120 lagun inguru batu dira gaur LAB eta ELA sindikatuek deituta Tolosan, udal eta foru langileen lan baldintzak arautuko dituen lan hitzarmenaren alde. Elkarretaratzearen ostean LABeko delegatuen batzarra egin dute hemendik aurrera eman beharreko urratsak aztertu eta eztabaidatzeko.
Gaurko ekimenarekin UDALHITZ marko sektorialaren beharra azpimarratzen dugu sindikatuok, jendeartearentzako kalitatezko zerbitzu publikoak udalerrietan ere bermatzeko, eta toki erakundeetako langileen lan baldintza duinak ziurtatzeko. Hain zuzen ere berme faltagatik, negoziazio prozesuari heltzeko oinarrizko bermerik ez dagoelako eten genuen duela bi aste mahai negoziatzailean geure parte hartzea.
Tolosako alkate eta EUDELeko elkarteburu den Jokin Bildarratzi sindikatuok egindako bilera eskaeraren harira, honen erantzuna jaso dugu: datorren martxoaren 25erako finkatu da hitzordua. Sindikatuok bertara eramango ditugu orain arteko aldarrikapenak.