Ipar Hegoa ikasketa sindikalen fundazioak eta LAB sindikatuak Ikusmira seriearen urriko txostena aurkeztu dugu, “Euskal Herriko langileriaren lan eta bizi baldintzak” izenburupean. Azken hamarkadan langileen lan eta bizi baldintzek izan duten bilakaera aztertu dugu argitalpenean, eta horixe aurkeztu dugu gaur hedabideen aurrean, gure proposamenen berri emateaz gain prekarizazio prozesuari mugak jartzeko. LABeko idazkari nagusi ondoko Igor Arroyok eta Ipar Hegoako analisien arduradun Oihana Lopetegik hartu dute hitza.
Krisi ekonomiko sakona bizi dugu, baina bere ondorioak, berriz ere, nagusiki langileok pairatzen ditugu Espainiako Estatuko gobernuek 2010 eta 2013 urteen artean ezarritako erreformen bidez horretarako baldintza estrukturalak eta arauak ezarri zituztelako. Hau da, erreforma haiek kaleratzeen erraztea, enpresei malgutasuna ematea, prekarietatean sakontzea edota lan hitzarmenen babesa kaltetzea ezartzeaz gain, eta 2008ko krisiari irtenbide neoliberala ematetik harago, filosofia eta arau horiek betikotu zituzten.
Datuak eskuetan, Igor Arroyok nabarmendu du greba kopuruak gora egin duen neurrian, lan hitzarmenen estaldurak ere gora egin duela; eta alderantziz. Hortaz, borroka sindikalaren balioa aldarrikatu du, eta, aldi berean, Elkarrizketa Sozialeko Mahaia ez dela aldagai esangurantsua berretsi du: “Ez du inolako eraginik”. Zentzu honetan, egun dauden borroken eta azken hilabeteetan izan direnen garrantzia azpimarratu du.
Hala ere, borroka eta grebak antolatzea ez dela nahikoa adierazi du, eta lan eta bizitzaren prekarizazio prozesuari buelta emateko egiturazko neurriak hartzea ezinbestekoa dela nabarmendu du. Hala, Euskal Herrirako Lan Kode bat eta Gizarte Segurantza propio baterako lege bat aldarrikatu ditu, eta horiek zein ezaugarri izan behar dituzten eztabaidatzen hasteko garaia dela esan du. Ildo honetan, urtarriletik aurrera eragileekin bilduko garela aurreratu du, eztabaida horri heltzeko eta gure proposamenak osatzeko. Dena den, gaurdanik, egungo markoan ere, egungo eskumenak baliatuta, prekarizazioari mugak jartzeko urratsak eman daitezkeela adierazi du LABeko idazkari nagusi ondokoak; Akordio Interprofesionalaren bitartez edo bestelako politika publikoak egiten, kasu.