LAB, ELA, CCOO eta UGT sindikatuko ordezkariok agerraldi bat egin dugu gaur, Gipuzkoako Kale Garbiketako hainbat langilerekin batera. Hain zuzen ere, Eusko Jaurlaritzaren Lan Delegaritzan Greba Mugagabearen deialdia erregistratu dugula jakinarazi dugu: greba 2017ko abenduaren 20an hasteko deialdia egin dugu, zehazki abenduaren 19an gaueko 21:00etatik aurrera.
Negoziatzen ari garen hitzarmenak, bere indarraldia 2015ko abenduan amaitu zenak, ondorengo jarduerak betetzen ditu Gipuzkoan; bide garbiketa publikoa, ureztaketa, etxez etxeko zabor bilketa, hiri-hondakin solidoen zabortegiak, hiri-hondakin solidoen tratamendua eta ezabapena, gaikako bilketa, birziklapen plantak, estolderiaren garbiketa eta kontserbazioa, hondartzen, kaiena, ibaien eta ibai ibilguen garbiketa, mantentze lanak eta kontserbazioa.
1.200 langile inguru dira hitzarmen honen aplikazioak eragiten dienak.
Zertarako egin dugu Greba deialdia? Bereziki bi dira arrazoiak:
1/ Patronala negoziazio mahaian eskatzen ari garena ematera behartzeko. Hiru aldarrikapen nagusi dira:
a/ Erregulazio edo prozedura bat egotea lanaldi partziala duten langileentzat lan postu hutsak betetzeko, dela behin behinekoak edo behin betikoak izan.
b/ Soldata igoera aurreko urteko IPCaren gainetik
c/ Hitzarmenean honen denbora eremu mugagabea adostea, hau da, ultraactividad mugagabea.
2/ Administrazio ezberdinek kontuan izan dezaten plegu edo baldintzen agirietan zerbitzua esleitzeko berrikuste ekonomikoak ez badira erdiesten gerta daitekeena. Donostiako Bide Garbiketa egoera honen adibide argia da. ( 4 + 2)
Eta zergatik deitzen dugu grebara?
-Bi urteko negoziaketaren ostean ez dutelako gure ultimatum proposamen onartzen.
-Negoziaketan zehar bi tabla ekonomiko sortzen ahalegindu direlako. Bata berrikustea ekonomikoa zuten kontratentzat eta bestea, ez zutenentzat.
-Une batean Donostiako Bide Garbiketa hitzarmenetik ateratzea baldintza bezala jarri zutelako negoziaketa aurrera jarraitzeko.
-Hitzarmenaren negoziaketa bitartean Enpresa Hitzarmen proposamen ezberdinak egon direlako. Denak, patronalaren aldetik Sektoreko Hitzarmena anulatzeko asmoarekin. Eta denak, zegokien langileek ukatuak ahobatekotasunez Sektoreko hitzarmenaren alde eginaz.
-Gainontzeko herrialdeko langileen bizkar bota nahi dutelako Donostiko pleguak berrikuste ekonomikorik ez izatea.
-Kontratazioa kontrolatzen jarraitu nahi dutelako, eskubideak aitortu gabe.
-Sektoreko langileak gutxietxi dituztelako
-Bi urteko negoziaketaren ostean, argi genuelako, edo abenduaren 20ean hitzarmena dugu, edo grebara goaz.
Argi utzi nahi dugu, greba hasten denean gure aldarrikapenak egungoak baina handiagoak izango direla.
Grebaren lehen egunean, abenduaren 20ean, grebalarien herrialdeko manifestazioa burutuko dugu Donostian.