Gaur, bi orduz eten egin dugu gure jarduna krisi klimatikoari eman beharreko erantzun ekosozialistari buruz gogoeta egiteko. 11:00etatik 13:00etara, bi orduz, LABeko egoitzak ixtea erabaki dugu. Larrialdi klimatikoaren aurrean, ekosozialismoaren apustua berretsi dugu. Hala adierazi du Garbiñe Aranburu idazkari nagusiak Bilboko egoitzaren kanpoaldean egindako agerraldian. "Bidegurutze batean gaude: kapitala ala bizitza", nabarmendu du. Bitartean, egoitzak ixtearekin batera, Gasteizen, mintegi bat egin dugu trantsisio energetikoa ardatz.
Garbiñe Aranburuk agerraldi bat egin du Bilboko egoitzaren kanpoaldean, eta, bertan, LABen irakurketa plazaratu du.
Hain zuzen ere, larrialdi klimatikoa ezkutatu ezin den errealitate gordina dela nabarmendu du. "Larrialdi klimatikoari ezin zaio aurre egin sistema kapitalistaren baitan. Bidegurutze batean gaude: kapitala ala bizitza. Bat ala beste, kontrajarriak baitaude biak. Bizitza jomugan du sistema honek: desberdintasun sozialak gero eta handiagoak dira eta naturaren ustiaketa neurrigabea da, jasangaitza. Sistema aldatu behar da. Sistema auzitan jartzen ez duenak egungo eredua zuritu egiten du".
Kapitalak krisi orori kapitalismo gehiagorekin erantzuten diela esan du; eta krisi klimatikoari, esaterako, kapitalismo berdearekin: "Ez dago kapitalismo berderik, ez dago kapitalismo jasangarririk, sistemaren aurpegi zuriketa baino. Hori da instituzioen jarrera. Kapitalaren interesen jagoleak ditugu Euskal Herrian ere: AHT, erraustegia, Supersurra, Hegoaldeko Tren Saihiesbidea, Frackina sustatzea eta krisi ekologikoan sakontzea da. Bizitza merkantilizatzen ari dira, esplotazioan oinarritutako sistema babesten dute, sistema dira".
Gaurko deitua zegoen mobilizazio eguna sindikatuaren agendan sartu dugu. Gaur gure egoitzak bi orduz itxi ditugu, geratu egin gara, aski da esan dugu: "Keinu honekin larrialdi klimatikoari aurre egiteko sindikatuaren konpromisoa agerian utzi nahi izan dugu. Eta keinu honekin gaurko deituta dauden mobilizazio desberdinak indartu nahi ditugu".
LABen eguneroko borroka da sistema hau gainditzea, bizitza erdigunean jartzeko, beste bizitza bat izateko, bizitza duina. Eredu sindikala berritu dugu, feminismoaren eta ekosozialismoaren oinarriak gure eginez.
Larrialdi klimatikoari aurre egiteko trantsizio ekosozialista baterako bidea egin behar da. Eta zein izango da LABen ekarpena trantsizio ekosozialista horretan?
– Eraldaketa sozialerako aktibo izan. Egungo produkzio eta kontsumo eredua aldatu egin behar da, eta, justizia sozialaren norabidean, sortzen den aberastasuna modu orekatuagoan banatu. Hori da gure borroka.
– Demokrazia eta burujabetzan sakondu. Merkatuen eta enpresa trasnazionalen neurrira eginiko sistema antidemokratikoa da, eredu ekonomiko eta sozialari buruzko erabakiak elite ekonomiko batek hartzen ditu. Langileen erabaki ahalmena handitzea ezinbestekoa da.
– Larrialdi klimatikoaren aurkako borroka, ildo sindikalean txertatzea. Klase borroka eta ekologiaren aldeko borroka uztartu egin behar ditugu.
Gabiñe Aranbururen hitzetan, "trantsizio ekosozialista sustatzeko jendartearen aktibazio soziala da gakoa. Borroka honetan, langileak aktibatu nahi ditugu. Langileekin pedagogia egin, eta ikustarazi egunero lan baldintzak duintzeko egiten dugun borroka eta mundua gainbehera daraman larrialdi ekologikoari aurre egitea borroka bera direla. Bizitza duina defendatzen ari gara".
Beraz, gai hau, sindikatuaren konpromiso izatetik langilegoaren borroka bilakatzera urratsa ematea da LABen erronka: "Gaur sindikatua geratu dugu, etorkizunean langileak geratzeko".