LABeko idazkari nagusi ondoko Igor Arroyok eta Nafarroako Esku-hartze Sozialeko arduradun Oihan Ataunek, LABeko hainbat kiderekin batera, agerraldia egin dute Iruñean, Nafarroako Esku-hartze Sozialeko lehen hitzarmenaren akordio historikoaren balorazioa egiteko. Langileen mobilizazioaren eta antolakuntzaren ondorioz lortutako garaipen bat izan dela berretsi dute, eta borroka ez dela amaitu nabarmendu dute. Izan ere, Arroyoren esanetan, Nafarroako adinekoen zentroetako langileek hartuko dute orain borrokaren lekukoa, Esku-hartze Sozialeko langileak zeuden antzeko egoeran baitaute hauek ere: hitzarmen probintzialik gabe eta lan baldintza prekarioetan.
Hala, urtarrilaren 8an (17:30ean, autobus geltoki zaharretik) mobilizazio bat izango dela aurreratu du Igor Arroyok, Esku-hartze Sozialean lortutakoa ospatzeko, baina, aldi berean, zerbitzu sozialetan sustatu beharreko borrokari jarraipena emateko.
Nafarroako Esku-hartze Sozialeko sektorearen kasuan, LABeko idazkari nagusi ondokoaren hitzetan, 1.600 langileen lan baldintzetan hobekuntzak lortzeaz gain, negoziazio eremu berri bat ekarri dute langileek Nafarrora euren borrokarekin. Orain arte, euren lan baldintzak Madrilen negoziatzen ziren, herrialdearekin inolako loturarik zuten eragileen eskutik. “Frogatuta geratu da berriro langileen antolaketak, ahalduntzeak, mobilizazioak eta borrokak emaitzak ekartzen dituztela. Azken urte hauetan asko hitz egin da Nafarroan aldaketaz, erakundeetatik egun batetik bestera etorriko den zerbait izango balitz bezala. Bada, guk uste dugu aldaketa sozialak, iristekotan, langileen mobilizazioari esker datozela: Huerta de Peraltako edo kontratazio publikoan klausula sozialak txertatzeko borrokak horren adibide dira, Esku-hartze Sozialeko sektorean lortutakoa bezala”, adierazi du Igor Arroyok.
Esku-hartze Sozialean urtetan egindako borrokak zerbitzu sozialen eredua zalantzan jarri duela azpimarratu du LABeko ordezkariak, azpigaratutako eta pribatizatutako sektore bat izanik. Lorpena sektoretik harago doala esan du, eta zaintza sistema publiko komunitarioaren aldeko akordio sozial bat behar dela nabarmendu du.