LABek eserialdia egin du Bizkaiko Aldundiaren aurrean, herrialdeko adinekoen egoitzen hitzarmen kolektiboaren negoziazioan dagoen blokeoaren aurrean foru erakundearen inplikazioa eskatzeko, gaurko greba egunean egindako mobilizazioen baitan.
Aurreko greba-deialdietan zuzenean interpelatu du LABek Aldundia, pertsona nagusien egoitzetako hitzarmenaren negoziazioan aktiboki parte hartu behar dutela eskatuz. Azken egunotan, bilera bat eskatu dio sindikatuak Sergio Murillo Gizarte Ekintzako diputatuari eta Bizkaiko Batzar Nagusietan parte hartzeko eskaria ere egin dio. Eskari hauei entzungor egin dienez, eserialdia egin du LABek.
LAB sindikatuak ezinbesteko ikusten du nagusien egoitzetako gatazka konpontzeko Bizkaiko Foru Aldundiaren inplikazioa. Borrokan dauden langileen lan-baldintzak sektore publikokoekin parekatzea eta egungo ratioa lehenbailehen berrikustea eskatzen du LABek. Negoziazioa desblokeatzeko, eta gure lan-baldintzen hobekuntza negoziatu ahal izateko, Aldundiak negoziatzera eseri behar du.
