Martxoaren 8ko greba feminista antolatzeko asanbladak egingo dituzte egunotan Euskal Herriko hainbat tokitan, Euskal Herriko Mugimendu Feministak deituta. Gasteiz, Donostia eta Iruñean gaur egingo dituzte; Beasainen, bihar; eta Bilbo eta Oiartzunen, larunbatean.
Herri, auzo, hiri eta eskualde askotan gauzatzen ari dira asanblada irekiak Martxoaren 8ko greba feminista ezaugarritu eta antolatzeko. Hain zuzen ere, greba egitea aurreikusi dute Martxoaren 8rako, Emakumeen Nazioarteko Egunerako.
Kontsumo, zaintza eta lan produktibo zein erreproduktiboetan planto egiteko deia luzatzen ari da munduko lurralde askotan, eta Euskal Herria ere batu da nazioarteko deialdira. LABek bat egin du dinamikarekin.