Larrialdietako Osasun Garraio Sareko enpresa batzordeek zerbitzuko langileek pairatzen duten egoera larria salatu dute. LAB, ESK, CCOO, ELA eta UGT sindikatuak daude ordezkatuta enpresa batzordeetan, eta goizean elkarretaratze bat egin dute Bilbon, Eusko Jaurlaritzaren Osasun Sailaren aurrean, Larrialdiak-Eulen errudun, Eusko Jaurlaritza arduradun leloarekin.
Hain zuzen ere, Eusko Jaurlaritzak azken lehiaketa Larrialdiak/LRK kooperatibak eta Eulen enpresak osatutako Aldi Baterako Enpresa Elkarteari esleitu zionetik zerbitzuaren egoera penagarria da. Langileek hala salatu zuten duela hilabete egindako agerraldi batean, eta egoerak bere horretan jarraitzen duela berretsi dute gaurko protestan. Osasun Sailetik ez dute egoera hobetzeko konpromisorik lortu; hortaz, erakundeei berriro exijitu diete larrialdietako sareak ezinbestekoak dituen kalitate baldintzak berma ditzatela.
Larrialdietako Osasun Garraio Sarean hirurehun bat langile ari dira lanean Araba, Bizkaia eta Gipuzkoan, eta Osakidetzak koordinatu eta eman ohi dituen larrialdietaz arduratzen dira. Hainbat urraketa pairtatzen dituztela slatu dute: zigorrak, kaleratzeak, soldata lotsagarriak eta utzikeria baliabideei dagokienez, besteak beste.