez du erantzun egin dizkiegun bilera-eskaera desberdinei.

2020tik ari gara mobilizatzen, EAEko Ospitale eta Anbulatorio desberdinetan. Pauso berri bat emateko unea heldu da. Atera gaitezen grebetara hitzarmen berri bat eskatzeko, atera gaitezen mobilizazioetara argi eta garbi esatera homologazioa ez dela ukitzen!

Honengatik guztiagatik, eta egoerak pausu berri bat ematea exijitzen duelako, greba deialdia egiten dugu datozen apirilaren 7, 8 eta 9rako.