Cikautxoko azpikontratetan, prekarietatea borrokatuz, lan baldintzak hobetzea lortu dute. Orain arte 900 euro gordin kobratu dute gaur egun arte (800 euro garbi) 12 hiletan aparteko pagak barne. Egindako borrokari esker, akordioa lortu dute eta uztailean, hitzarmenak ezartzen duen soldata jasoko dute.
Kimiketako estatu mailako hitzarmenak 1.300 eurotako soldata gordina ezartzen du 12 hiletan (pagak barne). Soldata prekarioa, kontuan hartzen baditugu ezarri behar zaizkien kenkariak (PFEZ, gizarte segurantza). Hori horrela izanik, hitzarmenak ezartzen duena ere kobratzen ez duten langileen egoera zein da? Ze egoeratan egon dira orain arte Roal CB enpresako langileak eta beste azpikontrata batzuetakoak langileak? Pobreziara kondenatuta egon dira, eta oraindik horrela daude langile asko eskualdean, gure auzokideak, herritarrak, lankideak,..
Apirila eta maiatzean egin zuten publiko beraien egoera Roal CB enpresako langileek, baina urteak daramatzate pobreziara kondenatuta. 900 euro gordin kobratu dute gaur egun arte (800 euro garbi) 12 hiletan aparteko pagak barne. Errentako aitorpenik ere ez dute egin behar izan! Orain, borrokaren ondorioz, akordioa lortu dute eta uztailean, hitzarmenak ezartzen duen soldata jasoko dute. Gainera, azken hileetan enpresak dagokiena ez ordaintzeagatik sortutako zorra ere hilerik hile kobratzen joango dira, soldatarekin batera.
Zorionak Roal CBko langileei. Zorionak, zuen borrokarekin prekarietateari zaplazteko ederra eman diozuelako. Zorionak enpresari haginak erakusteagatik, nahiz eta horrek egunerokotasunean ondorio larriak izan dituen zuentzat. Zorionak batu izangatik, zuen arteko elkartasunak eman dizuelako indarra eta garaipena.
Zorionak eta eskerrik asko! Sarri ahaztu egiten zaigu eta zuek berriro erakutsi diguzue: borroka ezinbestekoa da, eta gainera, balio du. Gure eskubideen alde borrokatzeak merezi du. Duintasunez, harrotasunez, elkarrekin… dena dugu irabazteko. Eta lor daiteke!
Baina oraingoan, ezin ahaztu, gaur egun ere, badagoela langile mordoa Cikautxoko hainbat azpikontratetan etxera 800 eurotako soldatak eramaten, oporretarako eskubidea mugaturik, ebentualtasunera kondenatuta, lan-osasunerako eskubidea hutsaren hurrena bihurtuta, etab. luzea. Roal CB enpresan ikusi dugu aldaketa posiblea dela. Langileen erabakia da horretarako beharrezkoa: erabakia hartu eta bideratzea.
Lagunonbi, Azken Ikutu, Aurrez eta beste enpresa batzutatako langileak animatu nahi ditugu. Hartu erabakia eta esan ozen: “Nahikoa da! Ez dut nahi gehiago lapurtzerik!” LAB sindikatua, Roal CBko langileak eta beste hainbat azpikontratetakoak eurekin izango ditugu bidean laguntzeko, gutxienezko lan-baldintzak arautzen dituen hitzarmena eurek ere lortzeko.