Inauxa-Mubeako langileen enpresa batzordeak jakinarazi du mobilizazioekin aurrera jarraituko duela, zuzendaritzaren “xantaiari” aurre egiteko. Joan den astean, ordu erdiko elkarretaratzeak egin zituzten egunero, hitzarmen duin bat eskatzeko eta erretiratzeko asmoa duten bi lankidek enpresaren ezetza jaso zutela salatzeko. Egoerak bere horretan jarraitzen duenez, langileek ohartarazi dute mobilizazioak gogortzeko prest daudela, “gure bi lankideak jubilatzeari eta langileontzako hitzarmen duin bat negoziatzeari uko eginez gero”.
LAB, UGT eta ELA sindikatuek osatzen dute enpresa batzordea Amurrioko lantegian. Langileen iritziz, jubilatzeko prest dauden langileak erabili ditu zuzendaritzak, bere aldeko hitzarmen bat lortzeko. “Kontua da bi langileok jubilatuta egon beharko luketeela, batak irailean eta besteak hilabete honetan, baina zuzendaritzak horri uko egin dio, hitzarmen kolektibo berria sinatu arte bederen. Eta hitzarmenean atzerapausoak proposatzen dizkigu; lan jardunaldia luzatzea, murrizketak desgaitasun iragankorren kasuan eta egutegi prekarioak aldi baterako langileentzat, besteak beste”, azaldu dute.
Urte hasieran ekin zioten hitzarmena negoziatzeari, egin ohi duten bezala. Lankide batek erretiro partziala lortu zuen urtarrilean bertan, akordio-markoan oinarrituta. Bada, oraingoan jubilazioa eskuratu behar dutenekin presionatzen dabil zuzendaritza: “Ez genuen espero, duela hiru hilabete eskas pasatu direlako Mubea multinazional alemanak lantegia erosi zuenetik, eta logikoena integrazio ordenatu eta lasai bat izango litzateke, elkar hobeto ezagutzeko helburuarekin”.
Zuzendaritza konbentzitzen saiatu dira zenbait hilabetez, jubilazioek alde guztiei egin ohi dielako mesedez: “Langilearen eskubidea da, 30 urte baino gehiagoz lanean aritu ondoren; erreleboa ematen duenari egonkortasun handiagoa ematen zaio; lan taldearen berritze egokia eta beharrezkoa gauzatzen da; enpresarentzat errentagarria da ekonomikoki; eta barruko laneko giroari ere mesede egiten dio, gauzak modu logiko batean gertatzen direlako”.
Enpresa batzordeak nabarmendu du ez duela “xantaia” onartuko, eta mobilizazioekin jarraituko duela, langileek eurek aho batez erabaki hori hartu eta gero.