LAB sindikatuak sinadura bilketa kanpaina bat abian jartzea erabaki du, IIP programa bertan behera geratu dadin eta 37/2014 Foru Dekretuak arautzen dituen 9, 10, 11, 12 eta 13 artikuluak eta xedapenak derogatuak izan daitezen.
Beste behin ere agerian geratu da IIP programa martxan jartzeko ez direla baldintza nahikoak ematen irakasleriaren ingeleseko titulazioari begira. Berez C1 maila eskatzen du
Hezkuntza Departamentuak, baina salbuespenak arau bihurtuz, egun hainbat irakasle B2rekin soilik ari dira ingelesez klaseak ematen. Hau gutxi balitz, Dekretu honetan, behin behineko akreditazioak eskaini nahi dira azterketa baten bidez.
Hezkuntzaren kalitatea jeisten ari da ingelesa indartzearen aitzakiarekin. Ingelesaren kalitatea jeisten da C1 tituludun irakasle gutxiegi dagoelako eta hau horrela izanik, ingelesez emandako arloen kalitatea ere behera doa.
Dekretu honen bidez ahalbidetzen da edozeinek bi urteko ko-tutoretzarekin Haur eta Lehen Hezkuntzarako habilitazioa lortzea. Honekin alferrikakoa izanen lirateke Haur eta Lehen Hezkuntzako irakasleek egindako gradua edo diplomatura lortzeko ikasketak.
Nahiz eta askotan eskatu, IIP programa martxan duten ikastetxeen ebaluazioen emaitzak ez ditugu ezagutzen. Zeren beldur dira?
Azken urteotan lan baldintzak nabarmen egin dute okerrera, besteak beste, murrizketak, ratioen igoera eta orain IPP. Inposatutako programa honek irakasleriaren lan-baldintzak zeharo okertzea dakar, besteak beste, behar ez den mugikortasuna, irakaslegoaren parte batek ez duenez ingelesa beren ikastetxez aldatzera behartuak izango dira , aisialdian eta gure dirutik ordaindutako hizkuntza ikasteko ikastaroak, Hezkuntza Departamentuak eskainitako formakuntza ez delako nahikoa.
IPP programa hau helburu politiko batekin jaio zen, euskararen matrikulazioari talka jartzeko, inongo planifikazio pedagogikorik gabe eta hezkuntza komunitateari entzungor eginez, inposatzen jarraitzen dute, ikasleen hezkuntzaren bizkar eta langileriaren bizkar. IIP akats pedagogiko handi bat da eta atzetik UPNek berezkoa duen euskararekiko gorrotoa dago. Hezkuntza politika atzerakoi baten aurrean gaude eta zoritxarrez etorkizuneko generazioek ordainduko dute.
Nafar jendarte osoa deitzen dugu kanpaina honetan parte hartzeko.