PRIMARK-en gaixotasun baja hartzeagatik bi langile kaleratu dituztela salatuz mobilizatu gara. Dirudienez, PRIMARK-eko langileek ez dute gaixotzeko eskubiderik eta kaleratuak izateko arrisku bizia pairatzen dute baja hartzen badute. Are gehiago enpresako zuzendaritzak langile sumisoak nahi ditu, haien eskubideak aldarrikatzen ez dituztenak, protestatu gabe men egiten dutenak. Profil hau betetzen ez duten langileentzat, PRIMARK-ek posturik txarrenak gordetzen ditu, behin eta berriro trabak jartzen dizkie opor egunak aukeratzeko orduan, ordutegi txarrenak jartzen dizkiete eta egun libreak langileei interesatzen ez zaizkien datetan ematen dizkiete.
Baldintza kaxkar hauei, Madrilen CCOO, UGT eta FETICO sindikatuek negoziatutako eta sinatutako hitzarmen bat aplikatzeak ekartzen dituen ondorioak gehitu behar dizkiegu. Arabako Ehungintzaren Merkataritzako Hitzarmen Kolektiboa baino kaxkarragoa den hitzarmen bat aplikatzen zaie PRIMARK-eko langileei, Enpresa mailako hitzarmen estatala hain zuzen. Hau da, hitzarmenaren aldetik ere, Arabako beste dendetan lan egiten dutenen lan baldintzekin konparatuz, PRIMARK-eko langileen baldintzak txarragoak dira.
Bestaldetik, uste dugu ez dela kasualitate hutsa langile hauen kaleratzea izatea justu oraingo Komiteko mandatuaren azken txanpan sartuta gaudenean. Kaleratutako langileek aurreko hauteskundetan LABeko hautagaitza bultzatu zuten eta argi dago hurrengo hauteskundetan LAB bezalako konfrontazioko eta sindikatu borrokalaria Komitean sartzeko arriskua ez duela hartu nahi izan enpresak. Baina hala ere ez gaituzte geldituko, borrokan jarraituko dugu eta PRIMARK bezalako gune prekarioak beti izango dira LABeko jomuga.