Martxoaren 21a, Xenofobia eta Arrazakeriaren Kontrako Nazioarteko Eguna da. Bada, egun horren bezperan, lan-saio bat antolatu dugu Bermeon, arratsaldean. Hiru atal izan ditu ekimenak. Lehen atalean, langile migranteen erronka berriak izan ditugu hizketagai, sindikatuak gaiaren inguruan duen planteamenduaren berri emanez. Bigarren atalean, Herrien Epaitegia egin dugu. Saio honetan, migrazioa eta arrantza sektorea izan ditugu aztergai. Azkenik, hirugarren zatian, elkarretaratze bat egin dugu, maiatzaren 5eko Herrien Besarkadaren mobilizazio egunera deituz.
Herrien Epaitegian, Eusko Jaurlaritza eta arraste arrantzaleen patronala eta arrastre arrantzaleen sektoreko enpresak salatu ditugu, sektoreko langileen eskubideak urratzeagatik. Salaketa Ekintza Sindikaleko idazkari Xabier Ugartemendiak aurkeztu du.
Ondoren, bi lekukok beraien testigantzak aurkeztu dituzte. Bai salatzaileak, zein lekukoek, Herrien Epaitegiko hiru epaileen galderak erantzun dituzte, eta, azkenean, hauek, sententzia irakurri dute. Epaileak Ainhize Muniozguren LAB sindikatuko Idazkaritza Juridikoko Idazkaria, Iratxe Urizar Giza Eskubide eta nazioarteko zuzenbidean aditua eta Monica Vargas Campaña Globaleko kideak izan dira.
