Greba Orokorraren biharamunean, balorazioen txanda izan da. Hala, LABeko idazkari nagusi Garbiñe Aranburuk urtarrilaren 30eko mobilizazio egun arrakastatsuari buruz hitz egin du zenbait hedabidetan. Besteak beste, aldarrikapenei bide emateko patronalei eta instituzioei emandako bi hilabeteko epeari buruz galdetu egin diote, eta etorkizuneko erantzun mobilizatzailea patronalen eta instituzioen jarreraren araberakoa izango dela jakinarazi du Garbiñe Aranburuk. Hain zuzen ere, Bilboko ekitaldian, sindikatuko idazkari nagusiak berak aurreratu zuen, eskakizunak erantzuten ez badituzte, udaberrian borroken loraldi berria etorriko dela.
“Patronalek eta EAJk ondo ulertu dute mugarri bat jarri dugula, ofentsibara pasatzera goazela, grebarekin ez dela ezer amaitzen”. Garbiñe Aranbururen hitzak dira hauek, Naiz Irratian esandakoak, Greba Orokorraren balorazioaren inguruan egindako elkarrizketetako batean. Euskadi Irratiko Faktoria saioan ere elkarrizketatu dute.
LABeko idazkari nagusiak adierazi du osteguneko irudiak grebaren arrakastaren isla direla, hitzek baino gehiago esaten dutela. “Patronalek eta instituzioek kontutan hartu beharko dute erakutsitako indarra”, esan du. Zentzu honetan, urtarrilaren 30eko Greba Orokorrak etorkizunari begira arrastoa utziko duela nabarmendu du: “Lantokiz lantoki eta herriz herri egindako lana, aniztasun hori, balioan jartzeko modukoa da”.
Ostegunekoa langileen duintasunaren eta batasunaren greba izan zela berretsi du, Euskal Herriaren historian gogoan geratuko dena. Aktibazio sozial oso garrantzitsuaren ondorioa izan dela azaldu du, eta horrek borroka guztien bateratzea ekarri duela jakinarazi du. Jendartearen erantzun arrakastatsua nabarmendu du, “grebari balioa kentzeko saiakeren gainetik; indar polizial desberdinen neurriz kanpoko jarrera, tarteko”.
- Patronalak eta instituzioek bi hilabetetan gure eskakizunak erantzuten ez badituzte, udaberrian borroken loraldi berria ekarriko dugula ohartarazi dugu
- Tsunamia ekarri du Greba Orokorrak
- Gobernuek eta patronalek aintzat hartu behar dute urtarrilaren 30eko Greba Orokorraren oihartzun handia
- Goiza aurrera joan ahala zerbitzu publikoak eta merkataritza ere atxiki zaizkie Greba Orokorrak industrian duen jarraipen zabalari
- Greba Orokorra jarraipen zabala izaten ari da egunaren lehen orduetan
- BIDEOAK
- ARGAZKIAK