Beste behin Madrilen hasiko den epaiketa politikoa salatu beharrean gaude. Hain zuzen ere, gaur hasiko da espainiar Entzutegi Nazionalean Urko Aierbe, Joxe Aldasoro, Aniaitz Ariznabarreta, Sandra Barrenetxea, Erika Bilbao, Eneko Compains, Ugaitz Elizaran, Egoitz Garmendia eta Rosa Iriarteren aurkako epaiketa. EKINeko zuzendaritzako kide izatea leporatuta. Bestalde LABetik gure elkartasuna eta babesa adierazi nahi diegu auziperatu guztiei.
Euskal Herriak bere bide propioa egiteko aukera guztiak trabatu nahi ditu estatuak. Espainiako Gobernuak giza eskubideak zein eskubide zibil eta politikoak urratzen dituzten politikak garatzen jarraitzen du, gatazkari zein bere ondorioen konponbideri lagundu beharrean. Bada garaia inposatu nahi dizkiguten epaiketa, atxiloketa, sakabanaketa eta beste hamaika urraketen zurrunbilotik ateratzeko.
LABek etorkizunari begiratzen dio eta herri honenetzat askatasunean, bakean eta demokrazian oinarrituko den etorkizuna eraikitzeko konpromisoan berresten da. Ez gaude prest gure etorkizuna Espainiako Gobernuko agintari arduragabeen eskuetan uzteko.