Atzo eguerdiko 13:00etan bilera egon zen Eusko Jaurlaritzaren Bilboko egoitzan, baina enpresa eta haren ordezkariak ez ziren azaldu ere egin. Hau da NANUK enpresako gatazkarekin enpresak apurtzen duen bigarren negoziazio mahaia. Lehena, irailean zehar, enpresaren bulegoetan bertan, Elorrion gertatu zen.
Ordukoan ondorioa garbia zen, langileek berehala kobratu zezaketen paga extraren dirua modu ordenatuan ordaintzeko aukera eman zioten enpresari eta, gainera, borroka gabe, akordio batekin %4ko soldata jaitsiera tenporala onartu zuten. Baina enpresak urratsak eman beharreko bi puntuetara iristerakoan (enpresa hitzarmena eta kaleratuaren berronartzea) ezezko borobila jaso genuen.
Ordutik eta urriaren 10era arte, ez da inolako harremanik egon enpresarekin. Baina ostegun horretan, Eusko Jaurlaritzako bitartekariekin, Bilbon, berriro eseri ginen mahai inguruan. Bi aldeek, elkar ulertzeko eta negoziatzeko konpromisoa azalduz, balorazio positiboarekin atera ginen bileratik.
Astelehenean, urriak 14, 10 minutu eskasean, enpresa hitzarmena ia adostua gelditu zen, hilabete baino gehiagoko greba batekin harrigarria guztiontzat. Data bat konfirmatzea besterik ez zen falta. Hau da, beste aurre akordio bat genuen mahai gainean.
Beraz, aurre akordio guzti hauekin, aurrerapauso oso garrantzitsua eman genuela pentsatu genuen eta, benetan, gai korapilatsuenak konponduta zeudela; enpresak mahaian jarritako baldintza ekonomiko guztiak onartuta eta enpresa hitzarmena aurre adostuta zeuden.
Hala ere, enpresak greban parte hartzearren mendekuz kaleratutako langilearen puntuan arazoa sortu zen.
Enpresak, azken hilabetean mila aitzakia jarri ditu kaleratzea justifikatzeko. Kaleratzea inprozedentea izan da, inolako aurre abisurik gabe eta greba hasi baino 2 egun lehenago.
Negoziazioetan, enpresak “langile txarra” zela esan du, orain arte inolako kexarik eduki ez badu ere, “huts egiteak” zituela lanean, baina ez du inoiz abisu edo faltarik eduki… eta lan karga arrazoiak aipatu ordez, beste mila kontu mahai gaineratu dituzte. Zentzu horretan, adibiderik argiena, irailaren 12an, enpresaren abokatuak “ez da kaleratze diziplinarioa izan, kontratua bukatu zaio hori da guztia” (alde guztiek sinatutako aktan jasoa dago), GEZURRA! Ez zaio kontratua bukatu eta kaleratze gutuna eta bere kontratua dira horren adierazleak.
Mendekuzko kaleratzea izan arren, gatazka konponbidean jartzeko, gure aldetik egindako esfortzuak handiak izan dira, besteak beste, enpresak langileokin daukan zorraren heren bat barkatzea eskaini zaie. Kaleratuarekin emandako bidegabekeriarekin bukatzeko, bere lanpostua utzi eta enpresatik baja emateko prest dagoen jendea agertu da, hortaz, kaleratze traumatiko bat ekiditeko aukera eman dute. Grebalarion ahalegin guzti hauei erantzuna EZEZKOA izan da eta, are gehiago, negoziazioarekin jarraitzeko urriaren 16an eguerdiko 13:00ean Eusko Jaurlaritzan geneukan bilerara enpresa ez da agertu ere egin. LOTSAGARRIA!
Ez dugu borrokatzea erabaki duen lankide batekiko mendekuzko kaleratzerik onartuko. Negoziazioetan bi aldeek hartu-eman behar dute, eta hori da gertatu dena. Baina greba egitea erabaki duen langilea lanera bueltatu behar da, enpresaren esku dago, langileok mahai gainean jarritako eskaintza/aukera ezberdinak onartu edo gatazka bere horretan mantendu.
Guzti horregatik, urriaren 18an arratsaldeko 19:00etan Elorrioko Plazatik aterako den manifestazioan parte hartzera deitu nahi ditugu langile guztiak.
Nik GREBA egin badut, KALERATUA ni izan nintekeen!
Xagu lanera!
{module[111]}